Romans 1-ын алдартай Библийн эшлэлүүд

Хуваалцах

Adiḵpun ibaine angiwaḻagawag atte Ambaḻu we Damag te siya Ugud Apudyus we maḵabooḻ anagu'tta losane amati, umuna'tta Judyu ya asiyot da Gentil.

Te gapu si Ambaḻu we Damag, impaigammun Apudyus inonae angwa'tta tagu'ḵ maun-unan gapu'tte tuttuwae pammatida ḵan siya. Te ḵanan ni nigili si Ugud Apudyus, “Sa tagu aḵ Apudyus angwa si maun-unana mipagapu'tte pammatina, awad ḵan siya biyag aḵ inggana.”

Te taḵon ay nu adipun maila ḵinaapudyusna ya sa ḵabooḻanae ippun anungusna, mamaḵ-ila'tta ḵingwana inggan ni nangwaana'tte lubung. Pun ippun lasun da tagu we adi amati.

Te taḵon ay nu iniiggammudae awad aḵ Apudyus, adidapun andayaw ya adidapun os anggappiya ḵan siya. Yaḵon nambalin ippun anun da ansosomsomoḵda ya gummiḵbot somsomoḵda.

Te pinasantanda ḵatuttuwaan mipanggob ḵan Apudyus atte tinutuli. Ḵad siya dinaydayawda ḵan nanserbiyanda da ḵingwan Apudyus yaḵon daḵampun ḵan Apudyus we nangwa'tta losane siya madaydayaw aḵ inggana. Amen.

Te aḵ Apudyus ad langit, impaigammuna sangana'tta adipun andayaw ḵan siya ya da angwa'ḵ lawweng. Te sa ḵinalawengda anupod si mipaigammuwan ni ḵatuttuwaan.

Sana gapunae iwwaḻang Apudyus dida ta ḵoonda da ḵababbaine pion da long-agda. Te da udume bubai itanungda adaḻugon da asimbubaidae daḵampun oḵyan aḵ maḵwa. Ḵad isuna bos atta laḻaḵi, daḵampun atta bubai adaḻugonda yaḵon siya maawisan ni giḵnada da asillaḻaḵida. Pun aaddi ye awatonda dusae labbongnae maatod ḵan dida te ḵaissaw da ḵooḵoonda. Gapu'tte adidapun namigbigan ḵan Apudyus, iwwaḻangna dida ta iturayan da lawwenge somsomoḵda dida ta ḵoonda da baḻangnae daḵampun oḵyan aḵ maḵwa.

Ḵanandae nalaingda yaḵon nambalinda'ḵ dong-og. Te adidapun nandayaw si matattagu we Apudyus. Yaḵon siya dinaydayawda da ḵingwan di tagu we sinan-apudyus, sinantatagu, sinansissiwit, sinan-ayam ya da ḵais-isun da ḵumayam.