Quechua, Northern Conchucos Ancash - 2006 Edition (NT) Drama

Quechua, Northern Conchucos Ancash - 2006 Edition (NT)

Imapis manaraq kaptinmi Diospa Palabran kaykarqanna.
Payqa Dios Yayawanmi kaykarqan.
Payqa Diosmi.
Qallananpitam Dios Yayawan kaykarqan.
Paywanmi llapan imaykatapis Dios Yaya kamarqan.
Llapan kay patsachö kaqkunam pay kamanqan.
Paychömi mana ushakaq kaway kaykan.
Tsay kawaymi runakunapaq aktsi.
Tsay aktsim tutapaychöpis alläpa atsikyan.
Tutapaypis tsay aktsitaqa manam upitsintsu.
Juk runam Juan shutiyuq karqan. Paytam Dios Yaya kacharqan willakuptin llapan runakuna tsay aktsiman creyiyänanpaq. Juanqa manam tsay aktsitsu karqan, sinöqa tsay aktsipaq willakuqllam.
Rasunpa kaq aktsiqa llapan runakunatam aktsipan.
Paymi kay patsaman shamushqa.
Kay patsachö kaykaptinpis y kay patsata kikin kamashqa kaykaptinpis runakuna manam payta reqiyarqantsu.
Kuyanqan runankunaman shamuptinpis manam chaskiyarqantsu.
Peru payman creyikur chaskiqkunatam sïqa wamrankuna kayänanpaq Dios Yaya qorikun.
Manam mamanpita yuriyanqanpitatsu
ni runapa tsurin kayanqanpitatsu Dios Yayapa wamran kayan,
sinöqa Dios Yayapita yurishqa karmi.
Diospa Palabran kay patsaman shamurmi runanö yurirqan.
Noqakunawanmi kay patsachö purirqan.
Dios Yayapa japallan Tsurin kaptinmi poderyuq kaykaqta rikäyarqä.
Llakipäkuq y rasun kaqllata parlaqmi karqan.
Paypaqmi Juan willakur nirqan: <<Tsay runapaqmi noqa nirqä: Qepäta shamuqqa noqapita mas poderyuqmi. Payqa manaraq yuriptïmi kaykarqanna>>.
Payqa alläpa kuyakuq karmi llapantsikta imaypis llakipämantsik.
Leyninkunataqa Moiséswanmi Dios Yaya willakatsirqan.
Peru llakipäkuq kayninta y rasunpa kaq willakuynintam sïqa Jesucristuwan tantiyatsimashkantsik.
Manam ni pipis Dios Yayataqa ni imaypis rikashqatsu.
Peru japallan Tsurinmi sïqa, Dios kar y Dios Yayawan jukllaylla kar, Dios Yaya imanö kanqanta musyatsimashkantsik.


Juan pï kanqanta tapuyänanpaqmi sacerdötikunatawan levitakunata Jerusalén autoridäkuna kachayarqan. Tapuyaptinmi Juan nirqan: <<Rasun kaqtam niyaq: Noqaqa manam Cristutsu kä>>.
Tsaymi yapay tapuyarqan: <<Tsaypunqa ¿pitan kanki? ¿Profëta Elíasku?>>
Juannam nirqan: <<Manam Elíastsu kä>>.
<<Tsaypunqa ¿shamuqpaq kaq profëtaku kanki?>>
Niyaptinmi nirqan: <<Manam tsay profëtatsu kä>>.
Tsaymi niyarqan: <<Tsaypunqa ¿pitan kanki? Kachamaqnïkunata willayänäpaq pï kanqaykitapis willayämay>>.
Juannam nirqan: <<Profëta Isaías qellqanqanchömi nin: <Juk runam desiertuchö qayakuypa willakur ninqa: <<Dios Yaya shamunanpaq wiksu nänita derechayay>> >. Tsay willakuq runam noqa kä>>.
Kachayanqan fariseukunam Juanta niyarqan: <<Cristo ni Elías ni shamuqpaq kaq profëtapis mana kaykarqa ¿imanirtan runakunata bautizanki?>>
Juannam nirqan: <<Noqaqa yakullawanmi bautizä. Peru kaychönam mana reqiyanqayki runapis kaykan. Paymi [noqapita mas puntata karpis] qepätaraq shamunqa. Noqaqa llanqinpa watunta paskanällapaqpis manam välïtsu>>.
Jordán mayu tsimpan Betaniachö runakunata bautizaykaptinmi Juanta tsaynö tapuyarqan.

Tsaypita waränin junaq Jesústa rikaskirmi Juan nirqan: <<¡Kaymi Dios Yaya kachamunqan Cordëru! Paymi runakunata jutsankunapita perdonanqa. Tsay runapaqmi noqa nirqä: <Qepäta shamuqqa noqapita mas poderyuqmi. Payqa manaraq yuriptïmi kaykarqanna>. Noqapis manam musyarqätsu Dios Yaya kachamunqan pay kanqanta. Peru imanö kaptinpis Israel runakuna payta reqiyänanpaqmi runakunata bautizaykä>>.
Mastam Juan nirqan: <<Noqam rikashkä imayka palumanö Espíritu Santu ciëlupita urämur payman ratämuqta. Manaraq tsayta rikarqa manam musyarqätsu Dios Yaya kachamunqan kanqanta. Peru yakuwan bautizanäpaq mandamarmi Dios Yaya nimarqan: <Mayqan runapa jananmanpis Espíritu Santu palumanö rataqta rikarmi musyanki Espíritu Santuwan bautizakunanpaq kanqanta>. Tsay nimanqannöllam tsay runapa jananman Espíritu Santu palumanö rataqta rikashkä. Tsaymi willayaq Dios Yayapa Tsurin pay kanqanta>>.

Tsaypa waränin junaqmi ishkay discïpulunkunawan Juan kaykarqan. Jesús päsaykaqta rikaskirmi nirqan: <<¡Rikäyay! ¡Dios Yaya kachakamunqan Cordërum päsaykan!>>
Tsaynö ninqanta wiyarmi Juanpa ishkay discïpulunkuna Jesúspa qepanta aywayarqan. Tumaykurmi qepanta aywaykäyaqta Jesús rikarqan. Tsaymi nirqan: <<¿Pitatan ashiyanki?>>
Paykunanam niyarqan: <<Rabí, ¿maychötan patsakushkanki?>>
(Rabíqa yachatsikuq ninanmi.)
Jesúsnam nirqan: <<Aku, reqitsiyäshayki>>.
Tsaynö nirmi maychö patsakunqantapis reqitsirqan. Tardiyaykaptinnam tsay ishkay discïpulukuna tsayllachöna Jesúswan quëdakuyarqan.
Tsay ishkay discïpulunkunapita jukaqmi karqan Simón Pedrupa wawqin Andrés. Paymi Juan ninqanta wiyar Jesúspa qepanta aywarqan. Tsaypita Andrés aywarmi wawqin Simón kaqman chaykur willarqan: <<¡Mesíaswanmi tinkuyashkä!>>
(Mesíasqa Dios Yaya kachamunqan Cristo ninanmi.)
Tsaypitanam Jesús kaqman pusharqan. Chaykuptinnam Simónta rikaykur Jesús nirqan: <<Qamqa Jonáspa tsurin Simónmi kanki. Kananpitam Cefasna shutiki kanqa>>.
(Cefasqa Pedro ninanmi.)

Tsaypita waränin junaq Galileapa aywaykarmi Felipiwan tinkuskir Jesús nirqan: <<Aku aywashun>>.
Felipiqa Betsaida markapitam karqan. Andréswan Pedrupis tsay markallapitam kayarqan. Tsaymi Natanaelman aywaykur Felipe nirqan: <<¡Moisés y wakin profëtakunapis Cristo shamunanpaq qellqayanqannöllam shamushqa! ¡Paywanmi tinkuyashkä! ¡Paymi Nazaret markapita Josépa tsurin Jesús!>>
Natanaelnam nirqan: <<Nazaretpita ¿pillaqa alli runa kanmantsuraq?>>
Felipinam nirqan: <<Aku rikänaykipaq aywashun>>.
Natanael chaykaqta rikaykurmi Jesús nirqan: <<Kay runam sïqa rasunpa Israel runa. Payqa manam imatapis llullakuntsu>>.
Tsaynö niptinnam Natanael tapurqan: <<¿Imanöpatan reqimashkanki?>>
Jesúsnam nirqan: <<Felipe manaraq qayashuptikim hïgus jacha chakinchö jamaraykaqta rikashkaq>>.
Tsaynö niptinmi Natanael nirqan: <<Rabí, ¡qamqa Dios Yayapa Tsurinmi kanki! ¡Israel runakunapa mandakuqnin reymi kanki!>>
Jesúsnam nirqan: <<¿<Hïgus jacha chakinchö jamaraykaqtam rikashkaq> niptillaqku tsaynö nimanki? Tsaypita mas mantsakaypaq kaqkunataraqmi rikanki>>.
Tsaypitanam Jesús nirqan: <<Rasun kaqtam niyaq: [Kananpitam] ciëlu punku kichakaskiptin Dios Yayapa angelninkuna Runapa Tsurinman uraykämuqta y kutiykaqtam rikäyanki>>.

г сонсох Juan 1