Aromayi 12
12
Nyagbmi wyewyeyi nya
1Ntucenu, əmi azaje n əmi amapwii, mi tna fye əɓwa, ntu n Shekwoyi snusnugye ɓo, fye kwu əfye anayi ga n zhni nyagbmi wyewyeyi nya, n gyigyiyi, n əkwo əɓo da Shekwoyi; dəye nu zhni əfye mwamwaga hnihnii jesnu ceewoi nya. 2Fye to je anyì ye əfye vyi m, ama fye la əfye abwugba shnado ɓa kwu zè awoiwoyi. Nlonu n fye ɓa myi fya tumwi jesnu fya tuɓwa n əɓo n kwo zhni Shekwoyi ɓəye; əwo ɓəye manai, dadai jesnu n kwo nunui.
Tukwogba tnutnu dna n Kirisiti nayi
3Ntu ń shebmyashi ɓo ń a ncei ga mi nyi, mi gna zahozahoyi ń fye: To zhni əɓənubwo n du she kwo gwo ha zhni m, ama ń əkwoɓwi, zhni əhohni ɓənubwo n ədnai, vyi gaiciyaganunui ń Shekwoyi la gná ga zahozahoyi n fye nyi. 4N ɓwasnu she zahozahoyi ń yi, ń nayii gbmanyi nu, n agai mwa bəgyé, jesnu aga ye vnyanya, ɓa ta zhni tnutnu gbmanyigbmanyi nu m. 5Ntulonu dna ń Kirisiti, əyi, kwo shikwonyi, yi mwa bəgyé lo, yi zhni nayi gbmanyi nu, jesnu əga dəhodəhoi zhni aga aje vnyanya nya nu. 6Yi n anyagai lo gbowogbowo, vyi shebmyashi, n a ncei ga zahozahoyi n yi nyi. Ngye əho nyaga zhni sheɓəgwognayi dai nu, nlonu da sheɓəgwogna, she əho gaiciyaganunui lo. 7Ngye tnutnuzhni ga aza nu, akpəge ho zhni tnutnu; ngye kwo zhni nyawu nu, akpəge ho wunya; 8ngye kwo zhni aza bwugbakalafyi nu, akpəge ho fyi aza bwugbakala. Ngye kwo zhni n nyagaga nu, akpəge ho ganya n əɓwai loloiya; ngye kwo zhni gnabyezhni nu, akpəge ho zhni kwo n əwyei bmyibmyii; ngye kwo zhni snusnugyewu nu, akpəge ho wu kwo n bwugbadai.
Yeyewu dna n əkwo tnutnuzhni
9Ɓəshishi nu yeyewu kwaa zè ədu gbmanyi ɓəzhni. Wnunu n nukwoi; la gyima ń əɓo n kwo zhni manai. 10Fye kwu əfyehni ga fyi ń aje akwnu dna ń yeye. Əza wo ga əwo ədo mwamwa n du əwohni. 11Fye to kwu zhi ntna wyenyi m, ama fye kwu əfye yeyewu zafnu shiɓwa kamkam, fyei zhni Dagayi tnutnu. 12Fye dagbma fyi ń awyetu, fye ɓwa bwugba fyi n azhnìgye, fya kwu zhni a gbenuyi fyi ń aduwazhni. 13Fye ce anya ga Dagayi aza n ɓa fyilo n snagyi. Fye zhni fyei gwo azhiɓeyi n yeyei.
14Fye kpe aza yi anabəlika ń ɓa she fye wyena nyi; fye kpe ɓa anabəlika nu, fye to kpe ɓa aknyi m. 15Fye dagbma n aza yii n ɓa dagbma; fye zhni bwugbazhii n aza yii ń ɓa fyi n bwugbazhii. 16Fye gyianyì n əɓwai dnado n ajei. Fye to mwa əfyehni tukwo m, ama fye ye azaje nabai fya kwnu asese n aza yii n ɓa gbàgbài. Fye to kwu nu zhi n tukwomwai m.
17Fye to gba nukwoi əta n nukwoi m. Fye zhni pəceye fya zhni əɓo n kwo bmya n zahozahoyi awyeba. 18Ngye kwo ɓa yezhni, shikwonyi kwo vyi shi fye wu nu, fye gyianyì n bwugbafui n zahozahoyii. 19Fye to gbaɓota m, əmi anugwnudo ayeyeyi, fye la aba ga ntu Shekwoyi minagyi napyei ɓo, ntuge kwo kafyilo: “Tagba zhni əmi nya nu; Mi ɓə gbaɓota,” əɓo nu n Dagayi wa da. 20N əkwoɓwi:
“Ngye əho nuwnuyi gnyilo n myikwnui, ga wo nyagyi;
ngye nuwna myikwnu wo əwo lo, ga wo nyaho wa sni.
N fya zhni nlonu, fye ɓa gnyi fyei ye anakna kpe əfye nuwnuyi nu n tukwo.”
21Fye to fa nukwoi kwa gyi fye əsnu m, ama fye gyi nukwoi əsnu n manaii.
Селектирано:
Aromayi 12: GNB
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.