Luke 1
1
1మాన్ మోట్పణేతి ఛీజకో ఏ తెయొఫిలా, దేవేర్ వాత్ కేవాళ్ అగ్డీతీ ఆంకీభరన్ దేకన్ ఆపణేన హవాల కర్దీనెజుఁ,
2అపణ్ పచ్చ భర్పూర్ హుయెజె కామేవూర్ వడీ ఖోలన్ లకేన వార్సేక్ ఆద్మీ ఆంగ ఆయె.
3జేతి తోన ఉపదేష్ కీదే జకో సే సాసీజ్ చాల్గే కన్ తూఁ మాలమ్ కర్లేన, ఏసేన అగ్డీతీ జతనేతి ఢూండన్ ఖోలన్ మాలమ్ కర్లీదొ జకో మ సదా,
4తార్ నామేపర్ ఉందేర్ కార్ణే హారీతి లకేరొ ఆచో కన్ మ కేల్దో.
5యూదయ మల్కేర్ రాజ్ ఛజకో హేరోదేర్ దాడూమా ఆబీయార్ హారీమా రజకో జకర్యా కజకో ఏక్ యాజక్ వేత్తో. ఓర్ గోణ్ణీ అహరోనేర్ బేటియూమా ఏక్; ఓర్ నామ్ ఎలీసబెత్.
6ఏ దోయీ ప్రభూర్ సొగ్ళీ హకమేవున పక్డనన్ న్యాయేన పక్డన్ దోష్ ఛేనిజూఁ చాల్తే, దేవేర్ నంజ్రేమ నియతేతీ రే.
7ఎలీసబెత్ వాంజ్డీ వేన్ రజేతి ఉందేన ఛచ్యాబర్ హుయేకొని; ఉజ్జీ ఓ దోయీ ఘణ్ దాడేర్ బూడే వేన్ ర.
8జకర్యా ఓర్ హాఁసేర్ హారీన పక్డన్ దేవేర్ ముణాంగ యాజకేర్ కామ్ కర్తోరజనా,
9యాజకేర్ మలాజేన పక్డన్ ప్రభూర్ దేవళేమా జాన్ సుగందేర్ ధూఁవాడి ఘాలేరో ఓర్ హాఁసేన ఆయి.
10ధూఁవాఁడి దేర్ వక్తే పర జనూర్ మళావొసారి బార అరజ్ కర్రేజనా.
11ప్రభూర్ సోజా ధూఁవాడీర్ పీడార్ జమ్ణేవడి హూబ్రేన్ ఓన దకావ్తేఖమ్
12జకార్యా ఓన దేకన్, ఘబ్రాన్ చమక్ గో.
13జనా, ఊ సోజా ఓతి - జకర్యా చమక్ మత్. తార్ అరజ్ దేవ్ సామ్ళోచ. తార్ గోణ్ణీ ఎలీసబెత్ తార్ సారు ఏక్ బేటాన జణచ. ఓన యోహాన్ కన్ నామ్ పాడీస్.
14-15ఊ "ప్రభూర్" నంజరేమా మోటొవేన్, అంగూరేర్ రస్ క దారుక నపియజుఁ రేన్, ఓర్ మాయేర్ పేటే మాఁయిఁతీ హుయొ జన్నాతీ, పవిత్తర్ ఆత్మాతీ భరాన్ రచ,
16ఇశ్రాయేలేవాళూమా వార్సేకేన "ప్రభూ" ఛజకో ఓర్ దేవేర్ సామ్ ఫేరచ.
17ఉజ్జీ ఊ బాపేర్ దల్లేన ఛచ్యాబరే సామ్, వాత్ మానేనీజేన నీయత్ దారేర్ జ్ఞానేన పక్డన్ జాలజూఁ ఫేరన్, "ప్రభూర్" వాస దేక్తే రజే జనూన తయ్యార్ కరేన ఏలీయార్ ఆత్మాతీన్ జోరేతీ ఊ ఓర్ ఆంగ జావచ, జేతి తోన ఘణ్ ఖుషీన్ అస్మాన్ ఆనంద్ వచ. ఊ హూయొ జేతి ఘణ్ జనూన ఖషీవేజాచకన్ కో .
18జకర్యా – ఈ, మన కూఁ మాలమ్-వ? మ, బూడో ఛూఁ, మార్ గోణ్ణీ సదా ఘణ్ బూడ్ వేన్ ఛకన్ ఊ సోజాతి కోజనా
19ఊ సోజా – మ దేవేర్ ముణాంగ హూబ్రూఁ జకో గాబ్రియేల్ ఛూఁ, తాతీ వాతే కరేనన్ ఈ ఆచ్ ఖబర్ తోన మాలమ్ కరేన మన మేలోచ.
20ఉజ్జీ మార్ వాతే ఓర్ వకత్ ఆవజనా చాలచ. తూఁ ఏ వాతేన విశ్వాస్ కీదొకొని జేతి ఏ వాతే చాల జకో దాడ్ ఆవజే తాణీ తూఁ వాతే నకరస్ జుఁ గూంగో వేన్ రీస్ కన్ ఓనకో.
21జకర్యార్ వాస, జన్ దేక్తేరేన్, దేవళేమా ఊ వేళా లగాడో జేతి అప్సోస్ వేగె.
22ఊ బార ఆయొజనా ఉందేతి వాతె కర్సకోకోని జేతి దేవళేమా ఓన దర్శ ణ్ హుయో కన్ మలమ్ కర్లీదే; జనా ఊ శాన్ కర్తో, గూంగో వేన్ ర
23ఓర్ సేవా కరేర్ దాడ్ పూరోవేగే జనా ఓర్ ఘరేన డగర్ గో.
24ఓ దాడ్ వేగె జేర్పచ్చ, ఓర్ గోణ్ణీ ఎలీసబెత్ పేటేతీ వేన్ –మన్క్యాఁవుమా మన రజకో నామర్దాన కాణ్ణాక్ణో కన్
25ప్రభు మార్ ఊంపర్ మేర్వాని కీదోచ కేలేన్ పాంచ్ మీనాలగు దూస్రేర్ ఆంకీమా నపడజూఁ రీది
26ఛోమో మీనామా గాబ్రియేల్ కజకో దేవేర్ సోజా గలిలయ మల్కేర్ నజరేత్ కజకో గామేమా
27దావీదేర్ వలాదేరో ఛజకో యోసేప్ కజకో ఏక్ ఆద్మీతి సగాయి కర్మేలె జకో కుఁవార్ ఛోరీ కన, గబ్రియేల్ కజకో సోజాన దేవ్ మేలో. ఓ కుఁవారీర్ నామ్ మరియ.
28ఊ సోజా మాఁయిఁ ఆన్ ఓన దేకన్ – దేవేర్ దయా పాల్ది జకో, తోన ఖొసళ్ వచ; "ప్రభు" తార్ సాత్ ఛ కన్ కో,
29ఊ ఓ వాతేన సామ్ళన్ ఘణ్ ఘబ్రాన్ – ఈ ఖోసళేర్ వాత్ కాఁయిఁకో కన్ సోంచ్ కర్రీజనా
30దేవేర్ సోజా – మరియా, చమక్ మత్, దేవేర్ మేర్ తార్ ఉంపర్ ఛ.
31ఇదేక్ తూఁ పేటేతీవేన్ బేటాన జణన్ ఓర్ నామ్ యేసుకన్ పాడీస్.
32ఊ మోటోవేన్ సొగ్ళీ శక్తిమాన్ ఛజకోదేవేర్ బేటా కన్ కెరావచ; ప్రభూ ఛజకో దేవ్ ఓర్ బాప్ ఛజకో దావీదేర్ తక్తాన ఓన దచ.
33ఊ యాకోబేర్ వలాదే వాళూన జగు జగులగు హమేషా పాలణ్ కరచ. ఓర్ రాజ్ అంత్ ఛెనిజుఁ రచ కన్ ఓన కో.
34జేతి మరియ – మ కుఁవార్ ఛోరీ ఛుఁ; ఈ కూఁ వచ కన్ దేవేర్ సోజాన పూచ్తేఖమ్,
35సోజా –పవిత్తర్ ఆత్మా తార్ ఉంపర్ ఆవచ; సేతి ఊంచ ఛజేర్ శక్తి తోన బూర్దచ జేతి వేవాళో ఛజకో బాళా పవిత్తర్ వేన్ దేవేర్ బేటాకన్ కేరావచ.
36ఉజ్జీ తార్ పామణ్ ఛజకో ఎలీసబెత్ సదా ఓర్ బుడాపూమా ఓర్ పేటేమా ఏక్ బాళాఛ, వాంజ్డి కన్ కజకో. ఓన అబ ఛోమో మీనా.
37దేవ్ కజకో కుణ్సీ వాత్ ఠాల్ వేనీ కన్ ఓనకో.
38జేతి మరియ – ఇదేక్ ప్రభూర్ దాసీఛూఁ; తార్ వాతేర్ నైఁ మన వేజాయెద కన్ కీ. జనా, సోజా ఓర్ ఢైఁ తీ డగర్ గో.
39ఓ దాడూమా మరియ ఊటన్ యూదార్ మల్కే మా రజకో గట్లార్ జాగేమా ఛజకో ఏక్ గామేన జల్ది జాన్
40జకర్యార్ ఘరేమా జాతాణీ ఎలీసబెతేన నమస్కార్ కీదీ.
41మరియార్ నమస్కారేర్ వాత్ ఎలీసబెత్ సామళ్తేఖమ్, ఓర్ పేటేమా ఛజకో బాళా కూదో. జనా ఎలీసబెత్ పవిత్తర్ ఆత్మాతీ భరాన్ జోర్తి హనూకీ
42– బీరేవుమా తూఁ ఆశీస్, పాల్ది జకో ఛీ, తార్ పేటేర్ ఫళ్ సదా ఆశీస్ పాలచ.
43మార్ ప్రభూర్ యాడి మార్ ఢైఁ ఆయేరొ మన కత్రాఆచో
44ఇదేక్, తార్ ఖోసళేర్ వాత్ మ సామళ్తేఖమ్, మార్ పేటేమా ఛజకో బాళా ఆనందేతి కూద్ ఊటో.
45ప్రభు ఓన మాలమ్ కరాయొ జకో వాతే చాలచ, హనూకన్ విశ్వాస్ కీదీజకో ఊ నసీబ్ దాణ్ కన్ కో.
46జనా మరియ హనూకీ – మార్ దల్ ప్రభూన మహిమా కర్రోచ .
47ఓర్ గరీబ్ దాసి ఛూఁజే మన ఊ మేరేతీ దీటో.
48మార్ ఆత్మా, మన రక్షణ్ దేవాళొదేవేర్ వడి ఆనందేతిఛ
49సొగ్ళీ శక్తిమాన్ ఛజకో మార్ వాస మోటే కామ్ కీదో జేతి అబ్బేతి లేన్ సే పీడి వాళ్. మన నసీబ్ దాణ్ కన్ కచ. ఓర్ నామ్ పవిత్తర్.
50ఓతీ చమ్కేవాళేర్ ఉంపర్ ఓర్ మేర్ పీడీ పీడీలగు రచ.
51ఊ ఓర్ హాతేర్ జోర్ దకాళచ, ఉందేర్ దల్లేర్ సోంచేర్ కార్ణే గర్బెతి రజేన ఛీంట్ ఛాంట్ కర్దీనో.
52తక్తా ఉంప్రేతీ జోరేవాళూన పటక్దేన్ కమ్ జోరేవాళూన తక్తా పర్ చడాయొ.
53భూకేతి రజేన ఆచ్ ఖోరాకీతీ ధపాడన్, ధనేవాళూన ఠాలే హాతేతీ మేల్దీనో.
54అబ్రాహామేనన్ ఓర్ వలాదే వాళూన జగ్ బూడజేలగు ఓర్ మేర్ దకాళన్ హర్దె లాలూంచుఁకన్.
55ఊ అపణ్ వడ్బూడేతికోజూఁ ఊ ఓర్ సేవా కరేవాళోఛ జకో ఇశ్రాయేలేన మద్దత్ కీదో.
56జనా మరియ కమ్ జాపా తీన్ మీనా ఓర్ ఢైఁ రేన్ పచ్చ ఓర్ ఘరేన డగర్గీ.
57జణేర్ దాడ్ ఆయెజనా ఎలీసబెత్ బేటాన జణీ.
58జనా ప్రభు ఓర్ ఉంపర్ ఘణ్ మేర్ రకాడో కన్ ఓర్ అగల్ బగలేవాళన్ ఓర్ పామణే వాళ్ సామ్ళన్ ఓతీసాత్ ఖుషీ వేగే.
59ఆట్మో దాడేన ఓ ఊ బాళకేన సున్నత్ కరాయేన ఆన్, బాపేర్ నామేన పక్డన్ జకర్యాకన్ కజకో నామ్ పాడేన జారేజనా,
60ఓర్ యాడి – ఈనామ్ మత్; ఓన యోహాన్ కన్ నామ్ పాడో కన్ కీ.
61జేతి ఓ – తార్ పామణేవాళూమా అసో నామేవాళో కోయిఛెని కన్ ఓన కేన్
62ఓన కాఁయిఁ నామ్ పాడుఁ కన్ కేలేరోచీ కన్ ఓర్ బాపేన శాన్ కరన్ పూచె.
63ఊ లకేర్ పల్కా లాకన్ కేన్ – ఓర్ నామ్ యోహాన్ కన్ లకో, జేతి ఓసే అప్సోస్ వేగే
64జన్నాజ్ ఓర్ మూండో ఉగ్డన్, జీబ్ ఢీల్ వేన్, ఊ దేవేన స్తుతి కర్తో వాతే కరేనలాగ్గో.
65ఓర్వాస ఉందేర్ అగల్ బగల్ రజేన సేన డర్ లాగ్గో, ఓ వాతేసే యూదయార్ గట్లర్ సారీ మల్కేమా మాలమ్ వేగీ.
66ప్రభూర్ హాత్ ఓర్ సాత్ రజేతి, ఓ వాతే సామ్ళేజకో సే – ఈ బాళక్ కసేకో వచకో కన్ కేన్ ఓ వాతేన ఉందేర్ దల్లేమా రకాల్డీదే.
67ఉజ్జీ ఓర్ బాప్ జకర్యా పవిత్తర్ ఆత్మాతీ భరాన్ హనూ ప్రవచన్ కో –
68ప్రభు ఛజకో ఇశ్రాయేలేర్ దేవ్ స్తుతి పాలియ. ఊ ఓర్ జనూన దర్శణ్ దేన్ ఉందూన ఛోడాయో .
69ఓర్ సేవా కరేవాళోఛజకో దావీదేర్ గోతేమా ఆపణే వాస ఏక్ జోరేవాళో రక్షకేన కతో
70ఓర్వడీతి అగ్డీతి ఓర్ పవిత్తర్ ప్రవక్తాఁవుతి కోజకో వాత్ కాఁయిఁకతో
71అపణ్ దుష్మణూతీన్, వ్యారియూఁర్ హాతే మాఁయితీ ఛోడాఁవుచుఁ కన్ వాత్ దీనో.
72ఊ అపణ్ వడబూడేన మేర్ దకాళేనన్ ఓర్ పవిత్తర్ కరారేన హర్దే లావుఁచుఁ కన్ ఊ కో.
73ఊ ఆపణ్ బాప్ అబ్రాహామేతీ కరార్ కరన్,
74ఆపణేన ఆపణ్ దుశ్మణూతీ ఛోడాయెన ఆపణ్ డర్ ఛేనిజుఁ
75ఓర్ సేవా కరేన అపణ్ బంచాఁ జేతాణి ఓర్ ముణాంగ నేకేతీ పవిత్తరేతి రేన, ఆపణేన మదత్ కరుఁచుఁకన్ సోగన్ ఖాన్ కో.
76ఉజ్జీ ఏ బాళా, తూఁ దేవేర్ ప్రవక్తా కన్ కేరాయీస్.
77అపణ్ దేవేర్ ఘణ్ ప్రేమేర్ కార్ణే ఉందూర్ పాపేన మాఫ్ కీదో జేతి,
78ఓర్ జనూన ఊ ఖోసళేర్ గ్యాన్ దజూఁ ఓర్ వాట్ తయార్ కరెన తూఁ ప్రభూర్ ముణాంగ చాలిస్
79ఆపణ్ పగేవున శాంతీర్ వాటే మాఁయిఁ చలావజుఁ, అందారేమాఁయిన్ మ్వోతేర్ ఛేండీమాఁయి బేటేజేన వజాళో దేన, ఓ ఘణో ప్రేమేర్ కార్ణే ఊంచేతి ఊ అప్ణేన సూరజేర్నాయిఁ దర్శణ్ దీనొ
80బాళక్ వదన్ ఆత్మామా జోర్ పాన్ ఇశ్రాయేలేన దకావజె దాడేలగు జంగలేమా రో.
Селектирано:
Luke 1: Lambadi
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, The Bible Society of India
All rights reserved