मत्ती 12
12
ना:सिने छ्यामका प्रभु
मर्कुस २:२३-२८; ३:१-६; लुका ६:१-११
1नो बेलाकं ना:सिने डिन छ्याम येसु अन्न लेव ये:ङलाग्यान ओनाज़्याकं उसिसरं करेडे यालिज़्याव होकाम बाला फ्यावग्यान कोयोग्यान याडोव। 2होकाम फरिसीराई आव र:ङडे येसुलाई ऐ याडोव, “गर:ङके आला नसिसराई ना:सिने डिन छ्याम न्यामये जोज़ डाने माटाये, वार्ये होज़ याडोज़्याव।” 3होकाम येसुये नोरंलाई हैओडोवरं, “डाउडये ओल सोनो ओल्स बोलोङ लेनेरं याकरेकं कडि ओझोयो, जे जेपरिव माले डोरो? 4कैजैडे नोये परमेस्वरलो उज़ी:मलं पसिडे चरैसिव बरे ओज़्येव? नो न्यामलो उबिरोडलं लेव, नो बरे न ओल ज़्याने टा न ओल्स लेनेराई ज़्याने टा नोके सेवा डोने मीराई मान्त्राज़ ज़्याने टाये। 5कडा जे सास्त्र जेम्परिये, कैजैडे ना:सिने डिन छ्याम सेवा डोने मीराई प्रार्ठना डोने ज़ी:मलं ना:सिने डिनलाई झुठा याझैकं पनि नोरं डोसि माठरिरंये। 6होकाम ङा जेलाई हैङाडाच्यो, प्रार्ठना डोने ज़ी:म भन्डा बनै घ्योव आकं टोबो लिज़्या। 7होसोनो, ‘ङा के बलिडान माङ्क, डया ची ङामन लागिये’ वार्नेलो ओमाने कडि वार्डे हो जे जेसनखिन जे ओडोस मालेवलाई ओडोस सतन्ने जेमलेव। 8कडालेकं मानवालो ओज़ा ना:सिने डिन छ्यामका पनि प्रभु ची।”
उकुइ स्याङो मी ओसोमो
मर्कुस ३:१-६; लुका ६:६-११
9नलाम पुलुडे येसु यहुडीरं प्रार्ठना डोने ज़ी:मलं ओनाव। 10नलं टोबो उकुइ स्याङो मी लेव। नोराई येसुलाई डोसैने युङ डाडे येसुलाई यापजोयो, “ना:सिने डिन छ्याम कोइलाई ससम्ने ठीकं टाये सै माटाये?”
11येसुये नोरंलाई हैओडोवरं, “जे भरिलाम कोइलो टोबो ओभेडा याले भने, होकाम ना:सिने डिन छ्याम हो भेडा खाल्टालं याटे: भने, नोये नो भेडालाई क्योडे पाखाडे जेम्पुलैये डोरो? 12भेडा भन्डा मी के खा बनै भ्या घ्योव टाये! हैजैडे ना:सिने डिन छ्याम चाव ये:न डाने ठीकंज़ ले।” 13होकाम येसुये नो मीलाई हैओडोव, “नकुइ सटन।” नोये उकुइ ओसोटोनो, होकाम नोलो उकुइ छुटं उकुइ स्याव चाव ओटाव। 14होकाम फरिसीरं पाखाङ नाडे येसुलाई कैजैडे सै:ने वार्डे सल्ला याडोव।
परमेस्वरये उरुजिव सेवा डोने मी
15होकाम नो रो: ठा सन्डे येसु होलाम ओनाव, येसु ओनाकं भ्या मीरं येसुलो उझिन्ट यानाव, होकाम येसुये नो ठलिव स्यान्टैरंलाई ओससोमोरं, 16होसोनो येसुये नो काङ्का वार्डे काङ्कालाईज़ हैटाडाच्यो वार्डे नोरंलाई ओसम्झोयोरं। 17यसैया अगमबक्ताये हैओवारो बचंन पुरा टानेलो लागिटंज़ ऐटाव ओटाव, 18“ङानौकर जोलाई ङा रुजिडे ङानै, नोके ङायुङ्का ची जोसं ङा बनै खुसि ङाले, ङा ङाआत्मा नो लेवटं नैड्यानेङाले, होकाम नोये यहुडीरंकाम यहुडीरंकाम उरुका मीरंलाई ङाडोव नियाला रो:लो ओबारेलं हैडानेरंले।#यसैया ४२:१-४ 19नोये झगरा पनि डाने माले, कस्सिडे कि:ने पनि माले, नोलो ओगा काङ्कायेज़ येमयालं ठैने मालेरं। 20पाव ज़ि:ङ नोये के:ने माले, होसोनो वु:र-वु:र चाङज़्याव भाङलाई नोये सै:ने माले, होकाम आखिरलं नोये सत्यालाई सझ्याङने ले। 21होकाम स्यान्टै मीराई याआस नो लेवटंज़ टानेले।”
येसु सोनो बालजिबुल
मर्कुस ३:२०-३०; लुका ६:४३-४५; ११:१४-२३
22होकाम येसु लेवकं टोबो ओया मापाङने सोनो उमिलङ मार:न्ने टोबो ज़्या: लागिव मीलाई यारोयो। येसुये नो मीलाई ओससोमो, एटाव समं ओटाव, नो लाटा मी पाङने सोनो र:ङने ओटाव। 23होकाम स्यान्टै माहुले मीरं अचम्ब टाडे ऐ यावारो, “होकाम आव डाउडलो ओज़ाज़ रो?” 24आव रो: ठैडे फरिसीराई हैयावारो, “आव मीये ज़्या:राई यासे:र बालजिबुललो ओसक्तिये मान्त्राज़ ज़्या:रंलाई खेपोयोरंये।” 25होकाम येसुये नोराई यायुङला रो: ठा सन्डे नोरंलाई हैओडोवरं, “याखार्ल फुट पसिव राज्यारं भ्या टिकिने मालेरं, होसोनो स्यान्टै सहर सोनो ज़ी:मलं फाटो यापसिखे भने चित्राङ नि पुत्राङ टानेलेरं। 26हैजैडे सैतानये सैतानलाई याहायो भने, नोरं चित्राङ नि पुत्राङ टारंये, होकाम नोलो ओराज्या कैजैडे टिकिडु? 27होकाम ङा बालजिबुलङाम ज़्या:रं ङाखेपैरंखे भने, जे जेज़ाराई काङ्कालो ओसक्तिये नो माचाव आत्मारं खेपैरं? हैजैडे नोराईज़ जे जेनिया डोने लेरं। 28हैजैडे ङा परमेस्वरलो ओआत्माङाम ज़्या:रं ङाखेपैरंखे भने परमेस्वरलो ओराज्या जेलेवकं केरिडे ले।” 29“ङा:डे बल्ल्या मीलाई माकिया समं, नोलो उज़ी:मलं पसिडे काङ्काये नोलो ओढन माल लाङडे नाव ढुवो? नो बल्ल्या मीलाई किडेयाज़ नोलो उज़ी:म लुटिव डोयो।” 30“जो ङासं माले नो ङाबिरोडलं ले, होसोनो जोये ङासं माडुपो होये ओडोयोये। 31हैजैडे ङा जेलाई हैङाडाच्यो, मीराई याडोव स्यान्टै पाप सोनो परमेस्वरलाई डोस यालोयो छेमा टानेले, चोखो आत्मालो उबिरोड डाडे डोस लैसिव छेमा टाने माले। 32कोइराई मानवालो ओज़ालो उबिरोडलं जो ओपाङनि पनि नोलाई छेमा टानेले, चोखो आत्मालो उबिरोडलं यापाङरंखे भने नोरंलाई आव जुगुलं सोनो राने जुगुलं पनि छेमा टाने माले।”
सिङ सोनो ओसै
लुका ६:४३-४५
33“सिङलाई चाव जेजैखे भने ओसै पनि चावज़ टानेले। सिङलाई माचाव जेजैखे भने ओसै पनि माचावज़ टानेले। कडालेकं ओसैटामज़ सिङलाई सरे:सिये। 34ए गुललो ओज़ारं! जे जेज़ बलेवो जिलिज़्या, चाव रो: कैजैडे जेपाङडु ड? कडालेकं युङलं लेव रो:रंज़ या:लाम पुलुये। 35चाव मीये चाव उयुङलाम चाव रो:ज़ पुलुयोये, माचाव मीये माचाव उयुङलाम माचाव रो:ज़ पुलुयोये। 36ङा जेलाई हैङाडाच्यो, मीराई यापाङो स्यान्टै सोजोका मालेव रो:राई याहिसाप निया टाने बेलाकं योवरं परिये। 37कडालेकं नपाङो रो:राईज़ नङलाई बिना गल्ति ठहरैने लेरं होसोनो नपाङो रो:राईज़ नङलाई डोसि ठहरैने लेरं।”
अचम्बला ये:न र:ङने युङ
मर्कुस ८:११-१२; लुका ११:२९-३२
38होकाम न्याम पैने मी सोनो फरिसीरंलाम कोइ कोइराई येसुलाई हैयाडोव, “गुरबा गे के टोबो अचम्बला ये:न नडोव र:ङने गेयुङ लिज़्या।” 39येसुये नोरंलाई ऐ वार्डे जबाक ओयोवरं, बलेव सोनो ब्यभिचार डोने पुस्ताये अचम्बला चिन्न र:ङने युङ डोवये। आव पुस्तालाई योना अगमबक्तालो उचिन्न काम उरु छुटं चिन्न यासिने माले। 40कडावार्क योना घ्योव ङा:लो उफुलं सोङला सोनो सोङरी ओलेव मान्टि मानवालो ओज़ा पनि नामलो उज्युङलं सोङला सोनो सोङरी लेनेले। 41निनबेला मीरं निया टाने डिन छ्याम आव पुस्तासंज़ बोलोङ च्याङसिने लेरं, होकाम आवलाई डोसि ठरैने लेरं, कडालेकं नोराई योनालो ओप्रचार ठैडे यापापलाम यायुङ यासवोलो, र:ङच्यो, योना भन्डा घ्योव आकं टोबो लिज़्या। 42डछिनला घ्योव रानी पनि निया टाने डिनलं आव पुस्तासंज़ बोलोङ च्याङसिने ले, होकाम आव पुस्तालाई डोसि ठरैने ले, कडालेकं नो रानी नामलो होङा ओछ्योङाम सोलोमनलो उबुड्डिला रो: ठैने ओराव। र:ङच्यो सोलोमन भन्डा घ्योव आकं टोबो लिज़्या।
माचाव आत्मा ओवोल्क
43“होकाम जब माचाव आत्मा मीलो ओक्याङटाम पुलुडे नाये, नो ना:सिने सोपो पो यालं डुलिरिये, नोये पो काङज़ माडोयोये। 44होकाम नोये हैवार्य, ‘जोङाम ङा पुलुडे ङाराव, होङज़ ङा ङाज़ी:मलं वोल्डे ङाना।’ वोल्डे ओराकं नोये ज़ी:म रितो, सफा सोनो चाव झैडे नैसिव रो:ङोये। 45नो नाये होकाम ओल भन्डा पनि भ्या बलेवरं उरु सात गोटा माचाव आत्मारं ओल्स रोयोरंये, होकाम नोरं नो मीलो उज्युङलं पसिडे होलंज़ बासिरंये, होकाम नो मीलो ओडसा ङाडेङा भन्डा झिन्डे झन माचाव टानेले। आव माचाव बलेव पुस्तालाई पनि नेटावज़ टानेले।”
येसुलो वामा सोनो ओभाइरं
मर्कुस ३:३१-३५; लुका ८:१९-२१
46येसु माहुले मीरासं ओपाङज़्याव बेलाकंज़, येसुलो वामा सोनो ओभाइरं पाखाकं च्याङसिडे यालिज़्याव, नोरं येसुसं रो: डाने यापानज़्याव। 47होकाम टोबो मीये येसुलाई हैओडोव, “र:ङखेने नवामा सोनो नभाइरं पाखाकं राडे च्याङसिडे लेरं नङसं रो: डाने पानज़्यारं।” 48होकाम ओल्स पाङने मीलाई येसुये हैओडोव, “ङामा काङ्का? ङाभाइरं काङ्कारं?” 49होकाम येसुये उकुइये उसिसरंलाई सटन् हैओवारो, “र:ङच्योरं ङामा सोनो ङाभाइरं। 50कडालेकं जोये स्वर्गटा लिज़्याव ङाबाबुलो उइछ्या मानिवये, होरंज़ ङाभाइ सोनो ङाबैनी सोनो ङामा।”
Селектирано:
मत्ती 12: NTWMK25
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025