मती 20
20
अंगूरो री बाड़ी रा मजूर
1यीसु उणौनै कयौ, “सरग रौ राज उण जमीदार रै जैड़ौ है, जिकौ आपरी अंगूर री बाड़ी में मजूरो नै लगाणै रै सारू संवार में वेगो घर ऊं निकळै। 2उणै मजूरो रै साथै एक सिक्को रोज रौ तैय कीना अर उणौनै आपरी अंगूर री बाड़ी में भेजियां। 3संवार रा नौ बजे जद वो घर ऊं निकळनै दूजै लोगां नै बजार में बिना कांम करते ऊभा देखियां 4तो उणौनै कयौ, ‘थै ई म्हारी अंगूर री बाड़ी में जाओ अर कांम करौ म्हैं थांनै वाजिब मजूरी दे दूंला।’ 5इण वास्तै वे ई गिया भळै उण दोपार अर तीन बजे में ई बारै निकळनै व्यौंही कियो। 6अर वो जमीदार पांच बजे घर ऊं बारै निकळयौ अर उठै दूजौ नै ऊभा देखनै बोल्यौ, ‘थै एठै दिनभर निकमा क्यूं ऊभा हो?’ 7उणौ वीनै कयौ, ‘इण वास्तै की किणी म्हौ नै मजूरी ऊपर कोनीं लगाया।’ उणै उणौनै कयौ ‘थै लोग ई म्हारी अंगूर री बाड़ी में जाता रौ।’
8“सिंझया री वेळा अंगूर री बाड़ी रौ मालिक आपरै मुनीम नै कयौ, ‘मजूरो नै बुलायनै पछै आवण वाळौ ऊं लेयनै पैला आवण वाळौ तांई सगळौ नै मजूरी दे दो।’ 9उणनै उण मजूरो नै जिकौ पांच बजे कांम ऊपर आया, उणौनै एक-एक चांदी रौ सिक्को दियौ। 10तो जिकौ सैंगो ऊं पैला आया उणौ सोच्यौ की म्हौ नै घणा मिळेला, पण उणौनै ई एक-एक चांदी रौ सिक्को ही मिळियौ। 11जद रूपिया मिलनै रै पछै वे जमीदार ऊपर छिड़नै कैवण लाग्या, 12‘म्हौरै पछै आवण वाळा मजूरो नै कैवल एक घंटे भर ही कांम कियो। तो ई थै उणौनै म्हौरै बराबर कर दिया, जे म्हौ दिनभर कठोर मेनत कीं अर तावड़ो सहन कियो।’
13“उणै वीण में ऊं एक नै औ कैवतै जबाब दियौ, ‘हे भाई। म्हैं थौरे साथै अन्याव नीं कर रियौ हूं। कांई थै म्हारै साथै एक चांदी रै सिक्कै ऊं तैय कोनीं होया? 14थौरी मजूरी ले लौ अर जाओ। म्हैं थौरे पछै आवण वाळै मजूर नै भी थौरे जिती देणी चावूं हूं। 15म्हारै धन रै साथै म्हैं जे मरजी है वो करूं कांई इण बात रौ हक म्हनै कोनीं? म्हैं भलौ मिनख ऊं इण बात ऊं थूं बळण राखै है कांई?’ ”
16 #
मत 19:30; मरकु 10:31; लूक 13:30 फिर यीसु उणौनै कयौ, “इण रीत ऊं जिकौ लारै है वे आगै हो जावैला अर जिकौ आगै है वे लारै हो जावैला।”
आपरी मौत रै बारै में यीसु री तीजी भविसयवांणी
(मरकुस 10:32–34; लूका 18:31–34)
17यीसु यरुसलेम जातै वैळा बारैह चेलौ नै एकांत में लैय जायनै, अर मारग में उणौ ऊं कैवण लाग्यौ, 18“सुणौ, अपां यरुसलेम जाओ हो। अर म्हैं, मिनख रौ बेटौ परधान याजकौ अर सास्तरियों रै हाथ विसवास घात ऊं पकड़ायौ जावैला, अर वे म्हनै मौत री सजा सुणावैला। 19अर म्हनै दूजी जातियो रै हाथ सूंप दैला की वे म्हारी हंसी मजाक उडावै, अर कोड़ा ठोकै, अर सूली ऊपर चढ़ावै, लेकिन तीजै दिन म्हैं पाछौ जी उठूंला।”
एक मां री विणती
(मरकुस 10:35–45)
20तो जबदी रै बेटौ री मां नै, आपरै बेटौ रै साथै यीसु रै खनै आयनै परणाम किया, अर उण ऊं कीं मांगणै लागी।
21यीसु उणनै कयौ, “थूं कांई चावै है?”
वो उण ऊं बोली, “ओ वचन दे की म्हारै ऐ दोनूं बेटा थारै राज में एक थारै जीमणा हाथ अर एक थारै डावै हाथ बिठाईजै।”
22यीसु उणनै जबाब दियौ, “थै जांणौ कोनीं की कांई मांगो हो। जिकौ कटोरो म्हैं पीण वाळौ हूं, कांई थै पी सकौ हो?”
उणौ कयौ, “हां पी सकौ हो।”
23यीसु उणनै कयौ, “थै म्हारौ कटोरो तो पीओला, पण अपणै जीमणै अर डावै किणी नै बैठाणो म्हारौ कांम कोनीं, पण जिणरै सारू म्हारै पिता री तरफ ऊं तैयार कियो जावैला, उणरै सारू है।”
24ओ सुणन दसों चेलौ नै उण दोनूं भाइयो माथै रीस आयगी। 25#लूक 22:25,26यीसु आपरै चेलौ नै खनै बुलायनै कयौ, “थै जांणौ हो की गैर यहूदियो रै हाकिम अपणै लोगां ऊपर राज करै है। अर जिकौ मोटा लोग है वो छोटे लोगां ऊपर माडे अधिकार जतावै है। 26#मत 23:11; मरकु 9:35; लूक 22:26पण थौरे में ऐड़ौ नीं होणौ चाईजै। पण जिकौ कोई थौरे में हूं मोटो होणौ चावै, वो थौरो सेवक बणै। 27अर जिकौ थौरे में परधान होणौ चावै, वो थौरो दास बणै। 28ज्यूं की मिनख रौ बेटौ, इण वास्तै कोनीं आयौ की उणरी सेवा चाकरी करै, पण इण वास्तै आयौ की खुद सेवा चाकरी करै, अर घणौ नै छुड़ानै रै सारू आपरौ प्रांण दैणै आयौ है।”
यीसु दो आंधौ नै सावळ करिया
(मरकुस 10:46–52; लूका 18:35–43)
29जद यीसु अर उणरा चेला यरीहो ऊं निकळ रिया हा, तो एक घणी भीड़ उणरै लारै वहीर होयगीं। 30अर दो आंधा जिकौ सड़क रै कांठै बैठा हा, अर ओ सुण नै की यीसु जा रियौ है, हेलौ करणै लाग्या, “हे परभु दाऊद री औळाद, म्हौरै ऊपर दया कर।”
31लोगां उणौनै हाका किया की चुप रौ, पण वे भळै ई चिलायनै कैवण लाग्या, “हे परभु दाऊद री औळाद, म्हौरै ऊपर दया कर।”
32तद यीसु ऊभौ होयनै उणौनै बोलायनै कयौ, “थै कांई चावौ की म्हैं थौरे वास्तै करूं?”
33उणौ यीसु नै कयौ, “हे परभु ओ की म्हांरी आंखे खुल जावै।”
34यीसु नै तरस आयग्यौ अर उणौरी आंख्यां रै ऊपर हाथ राखियौ, अर वे तुरत देखणै लाग्या। अर यीसु रै लारै वहीर हो गिया।
Селектирано:
मती 20: RWR
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
© NLCI CC BY-NC-ND 4.0