प्रेरितों रा कांम 25
25
पौलुस कैसर ऊं आपरौ न्याव चावै है
1फेस्तुस उण परदेस में पूगनै रै तीन दिन पछै कैसरिया ऊं यरुसलेम गियौ। 2तद परधान याजकौ अर यहूदियो रै मुखिया लोगां नै उणरै सांमै पौलुस ऊपर दोस लगाणा सरू किया। 3अर उण ऊं विनती करनै उणरै विरोध में ओ पकस चाहयौ, की वो उणनै यरुसलेम में बुलाए, क्यूंकै वे उणनै रास्ते ही में मार दैणै री घात में लागयोड़ा हा।
4फेस्तुस जबाब दियौ, “पौलुस कैसरिया में पहरे में है, अर म्हैं आप जल्दी उठै जाऊंला।” 5पछै कयौ, “थौरे में जिकौ अधिकार राखै है वे साथै चालै, अर जे इण मिनख नै गुनाह कियो है तो उण माथै दोस लगाए।”
6उणरै बीच कोई आठ दस दिन रैयनै वो कैसरिया चाल दियौ, अर दूजै दिन न्याव-आसन माथै बैठनै पौलुस नै लावण री आग्या दी। 7जद पौलुस आयौ तो जिकौ यहूदी यरुसलेम ऊं आया हा, उणौनै आजू-बाजू ऊभा होयनै उण माथै घणाहारा भारी दोसण लगाया, पण उणनै साबित नीं कर सकया हा।
8पण पौलुस जबाब दियौ, “म्हैं नीं तो यहूदियो री व्यवस्था रै अर नीं मिंदर रै अर नीं ही कैसर रै विरुद्ध कोई गुनाह कियो है।”
9तद फेस्तुस यहूदियो नै खुस करनै री इछा ऊं पौलुस ऊं कयौ, “कांई थूं चावै है की यरुसलेम जाऊं, अर उठै म्हारै सांमै थारौ ओ मुकदमो तय कियो जाये?”
10पौलुस कयौ, “म्हैं कैसर रै न्याव आसन रै सांमै बैठौ हूं, म्हारै मुकदमे रौ ओहीज फैसलो होणौ चाहीजै। ज्यौ थूं चौखी तरैह ऊं जांणै है, यहूदियो रौ म्हैं कीं गुनाह नीं कियो। 11जे म्हैं गुनेगार हूं अर मार दैणै लायक कोई कांम कियो है, तो मरनै ऊं नीं मुकरतो, पण जिण बातां रौ ऐ म्हारै माथै दोस लगावै है, जे उणमे ऊं कोई बात साची नीं ठैरै, तो कोई म्हनै उणरै हाथ नीं सौंप सकै। अर म्हारी विनती है की म्हारी सुनवाई कैसर राजा रै सांमै हो।”
12तद फेस्तुस नै मंत्रियो री सभा रै साथै बातां करनै जबाब दियौ, “थै कैसर खनै सुनवाई करणै री विनती की है, इण वास्तै थूं कैसर राजा रै खनै ही जावैला।”
राजा अग्रिप्पा रै सांमै पौलुस री पेसी
13कईक दिन बीतनै रै पछै अग्रिप्पा राजा अर उणरी बेन बिरनीके नै कैसरिया नगर में आयनै फेस्तुस ऊं मिळिया। 14उणरै घणै दिनां उठै रैणै रै पछै फेस्तुस नै पौलुस रै बारै में राजा नै बतायौ, “एक मिनख है, जिणनै फेलिक्स बंदी नै एठै छोड़नै ग्यौ है। 15जद म्हैं यरुसलेम में हो, तो परधान याजक अर यहूदियो रै अगुवो नै दोस लगायौ अर चावै की उणनै मौत री सजा री आग्या दे। 16पण म्हैं उणनै जबाब दियौ की रोमियो री आ रीति कोनीं की किणी मिनख नै डंड रै लियै सूंप दे, जद तांई मिनख नै अपणै मुकदमो करनैवाळा रै सांमै ऊभौ होयनै दोस रै जबाब दैणै रौ मौकौ नीं मिळै। 17इण वास्तै जद वे एठै भेळा होया, तो म्हैं कीं जेज नीं की, पण दूजै ही दिन न्याव आसन माथै बैठनै उण मिनख नै लावण री आग्या दी। 18जद उण माथै मुकदमो करनैवाळा ऊभा होया, तो उणौ ऐड़ी भूंडी बातां रौ दोस नीं लगायौ जैड़ौ म्हैं समझतौ हो। 19पण वे अपणै धरम रै और यीसु नाम किणी मिनख रै बारै में, जिकौ मर गियौ हो अर पौलुस उणनै जीवतौ होणै रौ बतातौ हो, विवाद करता हा। 20म्हैं समझ नीं पा रियौ हो की इण बातां रौ पतौ कीकर लगाऊं? इण वास्तै म्हैं उण ऊं पूछयौ, ‘कांई थूं यरुसलेम जावैला की उठै इण बातां रौ फैसलो हो?’ 21पण जद पौलुस नै विनती की, की उणरै मुकदमे रौ फैसलो महाराजा रै उठै हो, तो म्हैं आग्या दी की जैड़ी तांई उणनै कैसर राजा रै खनै नीं भेजूं, उणरी रूखाळी की जाये।”
22तद अग्रिप्पा फेस्तुस ऊं कयौ, “म्हैं भी उण मिनख री सुणणी चावूं हूं।”
उणै कयौ, “थूं काल सुण दैला।”
23दूजै दिन जद अग्रिप्पा अर उणरी बेन बिरनीके घणी धूमधाम ऊं आया अर पलटन रै सरदारो अर नगर रै मुखिया लोगां रै साथै दरबार में पूगा। तद फेस्तुस आग्या दी की वे पौलुस नै लेन आवै।
24फेस्तुस कयौ, “हे राजा अग्रिप्पा, अर हे सगळै मिनखौ जिकौ एठै म्हौरै साथै हो, थै इण मिनख नै देखौ हो। जिणरै बारै में सगळै यहूदियो नै यरुसलेम में अर एठै भी चिला-चिलायनै म्हारै ऊं विनती की, की इणरौ जीवतौ रैवणौ चौखौ कोनीं। 25पण म्हैं जांण लियौ की उणै ऐड़ौ कीं नीं कियो की मार दियौ जाए, अर जद की उणै आप ही महाराजा री विनती की, तो म्हैं उणनै भेजनै रौ फैसलो कियो। 26म्हैं उणरै बारै में कोई पकी बात नीं पाई की अपणै मालिक कैसर रै खनै लिख भेजूं। इण वास्तै म्हैं उणनै थौरे सांमै अर खास करनै हे महाराजा अग्रिप्पा, थारै सांमै लायौ हूं की जांचनै रै पछै म्हनै कीं लिखनै रौ मिळै। 27किणी बंदी माथै लगाया गिया आरोप रै बारै में बिना चिठ्ठी लिखे उण नै भेजणो, म्हनै ठीक कोनीं लागै है।”
Селектирано:
प्रेरितों रा कांम 25: RWR
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
© NLCI CC BY-NC-ND 4.0