Luqka 2
2
A'khan (2)
Boiyesuq a'moeiq klong
(Mate 1:18-25)
1Yaq khinga taengblei blaiq ya ta'gaung ca'lang án louqwai khoeq Kaeta mang Awgoukduq loeq a'maeng a'thut. 2Nei mcaq loeq mcaq ta'gaung ca'lang án louq khinga Kuqreniq khoeq Suriq pleiya khoeq ba'yeinkhan a'phlaet. 3Khlaung ta'kum khoeq ta'gaung ca'lang án wonai tawiq ya yaqhniq án moeiq dun nam ta'kuma án ciq. 4Yaqklongoeng Yawtaq khaw Hnyangphalang myoewa khoeq a'kom khoeq khlaung a'phlaet klongoeng Galilae plei Nazaeq mloeqa khoeq sot loeqteq Dawoeiq mloeq a'phlaet khoeq Yudaq plei Nazaraeq Baeqlein mloeqa ta'gaung ca'lang a'louqi yai a'ciq. 5Yaqkha a'ciq kho wa yaqoeng án paeki khoeq hoenmawqnu Mariq khaw a'ciqi pui nauk. 6Yaqhniq khoeq yaq dun án phaw loeq Mariq khaw a'caw a'moeiq hnowaiqya teq 7Yaq loeq a'cawu pa'taw caw a'tauki. Yaq khinga taekhoekhana omdun moeiqcaqa teq sa'mi caw khoeq wawtoeng laet hniq loeqteq soecauk khaupa anhmyong toeq.
Mehon saw haqloeq Boiyesuq a'moeiq hni nakkhoeq toe cong saw haqla án hmyauk khoeq klong
8Yaq yanoeng boengak toe cong saw haqloeq yaqhniq toe haqkhoeq Baeqlein mloeq phaela a'moeiq khoeq laicawiq haqla án cong. 9Yaq khinga Boipaw mehon saw khaw yaqhniq phaela ma'lawiq ta'lawiq pau loeqteq Boipaw phumthaung khoeq yaqhniq phaela lang poeiq loeqteq toe cong saw haqkhaw ánpahaiyi poeiq. 10Yaqkiyoeng Mehon saw loeqkhaw yaqhniqa keiqai tuk. Keiloeq khlaung haq awlum tawiq ya nana oeqcaq pha khoeq sa'taung pawi ka'mhmyauk haqkhoeq noeng. 11Nei khakhut khomghup a'oeqcaq pha khoeq khinga a'klawn saw Boikhreitaw khoeq nanghniq tawiq ya Dawoeiq mloeqa a'moeiq hni. 12Baeqlein mloeqa wawtoeng laet hniq loeqteq soecauk khapa anhmyong khoeq sa'mi caw náhmuq loeq náhmawtai taeng a'hau haq. 13Ma'lawiq ta'lawiq a'coe mehon saw haqkhaw mehona khoeq komuk loeqteq Boipaw pawi klong na'khakhut án hmlokthat. 14Mehona a'moeiq khoeq Boipaw pawi klong kánhmlokthaq. Somdak khlunga a'nmoeiq khoeq khlong haqla khaw mlungko yaedam bacaek taeng án hau. 15Yaqkiyoeng mehon saw haqkhoeq mehona án ciqba kiyoeng toe cong saw haqloeq ma'hniqa mehon saw haq ta'thoq Boipaw loeq a'mphlaq haqkhoeq nei hmuqlong haq másot hoetai khoeq Baeqlein mloeqa máciqai taeng poemak loeq poemak ánhauwi. 16Yaqkiloeq yaqhniq khaw yaqa khoeq sot uk loeq a'yang án ciq loeq Yawtaq, Mariq loeq soecauk khapa án hmyong khoeq sa'mi caw án khom. 17Toe cong saw haqloeq sa'micawa án khom loeq mehon saw haqloeq án hau hoet khoeq sa'mi caw klong khoeq omdun ta'kuma án moeiq khoeq khlaung ta'kuma án cauk poeiq. 18Toe cong saw haqloeq án cauk paek khoeq klong ya uk laq saw awlum loeq nana án mauk. 19Mariq loeqkhaw nei klong haq awlum a'mlung duka tawyi loeqteq nana a'tawiqi nauk. 20Toe cong saw haqkhaw mehon saw haqloeq yaqhniqa án hau hoet khoeq khakhut án hmuq laqa teq yaq hmuqlong haq tawiq ya Boipaw a án mlung án kowoeng hmlokthaq uk loeqteq án ciqba toeq.
Sa'mi caw Yesuq Boipaw hma án aup khoeq klong
21Yaqkiyoeng sa'mi caw a'moeiq khoeq hnupsaet a'moeiq kiyoeng sa'micawa a'yephyahli meingala án saiyai yaq teq a'hoen duka a'moeiq maw ta'koeiq mehon saw loeq a'nsin hoet khakhut Yesuq taeng a'ming án paek. 22Yaqkiyoeng Mawse loeq a'tauk hoet khoeq peinyat klam a'moeiq khakhut koephoeqkoe Mariq loeq cimcai aung a'saiyai khoeq hnup a'mcawn loeq nupaw haqloeq sa'mi caw khoeq Boipaw a an aupai khoeq Yeruqsalein mloeqa an ciqi pui nauk. 23Yaqhniq nei kha án sai laq khoeq teq Boipaw loeq a'peinyat hoet khakhut a'cawu pa'taw caw ta'kum khoeq Boipaw hma án aup laqai taeng a'yok khoeq a'phlaet. 24Yaqkhakhut wakho cungak seiyaqloeq khoe dawhneiq án puzaw laqai taeng Boipaw peinyat klama a'hau khakhut an puzawai khoeq a'phlaet.
Suqmaung loeq Boipaw klong a'hau khoeq klong
25Yaq khinga Yeruqsalein mloeqa Suqmaung taeng a'ming a'moeiq khoeq cangpaw poemak a'moeiq. Yaqkhoeq Boipaw hmuqlong sai louq loeqteq Boipaw hmaungkauma khlaungpawi a'phlaet khakhut Iqtayelaq khlaungmyoe haqloeq án khaum laq khoeqhaq duka khoeq a'hloeq haqlai Boipaw a a'congi khoeq khlaung a'phlaet. Cimcai muikhlaw khoeq yaqhma kom loeqteq 26sukhowa yaqa nang khoeq Boikhreitaw hmu laq ta'ong du laq hlaq tiq taeng cimcai muikhlawoeng a'hau. 27Mariq loeq Yawtaq khaw Boipaw peinyat a'moeiq khakhut sa'mi caw Yesuq khoeq Boipawa an aupai tawiq ya Boipawa wotpyuq dun kyonga an ciqi pui nauk tuna cimcai muikhlaw loeq Suqmaunga Boipaw a wotpyuq dun kyonga a'wanai khoeq laum a'mphlaq. 28Yaqkiyoeng Suqmaung loeq sa'micawa poem loeqteq Boipaw a na'khakhut a'mhmlok thaq. 29Boi yoe, nang loeq na'hau khoeq plau a'moeiq khakhut towa keiya mlungko yaedamoeng ka'du khwai a'mpaek hna'boei. 30A'piyawoe naka khlaung haqla a'klawnai khoeq nang loeq na'hloeq khoeq Boiya kei ka'mikoeng ka'hmuq laqhni. 31Somdaeka a'moeiq khoeq khlaung haq loeqkhaw Boipaw loeq na'hloeq khoeq Boiya án hmuq laqai. 32Yaqkhoeq Boipaw tawiq ya a'coe khlaungmyoe haqla a'mphlaqai khoeq a'lang phlaet loeqteq nang khlaung myoeq a'phlaet khoeq Iqtayelaq phumthaung a'lo wai khoeq Boi a'phlaet. 33Mariq loeq Yawtaq loeqkhaw Suqmaung loeq a'hau khoeq sa'mi caw Yesuq klong anyauk khoeq khinga nana an mauk nauk. 34Yaqkiyoeng Suqmaung loeq yaqhniqa pa'si a'paek kiyoeng Mariqa Boipaw loeq nang na'caw khoeq Iqtayelaq khlaungmyoe haq duka a'plaet paek a'laqi yai saw loeq a'klawn a'laqi yai saw haqla a'mkha haqlai tawiq ya a'haeq a'laqi. Yaqkhoeq Boipaw hma a'lo khoeq na'maek phlaet loeqkhaw khlaung haqloeq yaqa án myang. 35Nei khoeq teq khlaung haqloeq án mlunga án mkhin khoeqhaq a'pau wai khoeq klong a'phlaet. Nang na'mlunga khaw cimhmyum coeki loeqteq a'wonai taeng a'hau.
Hanaq loeq sauksi a'khaumi khoeq klong
36Yaqduna Asa a'myoe a'caenga khoeq Phenwelaq cawhnu Anaq taeng an hau khoeq Pa'rawphaeq nu poemak khaw a'moeiq. Yaq hna'taw khoeq a'pawha a'laqi kiyoeng a'pawhawoeng kumseiq anomhom. 37Towa yaqkhoeq hmeinu poemak phlaet loeqteq saekipkumhli moeiq loeqteq a'cang hni. Yaq hna'taw khoeq Boipawa wotpyuq dun kyonga khoeq pikhowakhaw sot ta'ong Boipaw a mkhoeqi loeqteq suq tongi loeqteq ei hmuti loeqteq hnuptoeng yantoeng a'sai louq khoeq a'phlaet. 38Yaq hna'taw loeq Boipaw a wotpyuq dun kyonga a'phaw loeq sa'mi caw Yesuqa a'hmuq loeq Boipaw a hmlokthaq loeqteq Yeruqsalein mloeqa a'klawnai khoeq a'congi khoeq khlaung haqla nei sa'mi caw Yesuq klong a'hmyauk haq.
Nazaraeqa sa'mi caw Yesuq loeq a'nu paw haq án lo ba khoeq klong
39Yaqkiyoeng Yawtaq loeq Mariq loeqkhaw peinyat a'moeiq khakhut Boipaw hmuqlong haq sai louq poeiqhniq loeqteq yaqhniq im a'moeiq dun Galilae plei Nazaraeq mloeqa ancitba. 40Sa'mi caw khaw bau loeqteq plaengnya woeng a'yungta woeng luiq loeqteq Boipaw phumthaung a'laqi khoeq sa'mi caw a'phlaet.
Boipaw a wotpyuq dun kyonga sa'mi caw Boiyesuq a'om khoeq klong
41Mariq loeq Yawtaq khoeq patakha pawi tawiq ya Yeruqsalein mloeqa kumtoeng an ciq. 42Boiyesuq ka'kum hng'laihniq a'luiq loeq kumtoeng an ciq khakhut patakha pawi ansaiyai tawiq ya yaq mloeqa an ciq. 43Patakha pawi hnup a'nmcawn loeq sa'mi caw sa'mi caw Yesuq khoeq Yeruqsalein mloeqa a'kyan hoet khoeq hmawt ta'ong ima an ciq toeq. 44Sa'mi caw Yesuq khoeq yaqhniq hui tu implansaw haq khlaung lui yoeng a'lo pawq taeng mkhin uk loeqteq hnupaki kla ancit hni. Yaqkiyoeng sa'mi caw Yesuq khoeq myoesaw haq khlaung haq luiya ansuiya teq 45sui uk loeq khomaquka teq Yeruqsalein mloeq an lo ba. 46Hnupthum a'kla kiloeq sa'mi caw Yesuq khoeq Boipawa wotpyuq dun kyonga Yudaq sa'la haq laikla a a'ngung khoeq yaqhniq loeq ankhomba. Yaq loeq yaqhniq loeq án hau khoeqhaq hnyin loeqteq yaqhniqa plauplan a'hiq haq ba. 47Sa'mi caw Yesuq plau a'nyauk khoeq khlaung ta'kum loeq yaq plaenga woeng a'hau khoeq plau loeq a'hiq haq khoeqhaq nana án mauk nauk. 48Yawtaq loeq Mariq loeq sa'mi caw Yesuqa an khom loeq nana an mauk nauk hniq loeqteq a'nu loeq ka'cawoe keihniqa nei kha piya amsai hoeiqloe? Keihniq loeq nana amtheiq nauk hoeiq hniq hang loeqteq kanmsui hoeiq taeng a'hau. 49Yaqkhowa sa'mi caw Yesuq loeqkhaw pi klongoeng keiya amsui hoeiqloe? Kei khoeq Boipaw ima ka'moeiq khoeq amhmawta hniti moe? taeng a'hau hoeiq. 50Seiloeqkhaw sa'mi caw Yesuq loeq pi a'hau woe nakkhoeq yaqhniq loeq yawcuwaq hniq.
Khlaung hmaungkaum Boipaw hmaungkauma sa'mi caw Yesuq loeq a'hmoi a'laqi khoeq klong
51Yaqkiyoeng sa'mi caw Yesuq khaw a'nu loeq a'paw hui tu Nazaraeq mloeqa citpawqba loeqteq yaqhniq plau hnyini loeqteq a'om. A'nu loeqkhaw mehon saw loeq a'hau khoeq plau ta'koeiq mcaq loeqteq Yesuq klong haq awlunga a'tawiqi nauk poeiqba. 52Yaqkiyoeng sa'mi caw Yesuq khaw a'bau nak loeq plaengnya luiq loeqteq kailati loeqteq Boipaw hma khoeq phumthaung khaw laqi loeqteq khlaung haq loeqkhaw nana ánmlat nauk.
Селектирано:
Luqka 2: CSV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Chin, Sumtu Bible by Beyond Translation is licensed under Creative Commons Attribution-ShareAlike 4.0 License.