Lukas 7
7
Yexus Khu tuz Thiaj Tusrog Loos tuz Tusqhe
1Thaws Yexus qha tej qhai tu tuadtxhij noog taaz liad, niz txiad muz tu pes lus nroog Kapena-us. 2Nyos hub lus nroog qhai, muaj is tug thiaj tusrog piag pua kwg yog neeg Loos, niz muaj is tug tusqhe kwg niz hlus heeb, tuz tusqhe qhai mos heeb ted yiad tuag. 3Thaws tuz thiaj tusrog qhai hnob lag has txug Yexus, niz txiad txis cob Yudais cob txwjlawg qeetuz muz thob Yexus tuaj paas khu niz tuz tusqhe. 4Cud muz cuag Yexus has thob taaz zug has tas, “Tsidnyog koj muz paas tuz thiaj tusrog qhai, 5tu qhob niz hlus pes yaad neeg, has niz ua is lus tseb saaslaaj pus tu pes.”
6Yexus txiad nrug cud muz. Thaws Yexus muz yiad lawg txug tuz thiaj tusrog lus tseb, tuz thiaj tusrog txis niz os pes tug phoojywz muz cheed Yexus has tas, “Tuz Tswb, nyos tsaad taaskud koj, kud yog is tug kwg tsi tsidnyog koj yiad muz hub kud lus tseb, 7has kud yog is tug kwg tsi tsidnyog tuaj cuag koj. Thob koj has tuas luz nyaz, ces kud tuz tusqhe yeej yiad zoo. 8Txiad yog kud los tseed muaj cob thiaj kwg kaab kud, has kud muaj is cob tusrog kwg kud kaab. Yog kud has tu tuz na has tas, ‘Muz!’ niz txiad muz. Yog kud has tu tuz tod has tas, ‘Luz!’ niz txiad luz. Has yog kud has tu kud tuz tusqhe has tas, ‘Ua ni na!’ niz txiad ua ni qhai.”
9Thaws Yexus hnob cud has ni qhai, niz xaab tsi thoos ni; niz tig muz has tu cob neeg coos coos kwg rias niz qaas has tas, “Kud qha tu mej has tas, txiad yog hub cob Yixalayees los kud tsi taw pud is tug kwg muaj keb ntseeg npawd ni tuz na!”
10Cob kwg tuz thiaj tusrog txis tuaj qhai rob muz txug tod tuz thiaj tusrog tseb, ua caaz tuz tusqhe ted zoo liad.
Yexus Tsaa tuz Puj Ntsuag leej Tus Siab Rob Qaas Luz
11Tod qaas qhai tsi nteb#7.11 Tod qaas qhai tsi nteb; tej phaw qus has tas, Hnoos tod qaas. Yexus muz hub lus nroog Na-is, Yexus cob thwjtid has is cob neeg coos coos nrug niz muz. 12Thaws Yexus muz txug qhais roojvaag kwg muz tu hub lus nroog, txiad muaj neeg kwb is tug tuag tiad tuaj txug qhais. Tuz tuag qhai yog is tug puj ntsuag tuz tu, tuz puj ntsuag qhai muaj tuas tug tus nyaz. Cob neeg coos coos kwg nyos hub lus nroog qhai nrug niz tuaj. 13Thaws tuz Tswb pud tuz puj ntsuag qhai, Tuz Tswb hlus niz heeb has has tas, “Koj tsi xod quaj.” 14Yexus txiad txaab zoz muz tuab nkaws lus hles, ces cob neeg kwg kwb lus hles txiad nrez. Yexus has tas, “Tuz hluas, kud has tu koj tas, koj ca ni siab tseez!” 15Tuz tuag qhai txiad siab tseez nyos tuasyws nrug cud thaad. Yexus coj niz muz tu niz nad.
16Cob neeg qhai ntshai heeb ni, has cud qhuas Vaajtswb has tas, “Muaj is tug ceb Vaajtswb luz kwg muaj fwjchid heeb ted luz tu hub pes cob liad!” Has cud has tas, “Vaajtswb ted luz ciad niz yaad neeg liad!”
17Zaaj kwg Yexus ua na nrob nchaa moo luz muz thoos pliaz hub lus xeeb Yudais has tej cheestsaad kwg nyos isncid qhai.
Yawhaas Txis Niz Cob Thwjtid Muz Noog Yexus
18Yawhaas cob thwjtid qha tej na hubtsig tu Yawhaas noog. 19Yawhaas hu niz os tug thwjtid luz has kuas ostug muz cuag tuz Tswb has has tas, “Koj puas yog tuz kwg Yawhaas has tas yiad luz lossis pes tseed yiad toz kua lwd tuz?”
20Thaws ostug muz txug qhais Yexus, ostug has tas, “Yawhaas tuz kwg muas neeg ua kebcai raws dej kuas pes tuaj noog nuad, koj puas yog tuz kwg yiad luz lossis pes tseed yiad toz tshaaj pliaz lwd tuz?”
21Lus sijhiad qhai Yexus khu cob neeg muaj mos ntaw tuz zoo, niz liab daag tiad qhai cob neeg kwg rawg daas, has niz khu cob neeg xyuadtxwb ntaw tuz rob pud keb. 22Yexus tes os tug kwg Yawhaas txis tuaj has tas, “Mej ca ni rob qaas muz qha tej kwg mej pud has mej hnob tu Yawhaas has tas: cob neeg xyuadtxwb rob pud keb, cob neeg tuag ceg muz tawgkeb, cob neeg mos ruas zoo,#7.22 Cob neeg mos ruas zoo; Nuad 5.12. cob neeg laaz ntsez hnob luz, cob neeg kwg tuag liad siab rob luz, has ted muaj neeg muz qha Txuj Moo Zoo tu cob neeg txodnyed liad. 23Tuz kwg ntseeg kud, tuz qhai yiad taw kooshmoob!”
24Thaws os tug kwg Yawhaas txis tuaj rob qaas muz liad, Yexus qha Yawhaas zaaj tu cob neeg coos coos qhai noog has tas: “Thaws mej muz cuag Yawhaas tod roos mojsaas qhua, mej muz nuad daastsi? Mej muz nuad tuz lawjkob kwg cua tshuas riab muz riab luz los?” 25Mej muz nuad daastsi? Mej muz nuad tuz neeg kwg hnaab tej tsooz tsho zoo zoo los? Tsuas yog cob neeg kwg nyos hub vaajntxwb lus loog, ha taw hnaab zoo has taw noj taw haw tsi txiaj taaz! 26Mej qha tu kud nuad, mej muz nuad daastsi? Mej muz nuad is tug kwg ceb Vaajtswb luz los? Yog liad, tadsis kud qha tu mej has tas, tuz kwg mej pud qhai muaj fwjchid luj kua is tug ceb Vaajtswb luz. 27Tu qhob tuz Yawhaas na yog tuz kwg Vaajtswb txujlug ted xus qha tseg liad: “Vaajtswb has tas, kud yiad txis kud tuz tusqhe ua koj ntej muz khu keb toz koj.” 28“Kud qha tu mej has tas, tuadtxhij kwg yug luz qhai puj, tsi muaj is tug muaj fwjchid luj npawd ni Yawhaas; tadsis tuz kwg yaw tshaaj Yawhaas saw Vaajtswb lus Teschias, tuz qhai tseed muaj fwjchid luj kua Yawhaas has.”
29Taaznrhiab cob pejxeed kwg noog Yawhaas qha has tshwjxees yog cob tuas neeg saw se kwg Yawhaas muas ua kebcai raws dej puabtsig pud has tas Vaajtswb yog tuz ncaajnceeg. 30Tadsis cob Falixais has cob xisfws kwg qha Vaajtswb txuj Kebcai tsi yeed ua tej kwg Vaajtswb kuas cud ua, has tsi yeed Yawhaas muas cud ua kebcai raws dej.
31Yexus has ntxib tas, “Kud yiad muas cob neeg tad na pib tu daastsi?” Has cud zoo nyaab? 32Cud zoo is yaad ni tej minyuas yaw kwg ua si tod tshaab puad. Paas na has tu paas tod has tas, “Pes ted tshuas raaj liad, tadsis mej tsi seeb ceb ni! Pes quaj nyab, tadsis mej tsi mos sas! 33Yawhaas tuz kwg muas neeg ua kebcai raws dej, niz luz, niz ua kebcai yoo mo, has niz tsi haws ciab txib hmaas, mej ha has tas, ‘Niz rawg daas liad!’ 34Neeg Leej Tus luz, niz noj has haws, mej ha has tas, ‘Mej nuad, tuz neeg na! Niz noj luj has haws luj, niz nrug cob neeg saw se has cob neeg txhud ua phoojywz!’ 35Txhua tuz kwg leez yuab Vaajtswb lus tswbyid, cud tez hujlwd yiad ua tu tuadtxhij pud has tas Vaajtswb yog tuz kwg muaj tswbyid tag.”
Yexus Muz Hub tuz Falixais Tseb
36Muaj is tug Falixais hu Yexus muz nrug niz noj hmo, Yexus txiad muz tu hub tuz Falixais tseb, has nyos tuasyws noj mo. 37Muaj is tug puj nyos hub lus nroog qhai, niz yog is tug neeg ua txhud. Niz hnob has tas Yexus muz noj mo hub tuz Falixais tseb, niz nqaa is fwj roj tsw qaas 38tuaj siab saas tod qaas ncaaj qhai Yexus kuatia, niz quaj kua muas luz ntus Yexus os txhais kuatia, has muas niz cob plawshaw so, niz hna Yexus kuatia has muas cob roj tsw qaas laws ywg Yexus kuatia. 39Thaws tuz Falixais kwg hu Yexus luz noj mo pud ni qhai, niz xaab has tas, “Yog tuz na yog is tug ceb Vaajtswb luz tag, niz yeej yiad paws has tas tuz puj kwg kob niz qhai yog is tug neeg txhud!”
40Yexus has tu tuz Falixais qhai tas, “Ximoos, kud muaj is lu luz xaab has tu koj.”
Ximoos tes has tas, “Taw los mas Xisfws, koj ca ni has.” 41Yexus txiad has tas, “Muaj os tug yiag tshuab is tug yiag nqai. Is tus tshuab tsis puas lus nyaj, is tug tshuab tsis cawg lus nyaj. 42Ostug puabtsig tsi muaj nyaj thed tuz yiag qhai, ces tuz yiag qhai txiad zaad nqai tu ostug hubtsig. Yog ni, os tug qhai, tuz twg yiad ncu tuz yiag qhai nyaj ntsig heeb kua?”
43Ximoos tes has tas, “Kud xaab has tas yog tuz kwg tuz yiag qhai zaad nuj nqaid ntaw kua tu.”
Yexus tes has tas, “Yog ni koj has liad.” 44Yexus tig muz nuad tuz puj qhai, has has tu Ximoos has tas, “Koj puas pud tuz puj na? Kud tuaj txug hub koj tseb, koj ted tsi muas dej ntxuab kud kuatia, tadsis tuz puj na muas niz cob kua muas ntxuab kud kuatia, has muas niz cob plawshaw so. 45Kud tuaj, koj tsi hna kud, tadsis txij thaws kud tuaj txug hub koj tseb, tuz puj na hna kud txhais kuatia tsi tseg ni. 46Koj ted tsi muas roj tsw qaas pleeb kud tawshaw, tadsis tuz puj na muas roj tsw qaas laws ywg kud os txhais kuatia. 47Kud qha tu koj has tas, qhob kwg tuz puj na muaj keb hlus luj npawd ni na, qha has tas Vaajtswb ted zaad niz tej keb txhud hubtsig liad. Tadsis tuz kwg Vaajtswb zaad txid tsiag, tuz qhai yeej ncu Vaajtswb nyaj ntsig tsiag.”
48Yexus has tu tuz puj qhai has tas, “Kud zaad txid tu koj.”
49Cob neeg kwg nrug Yexus noj mo qhai, cud xaab has tas, “Tuz na yog tuz twg, niz ha zaad txid taw?”
50Yexus has tu tuz puj qhai has tas, “Koj txuj keb ntseeg tu ciad taw koj kig liad; koj ca ni muz kaajsas lus.”
Селектирано:
Lukas 7: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.