Lukas 21
21
Tuz Puj Ntsuag Tso Txaj
1Yexus tsaa qhobmuag nuad, niz pud cob neeg npluanuj tso nyaj tu hub lus phijxaas kwg nyos hub lus Tuadtseb, 2has pud is tug puj ntsuag pluag pluag taastod muas os lus nyaj toog tso tu hub. 3Yexus has tas, “Kud qha tu mej has tas, tuz puj ntsuag na tso ntaw kua lwd tuz. 4Tu qhob lwd tuz muas tej nyaj kwg seed tuaj tso nyaz; tadsis tuz puj ntsuag kwg pluag pluag na, niz muas hlo taaznrhiab cob nyaj kwg yiad yug niz coj tuaj tso.”
Lus Tuadtseb Yiad Puadtsuaj
5Cob thwjtid qeetuz sis thaad has txug lus Tuadtseb kwg lag muas tej poszes kwg zoo zoo nkawj luz ua, has tej khood kwg lag coj tuaj fij tu Vaajtswb. Yexus has tas, 6“Tej kwg mej pud na, thaws txug sijhiad liad, yiad tsi muaj os lus poszes dhod ua ke, txhua lus yiad pluad nyaz nyos nyaz taaz hubtsig.”
Keb Txodnyed has Keb Tsidtxod thaws Ntajtes Yiad Kiag
7Cud noog Yexus has tas, “Xisfws, thaws twg maad ni muaj tej na? Has yaad daastsi yiad qha tu pes paws has tas ted txug lus sijhiad kwg yiad muaj tej qhai liad?”
8Yexus qha has tas, “Mej yiadtsud ceebfaaj, tsi xod pus tuz twg daag ntxaz taw mej yuad keb. Yiad muaj ntaw tuz tuab kud lus npe has tu mej tas, ‘Kud yog niz!’ Lus sijhiad ted luz ze liad! Tadsis mej tsi xod rias cob neeg qhai muz. 9Thaws mej hnob muaj keb tsub keb rog has muaj keb kud ntxhub los mej tsi xod ntshai. Yeej yiad xus muaj tej qhai ua ntej, tadsis tsi taw qha has tas, ted txug lus sijhiad kiag liad.”
10Yexus has tas, “Is yaad neeg yiad tiadtsaad is yaad neeg; is lus teschias yiad siab tua is lus teschias. 11Yiad muaj aab qeeg luj heeb, yiad muaj keb tshais keb nqhes, has yiad muaj kaas mos kis thoos pliaz txhua qhob hubtsig; yiad muaj tej yaad txiab-txiab has txaws ntshai tshwd saw nruas ntug ua tu tuadtxhij ntshai heeb ni. 12Tadsis thaws tseed tsi taw muaj tej qhai, yiad muaj neeg ntez mej has tsidtxod mej; cud yiad coj mej muz tu hub tej tseb saaslaaj has muas mej kia tu hub tej tseb yuajphuas. Lag yiad coj mej muz cuag tej vaajntxwb has tej nudtswb, vid mej yog cob kwg ntseeg kud. 13Thaws qhai yog lus sijhiad zoo tu mej ua tidkhiab qha Txuj Moo Zoo. 14Mej yiadtsud ncu ntsoob tu hub sas, tsi xod txhiaj ua ntej has tas, mej yiad npaaj tes nyaab ha zoo, 15tu qhob kud yiad pus tswbyid tu mej kuas mej txiaj has, mej cob yeesncuas yiad tes tsi tawz mej, has nrhab tsi taw luz tu mej. 16Mej nad mej vaid, mej tej kwbtij, mej tej neejtsaa has mej tej phoojywz yiad muas mej coj muz tu tej nudtswb, has lag yiad muas mej qeetuz tua laidtaa. 17Txhua tuz yiad heed mej vid mej yog cob kwg ntseeg kud. 18Tadsis txiad yog mej is txuj plawshaw los yiad tsi tu saw mej tawshaw muz. 19Mej yiadtsud ua sas nteb nyaj tej keb txodnyed, mej ha yiad taw txujsa.
Lus Nroog Yeluxalees Yiad Puadtsuaj
20“Thaws mej pud tusrog tuaj vij lus nroog Yeluxalees, mej yiad paws has tas tsi nteb lus nroog yiad puadtsuaj. 21Lus sijhiad qhai cob neeg kwg nyos hub xeeb Yudais, cud yiadtsud tsib muz tu pes tej roos; cob neeg kwg nyos hub lus nroog yiadtsud tiad, has cob neeg kwg nyos pes tej yaajsaas, tsi xod tsib muz tu hub lus nroog. 22Tu qhob lus sijhiad qhai yog ‘Hnoos Raws Txid,’ kuas muaj tab rias ni Vaajtswb txujlug has tseg liad. 23Luj sijhiad qhai tej puj kwg hai minyuas, has tej puj kwg muaj minyuas mos yiad txodnyed heeb ni! Vid lus ntajtes na yiad rawg keb txodnyed kiag nkaws ni. Vaajtswb yiad raw txid tu cob neeg na. 24Istxha yiad tuag tu hnab ntaaj hnab rag, has istxha yiad rawg ntez muz tu lwd lus teschias; has lwd yaad neeg yiad tuaj tsuj lus nroog Yeluxalees muz txug hnoos kwg tab rias ni lus sijhiad.
Neeg Leej Tus Yiad Luz
25“Thaws qhai yiad muaj tej yaad txiab txiab tu saw lus hnoos, lus hli has tej hnoosqus. Txhua yaad neeg kwg nyos hub ntajtes na yiad yoos taaz, has ntshai lus suas dej habtxwb ntaad. #Yay 13.10; Exk 32.7; Yaw 2.31; Tsd 6.12-13 26Tej neeg yiad yoo vid ntshai thaws tseed toz tej xwdtxheej kwg yiad tshwdsid luz tu lus ntajtes, tu qhob tej fwjchid saw ntuj yiad ua zug koog. 27Thaws qhai tuadtxhij yiad pud Neeg Leej Tus tshwd saw nruas ntug, niz lus fwjchid has tuz tshwjchid yiad ci ntsaa as.#Dan 7.13; Tsd 1.7 28Thaws taastod chib muaj tej na, mej yiadtsud siab ntsug has tsaa tawshaw, tu qhob txuj keb ciad kig ted luz ze liad.”
Tsos Txib Cua Chib Hlaab Nplooj
29Yexus has is zaaj luz pibtxwb tu cud noog has tas: “Mej sid nuad tsos ntoo txib cua has txhua yaad ntoo. 30Thaws mej pud tej ntoo qhai chib hlaab nplooj, mej paws has tas ted yiad txug lus caij ntuj naag. 31Is yaad nkaws ni qhai, thaws mej pud tej qhai, mej yiad paws has tas Vaajtswb lus Teschias ted luz ze liad.
32“Kud qha tsees tu mej has tas, thaws cob neeg tad na tseed tuag tsi taw taaz, ted xus muaj tej qhai liad. 33Lus ntuj has lus ntajtes na yiad pluj muz, tadsis kud tej luz yiad tsi muaj is lu poos ni.
Yiadtsud Ceebfaaj
34“Mej yiadtsud ceebfaaj, nyos tsaad mej lus sas qawg tu keb noj keb haws, has keb txhiajxees tu lus neej tad na yiad ua tu mej tsi ncu ceebfaaj. 35Tu qhob hnoos qhai yiad luz ntsas tu khws nkaws tej neeg tuadtxhij thoos pliaz lus ntajtes na is yaad ni rooj yej. 36Mej yiadtsud ceebfaaj has zub toz, naj hnoos thob Vaajtswb paas kuas mej nyaj tawz txhua yaad kwg yiad muaj luz na, has mej ha yiad muz siab tawz qhai Neeg Leej Tus lus xusntag.”
37Yexus naj hnoos qha hub lus Tuadtseb, has thaws tsaws ntuj niz muz pw pes Roos Txibntoo Roj. 38Txhua taaskiz siab ntxub, tuadtxhij tuaj noog Yexus qhuas qha hub lus Tuadtseb.
Селектирано:
Lukas 21: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.
Lukas 21
21
Tuz Puj Ntsuag Tso Txaj
1Yexus tsaa qhobmuag nuad, niz pud cob neeg npluanuj tso nyaj tu hub lus phijxaas kwg nyos hub lus Tuadtseb, 2has pud is tug puj ntsuag pluag pluag taastod muas os lus nyaj toog tso tu hub. 3Yexus has tas, “Kud qha tu mej has tas, tuz puj ntsuag na tso ntaw kua lwd tuz. 4Tu qhob lwd tuz muas tej nyaj kwg seed tuaj tso nyaz; tadsis tuz puj ntsuag kwg pluag pluag na, niz muas hlo taaznrhiab cob nyaj kwg yiad yug niz coj tuaj tso.”
Lus Tuadtseb Yiad Puadtsuaj
5Cob thwjtid qeetuz sis thaad has txug lus Tuadtseb kwg lag muas tej poszes kwg zoo zoo nkawj luz ua, has tej khood kwg lag coj tuaj fij tu Vaajtswb. Yexus has tas, 6“Tej kwg mej pud na, thaws txug sijhiad liad, yiad tsi muaj os lus poszes dhod ua ke, txhua lus yiad pluad nyaz nyos nyaz taaz hubtsig.”
Keb Txodnyed has Keb Tsidtxod thaws Ntajtes Yiad Kiag
7Cud noog Yexus has tas, “Xisfws, thaws twg maad ni muaj tej na? Has yaad daastsi yiad qha tu pes paws has tas ted txug lus sijhiad kwg yiad muaj tej qhai liad?”
8Yexus qha has tas, “Mej yiadtsud ceebfaaj, tsi xod pus tuz twg daag ntxaz taw mej yuad keb. Yiad muaj ntaw tuz tuab kud lus npe has tu mej tas, ‘Kud yog niz!’ Lus sijhiad ted luz ze liad! Tadsis mej tsi xod rias cob neeg qhai muz. 9Thaws mej hnob muaj keb tsub keb rog has muaj keb kud ntxhub los mej tsi xod ntshai. Yeej yiad xus muaj tej qhai ua ntej, tadsis tsi taw qha has tas, ted txug lus sijhiad kiag liad.”
10Yexus has tas, “Is yaad neeg yiad tiadtsaad is yaad neeg; is lus teschias yiad siab tua is lus teschias. 11Yiad muaj aab qeeg luj heeb, yiad muaj keb tshais keb nqhes, has yiad muaj kaas mos kis thoos pliaz txhua qhob hubtsig; yiad muaj tej yaad txiab-txiab has txaws ntshai tshwd saw nruas ntug ua tu tuadtxhij ntshai heeb ni. 12Tadsis thaws tseed tsi taw muaj tej qhai, yiad muaj neeg ntez mej has tsidtxod mej; cud yiad coj mej muz tu hub tej tseb saaslaaj has muas mej kia tu hub tej tseb yuajphuas. Lag yiad coj mej muz cuag tej vaajntxwb has tej nudtswb, vid mej yog cob kwg ntseeg kud. 13Thaws qhai yog lus sijhiad zoo tu mej ua tidkhiab qha Txuj Moo Zoo. 14Mej yiadtsud ncu ntsoob tu hub sas, tsi xod txhiaj ua ntej has tas, mej yiad npaaj tes nyaab ha zoo, 15tu qhob kud yiad pus tswbyid tu mej kuas mej txiaj has, mej cob yeesncuas yiad tes tsi tawz mej, has nrhab tsi taw luz tu mej. 16Mej nad mej vaid, mej tej kwbtij, mej tej neejtsaa has mej tej phoojywz yiad muas mej coj muz tu tej nudtswb, has lag yiad muas mej qeetuz tua laidtaa. 17Txhua tuz yiad heed mej vid mej yog cob kwg ntseeg kud. 18Tadsis txiad yog mej is txuj plawshaw los yiad tsi tu saw mej tawshaw muz. 19Mej yiadtsud ua sas nteb nyaj tej keb txodnyed, mej ha yiad taw txujsa.
Lus Nroog Yeluxalees Yiad Puadtsuaj
20“Thaws mej pud tusrog tuaj vij lus nroog Yeluxalees, mej yiad paws has tas tsi nteb lus nroog yiad puadtsuaj. 21Lus sijhiad qhai cob neeg kwg nyos hub xeeb Yudais, cud yiadtsud tsib muz tu pes tej roos; cob neeg kwg nyos hub lus nroog yiadtsud tiad, has cob neeg kwg nyos pes tej yaajsaas, tsi xod tsib muz tu hub lus nroog. 22Tu qhob lus sijhiad qhai yog ‘Hnoos Raws Txid,’ kuas muaj tab rias ni Vaajtswb txujlug has tseg liad. 23Luj sijhiad qhai tej puj kwg hai minyuas, has tej puj kwg muaj minyuas mos yiad txodnyed heeb ni! Vid lus ntajtes na yiad rawg keb txodnyed kiag nkaws ni. Vaajtswb yiad raw txid tu cob neeg na. 24Istxha yiad tuag tu hnab ntaaj hnab rag, has istxha yiad rawg ntez muz tu lwd lus teschias; has lwd yaad neeg yiad tuaj tsuj lus nroog Yeluxalees muz txug hnoos kwg tab rias ni lus sijhiad.
Neeg Leej Tus Yiad Luz
25“Thaws qhai yiad muaj tej yaad txiab txiab tu saw lus hnoos, lus hli has tej hnoosqus. Txhua yaad neeg kwg nyos hub ntajtes na yiad yoos taaz, has ntshai lus suas dej habtxwb ntaad. #Yay 13.10; Exk 32.7; Yaw 2.31; Tsd 6.12-13 26Tej neeg yiad yoo vid ntshai thaws tseed toz tej xwdtxheej kwg yiad tshwdsid luz tu lus ntajtes, tu qhob tej fwjchid saw ntuj yiad ua zug koog. 27Thaws qhai tuadtxhij yiad pud Neeg Leej Tus tshwd saw nruas ntug, niz lus fwjchid has tuz tshwjchid yiad ci ntsaa as.#Dan 7.13; Tsd 1.7 28Thaws taastod chib muaj tej na, mej yiadtsud siab ntsug has tsaa tawshaw, tu qhob txuj keb ciad kig ted luz ze liad.”
Tsos Txib Cua Chib Hlaab Nplooj
29Yexus has is zaaj luz pibtxwb tu cud noog has tas: “Mej sid nuad tsos ntoo txib cua has txhua yaad ntoo. 30Thaws mej pud tej ntoo qhai chib hlaab nplooj, mej paws has tas ted yiad txug lus caij ntuj naag. 31Is yaad nkaws ni qhai, thaws mej pud tej qhai, mej yiad paws has tas Vaajtswb lus Teschias ted luz ze liad.
32“Kud qha tsees tu mej has tas, thaws cob neeg tad na tseed tuag tsi taw taaz, ted xus muaj tej qhai liad. 33Lus ntuj has lus ntajtes na yiad pluj muz, tadsis kud tej luz yiad tsi muaj is lu poos ni.
Yiadtsud Ceebfaaj
34“Mej yiadtsud ceebfaaj, nyos tsaad mej lus sas qawg tu keb noj keb haws, has keb txhiajxees tu lus neej tad na yiad ua tu mej tsi ncu ceebfaaj. 35Tu qhob hnoos qhai yiad luz ntsas tu khws nkaws tej neeg tuadtxhij thoos pliaz lus ntajtes na is yaad ni rooj yej. 36Mej yiadtsud ceebfaaj has zub toz, naj hnoos thob Vaajtswb paas kuas mej nyaj tawz txhua yaad kwg yiad muaj luz na, has mej ha yiad muz siab tawz qhai Neeg Leej Tus lus xusntag.”
37Yexus naj hnoos qha hub lus Tuadtseb, has thaws tsaws ntuj niz muz pw pes Roos Txibntoo Roj. 38Txhua taaskiz siab ntxub, tuadtxhij tuaj noog Yexus qhuas qha hub lus Tuadtseb.
Селектирано:
:
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.