Lukas 15
15
Tuz Yaaj Kwg Pluj Liad
1Muaj is zag cob neeg saw se has cob neeg txhud tuaj noog Yexus qha, 2cob Falixais has cob xisfws kwg qha Vaajtswb txuj Kebcai txiad nthe has tas, “Tuz na nrug cob neeg txhud ua ke has nrug cud noj mo!” 3Yog ni qhai, Yexus ha has is zaaj luz pibtxwb tu cud noog has tas:
4“Mej cob yog tuz twg muaj is puas tuz yaaj, yog is tug pluj liad, tuz tswb yiad ua nyaab? Niz yeej yiad tso cuaj cawd cuaj tuz tu tod haab zaws, has muz nrhab tuz yaaj kwg pluj liad kuas taw. 5Thaws niz nrhab taw liad, niz zoo sas heeb, niz muas tsias hlo tu saw xuspwd, 6has kwb luz tseb. Ces niz hu niz cob phoojywz has tej neeg zej zoz tuaj has has tu cud tas, ‘Mej ca ni nrug kud zoo sas, tu qhob kud ted muz nrhab taw kud tuz yaaj kwg pluj liad!’ 7Is yaad nkaws ni qhai, kud qha tu mej has tas, yog is tug neeg txhud tso niz tej keb txhud tseg liad, cob kwg nyos saw ntuj Ceestsheej yiad zoo sas tu tuz qhai heeb kua ni zoo sas tu cuaj cawd cuaj tuz kwg cud khaab has tas, cud yog neeg ncaajnceeg.
Lus Txaj Kwg Poos Liad
8“Lossis muaj is tug puj muaj kawd lus nyaj, yog is lus poos liad, niz yiad ua nyaab? Niz yiad tias tees, ches tseb, has tshais nrhab txhua qhob kuas taw lus nyaj qhai. 9Thaws niz nrhab taw niz lus nyaj liad, niz hu niz cob phoojywz has tej neeg zej zoz tuaj, has niz has tu cud tas, ‘Kud ted nrhab taw kud lus nyaj kwg poos liad, mej ca ni nrug kud zoo sas!’ 10Is yaad ni qhai, kud qha tu mej has tas, yog is tug neeg txhud tso niz tej keb txhud tseg, Vaajtswb cob tidtswb yiad zoo sas kiag nkaws tu tuz neeg txhud kwg tso niz tej keb txhud tseg.”
Tuz Tus Kwg Ua Yuad Keb Liad
11Yexus has ntxib has tas, “Muaj is tug yiag muaj os tug tus. 12Tuz tus yaw has tu leej vaid has tas, ‘Vaid, thob koj muas koj lus cuastaad cob kwg yog kud feed fais tu kud.’ Leej vaid muas niz lus cuastaad tej kwg yog niz tus, fais tu niz os tug tus. 13Taw os pes hnoos tod qaas, leej tus yaw muas tej kwg yog niz tuz muas taw nyaj, ces niz txiad tsib muz tu lwd lus teschias kes kes liad, niz tsi txuag niz tej nyaj, 14niz ywj sas sib ua dog ua dig, niz muas niz tej nyaj phos taaz liad, thaws qhai muaj keb tshais plaas thoos pliaz lus teschias, niz tsi tshuab daastsi ni liad. 15Niz ha muz nrug is tug yiag hub lus nroog qhai nyos, tuz qhai txis niz muz zub npua tod tes. 16Niz xaab noj cob plhaws tawd kwg npua noj, kuas tsaw niz plaas los tsi muaj tuz twg pus tu niz noj. 17Thaws niz ncu dheeb txug has tas, ‘Kud vaid cob tus zug muaj noj muaj haws tsi taaz, ua nyaab kud yiad tuaj yoo tshais qhai na? 18Kud yiad rob muz cuag kud vaid has has tas, “Vaid, kud ua txhud tu Vaajtswb has ua txhud tu koj liad. 19Kud tsi tsidnyog ua koj leej tus liad; thob koj suab kud is yaad ni kud yog koj is tug tus zug nyaz.” ’ 20Ces niz txiad siab tseez tawgkeb rob muz cuag niz vaid.
“Thaws niz luz tsi taw txug kwg tseed nyos hob kes, niz vaid pud niz has hlus niz heeb; niz vaid dha loo muz puas nkaws leej tus hna. 21Tuz tus has tu leej vaid has tas, ‘Vaid, kud ua txhud tu Vaajtswb has ua txhud tu koj liad. Kud tsi tsidnyog ua koj leej tus liad!’ 22Tadsis leej vaid has tu cob tusqhe has tas, ‘Mej kizkag nqaa ceb rig tsho nteb kwg zoo zoo tuaj tu niz hnaab. Nqaa nplhais tuaj tu niz coj, muas khaw tuaj tu niz raws. 23Has muz muas tuz minyuas nyuj kwg rog rog coj luz tua ua is rooj mo tu tuadtxhij noj ua keb zoo sas. 24Tu qhob kud leej tus na ted tuag liad, tadsis nizna niz caj rob luz; niz ted pluj liad, tadsis nizna niz rob luz.’ Ces tuadtxhij txiad noj haws zoo sas.
25“Thaws qhai tuz tus hlus nyos tod tes. Niz rob tod tes luz txug qhais toz tseb, niz hnob suas raaj suas nkawj nogncaas has suas seeb ceb hub tseb tuaj. 26Niz hu is tug tusqhe tuaj, has noog has tas, ‘Cud ua daastsi hub tseb?’ 27Tuz tusqhe qhai tes has tas, ‘Koj tuz kwb rob qaas luz liad. Koj vaid tua tuz minyuas nyuj rog rog tu koj tuz kwb noj, tu qhob koj tuz kwb rob luz, niz tseed noj qaas nyos zoo.’ 28Tuz tijlawg chid heeb, niz tsi yeed muz tu hub tseb. Niz vaid ha tiad tuaj thob kuas niz muz hub tseb. 29Niz tes niz vaid has tas, ‘Vaid, koj sid xaab nuad, kud ua hujlwd tu koj is yaad ni tuz qheb taw ntaw xyoos, kud tsi taw tiab koj is zag ni. Koj ted tsi pus is yaad daastsi tu kud. Txiad yog is tug nyuas tshis los koj ted tsi muas tu kud tua pus kud cob phoojywz noj is pluag zoo sas ni! 30Tadsis koj leej tus na, coj koj tej nyaj muz txheeb nadntab has phos phuad laad taaz. Niz rob qaas luz, koj tseed muas tuz minyuas nyuj rog rog tua tu niz noj has!’ 31Leej vaid tes has tas, ‘Mitus, koj yeej istxwd nrug kud nyos, txhua yaad kwg kud muaj puabtsig yog koj ni. 32Yeej tsidnyog pes ua is rooj mo noj has zoo sas, tu qhob koj tuz kwb ted tuag liad, tadsis nizna niz caj rob luz, niz ted pluj liad, tadsis nizna niz rob luz.’ ”
Селектирано:
Lukas 15: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.