Yawhaas 1
1
Txujlug Kwg Ciad Neeg Txujsa
1Thaws chibkees Txujlug yeej muaj nyos liad; Txujlug qhai istxwd nrug Vaajtswb nyos, has Txujlug qhai yog Vaajtswb. 2Thaws chibkees Txujlug qhai yeej istxwd nrug Vaajtswb nyos. 3Vaajtswb kuas niz tsid is puas tsaab yaad hubtsig; is puas tsaab yaad qhai tsi muaj is yaad kwg tsi yog niz tsid ni. 4Txujlug qhai yog lus hawbpawz txujsa,#1.4 Txujlug qhai yog lus hawbpawz txujsa; lossis ua kuas txujsa cos ruaj tu qhais Txujlug. has txujsa qhai yog qhob kaaj tu neeg pud keb. 5Qhob kaaj qhai ci tuaj tu hub qhob tsaws, has qhob tsaws lod tsi taw qhob kaaj kuas tsaws.
6Vaajtswb txis is tug yiag kwg niz lus npe hu ua Yawhaas. 7Niz luz qha tu neeg tuadtxhij txug qhob kaaj, kuas tuadtxhij taw hnob Txujlug qhai has luz ntseeg. 8Yawhaas tsi yog qhob kaaj; niz tsuas luz qha qhob kaaj nyaz. 9Qhob kaaj qhai yog qhob tsees kwg luz tu hub lus ntajtes na has ci tu txhua yaad neeg pud keb.
10Txujlug qhai ted luz nyos hub ntajtes na liad, has Vaajtswb kuas niz tsid lus ntajtes, tadsis neeg ntajtes tsi paws niz. 11Niz luz tu hub niz lus teschias has niz yaad neeg tsi leez yuab niz. 12Tadsis cob neeg kwg leez yuab niz has ntseeg niz, niz pus cud muaj cai luz ua Vaajtswb cob minyuas. 13Vaajtswb tuas tuz ha yog tuz kwg muas cud yug ua niz cob minyuas, tsi yog rias ni neeg istxwd muaj minyuas kwg yog muaj nad muaj vaid yug.
14Txujlug qhai taw luz yug ua neeg, niz pub npho txuj hmoob hlus, niz yog qhob tsees, has niz nyos nruasnraas qhais pes. Pes pud niz tuz tshwjchid ci ntsaa as, Leej Vaid pus tuz tshwjchid qhai tu niz, tu qhob niz yog leej Vaid tuas tug Tus.
15Yawhaas qha tuz qhai zaaj tu tuadtxhij. Yawhaas has nrob nrob has tas, “Tuz yiag na yog tuz kwg kud ted qha tu mej liad has tas, ‘Niz yiad rias kud qaas luz, tadsis niz muaj fwjchid luj kua kud, tu qhob niz yeej istxwd muaj nyos ua ntej yug kud liad.’ ”
16Luz qhais niz txuj hmoob hlus kwg npluas mas, Niz has food kooshmoob tu pes tuadtxhij, pus kooshmoob tu pes is zag dlaw tu is zag. 17Vaajtswb muas txuj kebcai tu pes luz qhais Mawxes, tadsis niz muas txuj hmoob hlus has qhob tseed tu pes luz qhais Yexus Khetos. 18Yeej tsi taw muaj tuz twg pud Vaajtswb is zag ni. Tsuas yog leej Tus kwg yog Vaajtswb has nyos qhais leej Vaid is saas, niz qha Vaajtswb tu tuadtxhij paws nyaz.
Yawhaas tuz Kwg Muas Neeg Ua Kebcai Raws Dej tej Luz Qha
(Mathais 3.1-12; Malakaws 1.1-18; Lukas 3.1-18)
19Na yog Yawhaas tej luz tidkhiab: Cob Yudais cob nudtswb kwg nyos hub lus nroog Yeluxalees tso cob pobthiaj has cob Levis qeetuz muz noog Yawhaas has tas, “Koj yog tuz twg?”
20Yawhaas tsi zais ni has niz qha tsees tu cud has tas, “Kud tsi yog tuz Mexiyas.”
21Cud noog has tas, “Koj yog tuz twg? Koj puas yog Eliyas?”
Yawhaas tes has tas, “Kud tsi yog.”
Cud noog has tas, “Koj puas yog tuz kwg ceb Vaajtswb luz?”#1.21 Tuz kwg ceb Vaajtswb luz: Yog tuz kwg toz kuas tshwd luz has tshaajtiad has tas tuz Mexiyas yiad luz.
Yawhaas tes has tas, “Kud tsi yog.”
22Cud has tas, “Koj qha tu pes nuad koj yog tuz twg tag, pes has paws rob muz qha tu cob neeg kwg txis pes tuaj. Koj has tas koj yog tuz twg?”
23Yawhaas tes cud rias ni Yaxayas kwg yog tuz ceb Vaajtswb luz saw tseg ni na:
“Kud yog tuz kwg has nrob nrob tod roos mojsaas qhua tuaj has tas:
‘Khu keb kuas ncaaj toz tuz Tswb!’ ”
24Cob neeg kwg cob Falixais txis muz qhai, 25cud#1.24-25 Cob neeg kwg cob Falixais txis muz qhai, cud; lossis Cob neeg kwg txis muz qhai puabtsig yog cob Falixais. noog Yawhaas has tas, “Yog koj has tas koj tsi yog tuz Mexiyas, tsi yog Eliyas, has tsi yog tuz kwg ceb Vaajtswb luz, vid nyaab koj txiad muas neeg ua kebcai raws dej?”
26Yawhaas tes has tas, “Kud muas neeg ua kebcai raws dej tag, tadsis muaj is tug nrug mej nyos qhais na, mej ted tsi paws niz. 27Niz yog tuz kwg taastod rias kud qaas luz, tadsis kud ted tsi tsidnyog dias niz txuj nyuas hlua khaw.”
28Tej xwd na muaj hub lus zoz Npethanis kwg nyos qhais ntug dej Yawladees saas hnoostuaj, qhob chia kwg Yawhaas muas neeg ua kebcai raws dej.
Vaajtswb tuz Minyuas Yaaj
29Hnoos tod qaas, Yawhaas pud Yexus tawgkeb tuaj tu qhais niz, ces Yawhaas has tas, “Tuz na yog Vaajtswb tuz Minyuas yaaj kwg yiad ris neeg ntajtes lus txid! 30Tuz na yog tuz kwg kud qha has tas, ‘Muaj is tug taastod rias kud qaas luz, niz muaj fwjchid luj kua kud, tu qhob niz yeej istxwd muaj nyos ua ntej yug kud liad.’ 31Kud istxwd tsi taw paws has tas niz yog tuz twg, tadsis kud luz muas neeg ua kebcai raws dej kuas cob Yixalayees paws niz.”
32Yawhaas ua tidkhiab has tas, “Kud pud Vaaj Ntsujplig zoo is yaad ni tuz nquas luz saw ntuj luz nyos saw niz. 33Kud istxwd tsi taw paws has tas niz yog tuz twg, tadsis Vaajtswb tuz kwg txis kud luz muas neeg ua kebcai raws dej has tu kud tas, ‘Koj yiad pud Vaaj Ntsujplig luz tu saw is tug yiag; niz yog tuz kwg yiad muas neeg ua kebcai raws luz qhai Vaaj Ntsujplig tuz Diashub.’ ” 34Yawhaas has tas, “Kud tuz pud niz liad, has kud qha tu mej has tas, niz yog Vaajtswb leej Tus.”
Yexus Thiaj Cob Thwjtid
35Hnoos tod qaas, thaws kwg Yawhaas taastod nrug niz os tug thwjtid siab ua ke kua, 36thaws qhai Yawhaas pud Yexus tawgkeb tuaj. Yawhaas has tas, “Tuz qhai yog Vaajtswb tuz Minyuas yaaj!”
37Yawhaas os tug thwjtid hnob Yawhaas has ni qhai, ces ostug txiad nrug Yexus muz liad. 38Yexus tig luz pud ostug rias niz qaas, has Yexus noog ostug has tas, “Mej nrhab daastsi?”
Ostug tes has tas, “Lanpis (Lu luz na txhais has tas ‘Xisfws’), koj su qhob twg?”
39Yexus tes has tas, “Mej ca ni luz nuad.” (Thaws qhai yog plaws teeb hnoos qaij.) Yog ni qhai ostug txiad nrug Yexus muz has pud qhob chia kwg Yexus nyos, has hnoos qhai ostug nrug Yexus nyos.
40Os tus kwg hnob Yawhaas has has rias Yexus qaas muz qhai, muaj is tug yog Ximoos Petus tuz kwb Aadales. 41Aadales txiad muz has tu niz tuz tijlawg Ximoos has tas, “Pes ted ntsis tuz Mexiyas liad.” (Lu luz Mexiyas txhais has tas “Khetos.”) 42Ces Aadales ha coj Ximoos muz cuag Yexus.
Yexus nuad ntsoob Ximoos has has tas, “Koj lus npe hu ua Ximoos kwg yog Yawhaas leej tus, tadsis yiad muas koj hu ua Kefas.” (Lu luz Kefas has Petus txhais has tas “lus poszes.”)
Yexus Hu Filis has Nathana-ees
43Hnoos tod qaas Yexus yiad muz pes xeeb Kalilais. Niz muz pud Filis has niz hu Filis has tas, “Koj ca ni nrug kud muz!” 44(Filis nyos hub lus nroog Npexaidas kwg Aadales has Petus ostug nyos.) 45Filis muz has tu Nathana-ees has tas, “Pes ted ntsis Yexus kwg yog neeg Naxales kwg yog Yawxej tuz tu kwg Mawxes saw has txug niz hub phaw ntiab Kebcai has cob kwg ceb Vaajtswb luz saw has txug niz liad.”
46Nathana-ees noog Filis has tas, “Puas muaj is yaad daastsi zoo kwg tuaj hub lus nroog Naxales tuaj?”
Filis tes has tas, “Koj ca ni tuaj nuad.”
47Thaws Yexus pud Nathana-ees taastod tuaj cuag niz, Yexus txiad has txug Nathana-ees has tas, “Tuz na yog is tug neeg Yixalayees tag; niz yeej tsi taw has is lu luz ntxaz lwd tuz ni!”
48Nathana-ees noog Yexus has tas, “Ua caaz koj txiad sis paws kud liad?”
Yexus tes has tas, “Kud ted pud koj thaws koj nyos hub qaas tsos txib cua ua ntej kwg Filis hu koj liad.”
49Nathana-ees tes has tas, “Xisfws, koj yog Vaajtswb leej tus! Koj yog cob Yixalayees tuz Vaajntxwb tag!”
50Yexus has tu Nathana-ees has tas, “Vid kud has tu koj tas, kud ted pud koj nyos hub qaas tsos txib cua, koj ha ni ntseeg los? Koj tseed yiad pud tej yaad tseedcees kua qhob na has!” 51Has Yexus has tu ostug tas, “Kud qha tsees tu mej has tas, mej yiad pud rooj ntug qhes has pud Vaajtswb cob tidtswb nce muz has nqaiz luz saw Neeg Leej Tus.”
Селектирано:
Yawhaas 1: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.