Rut 4
4
Boas logolodeba problema
1Boas laka la itamata heban tama la sidade no toe lato di. La whatin sini, baibain makailuluki sira la sidade sini bolu hmutu ini ehe le'a. Nata nao nata, eto familia se teni nikin di direitu selu mutu' para beki kaben nua, Rut'to nau-osi lato. Entaun Boas bolu eto ehe, "Maun! Mai to'ela la ini wae! aku presiza kami." No kii sini'o laka to'e di lato. 2Depois Boas oda le'a bu'u sira, kii welise, nikibo sai sasina nikin ehe, "Senhor sira mai to'e la ini nike dene le'a sini.'' I sira'o toe.
3I Boas konta la familia semo di direitu selu mutu' la Rut ehe, "Maun, hira hatii teha Rea roan semo hira famila Elimeleke niana nauda? Lain, waihira rea luba, eto lakala Rea Moabe, depois eto mata lato di. Naueti eto ona'atan otawalu senhora Noemi, whali osi deba lato, no hama'a hoka rea sini. 4Dene nausini, aku'o ehe hian wailiu aku ehemesu ene la maun, tanba maun di direito para 'selu mutula nike ala rea sini. Tanba maun nua Elimeleke hatii buseta'e. Nikin se maun hama'a soi Rea sini, ehemesu'la, la ba'an le'a bu sira sini wasana, para sira sai botu sasina. Nikin se nauni, ehemesu la sasin sira wasana, tanba aku hama'a soi. Toi osigodina maun di direito enena. Masi maun baru, entaun direitu sine dabe la aku."
No kii sini hatana, "godi deba. aku soi."
5No Boas ehe teni, "dabeki lale mara, masi maun tenki teha, se waihira hira soi rea sini, hira'o tenki kaben nua ona'ata Moabe, naina Rut. Tanba eto kaben nua Elimeleke anan se mata deba ni. Nikin maun tenki kaben nua eto, nikibo ia jerasaun la eto askai se mata deba ni. No no nikibo, eto rai riku-soin kosini sini da sai osi la hira familia."
6Kii sini hatana, ''Se nausini, dabeki lale mara, aku baru soi. Tanba se aku soi sini sin au Rea no riku-soin diha ma'adeba. Au riku-soin nua au ana hatii sai warikaka Elimeleke na eto jerasauna. Nikin, hian waliu aku dalika soi. Beki ware'ana Boas raba selu mutu rea sini no kaben nua ona'ata sini."
7(Lain enendia, waihira kii Israel hama'a entrega sira diretuna naubotu sasaan se kii olin soi, sira hasai sira sandailia ia la kii sini. Nikin naubotu sinal se, sira entrega deba sira direituna.)#Deuteronomio 25:9
8Nikin la tempu sini kii sini entrega eto diretuna la Boas ehe, "Hira raba soi," eto'o hasai sandalias ia la Boas i lamo le'abu sira wasana.
9No Boas ehela le'abu sira nua kii tauderi lato ehe, "Senhor sira tauderi sai sasina la lhara seeti. Direitu sini dabe deba la aku. Aku ehemesula ehe, aku hama'a selu mutula Noemi sasaan kosini semo Elimeke nua anan asukai sira Kilion nua Malon se mata deba ni. 10Au hama'an daho'o Rea raba, tanba aku'o kaben nua ona'ata kii Moabe, Rut sini Malon ona'atan otawalu na. Aku hama'a kaben nua eto, tanba aku selu mutu deba direitu sini. I nikin, kitarua anan beki sai Malon jerasauna. Eto familia nua kii kose la aldeia hati daluha eto nain. Uersiran sai sasina la Lhara seti."#Deuteronomio 25:5-6
11No le'abu sira la sidade sini nua kii tauderi hmutu ini lato di hatana ehe, "Godi hata'e! Kita eihai mega kita mata rasik kitao sai sasina.
Ona'ata seri tama la hira uma,
NAI lo eto sai naubotu Rakel nua Leia.
Tanba kii Israel tauderi mai osi sira uarua Jerasauna.
Nai lo hira sai kii heban la Efrata,
i sai kii seri nain hiana la sidade Belem.#Jenesis 29:31
12Neko tulun, Nai ia hira, anan mai toi osi ona'ata otarae sini,
Nikin kami uarua jerasaun sai olina,
Naubotu hira luli Peres jerasauna,
Juda nua Tamar ana'na."
Boas nua Rut hetan deba anan
13Entaun Boas kaben nua Rut. Waihira sira uarua Ala'ini, Nai loke Rut anawhatin, nikibo eto beki na'i oli. No eto to'e daha anan asukai se.
14To'e mega daha, sira la Belem sini ehemesu la Noemi ehe,
"Hahii la NAI!
Tanba eto ia deba jerasaun la ka,
nikobo ga famila naina dalika diha.
Para diha'ana sini rema-wairua sai kii heban la Israel.
15Beki diha'ana sini
lo ka senti whali hila la otarae!
Beki diha'ana sini
thau mata la ka waihira ka ba'a deba!
Tanba ga ota-mhori semo to'e daha ga bu'ana sini,
khina deba eto domin la ka.
Ota-mhori sini,
ia la ka hiawailiu duke ana asukai woalima resikairua.''
16Noemi itila diha'ana sini, no kuidadu eto naubotu eto anan rasik.
17I ona'ata sira la sidade ehemesu ehe, "Naueti Noemi naubotumo di hila deba anan. Sini daresiho!" I sira ia nain la diha'ana sini 'Obede'.
Waihira Obede heba mai, di ana-asukai se, naina Jesse. I Jesse di ana-asukai se, naina David, semo sai liurai.
18Kosini'ana, bu-luli Peres jerasaun'na:
Peres anana Esron
19Esron anana Raun
Raun anana Aminadabe.
20Aminadabe anana Nason.
Nason anana Salmon
21Salmon anana Boas
Boas anana Obede.
22Obede anana Jesse.
Jesse anana liurai David.
Селектирано:
Rut 4: BNAU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Wycliffe Timor-Leste © 2025 Wycliffe Bible Translators Inc