یوحنا 5
5
عَلیل کیشی‌نینگ شفاسی
1بیر مُدّتدن سورا، یهودی‌لارینگ بیر عیدی ایدی و عیسا، اورشلیم شَهرینه گئتدی. 2اورشلیم شَهرینده، ’قویون دروازه‌سی‘ یانیندا، بیر حوض وار کی آرامی دیلده، اونا ’بِیت‌حِسْدا‘ دئییلیر و بئش ایوان واری. 3چوخ عَلیل آداملار اؤردا اوزانیرلاردی، یعنی کورلار، آخساق‌لار و فَلج‌لَر. اوللار گؤزله‌ییرلَردی تا سو تَرپنه، 4بو سَبریه کی اوللار گمان ائدیرلَردی کی هر مُدّتدَن بیر، بیر فرشته تارئ طَرفیندَن گلیر و سویو تَرپدیر؛ سویونگ تَرپنمکیندَن سورا، اَوّلکی آدام کی حوض ایچینه گئدیردی، بوتون مَریض‌لیگ‌لَریندن شفا توتیردی. 5اؤردا بیر کیشی وار ایدی کی اوتوز سَکّیز ایل ایدی کی عَلیل ایدی. 6اوندا کی عیسا اؤنو اؤردا دؤشولو گؤردو و بیلدی کی چوخ وخت دیر کی اؤردا دیر، بئلَسینه دئدی: «سئیرَینگ شفا توتانگ؟» 7عَلیل کیشی عیسایا جواب وئردی: «آقا، منده هئچ‌کَس یوخ کی سو تَرپننده، منی حوض ایچینه سالا، من اؤزومو اؤرایا ائتیردَننچاز، مندَن ایلَری بیر آیری آدام حوض ایچینه گئدمیش.» 8عیسا اؤنا دئدی: «تور آیاقی، تَک و تولینگی ییغ و یولا دؤش.» 9او کیشی ائله او آن شفا توتدو، تَک و تولینی ییغدی و یولا دؤشدو.
او گؤن، یهودی‌لارینگ مُقدّس شنبه‌سی گؤنو ایدی. 10پس یهودی‌لارینگ باشی بویوک‌لَری او کیشیه کی شفا توتموشدو دئدیلَر: «بوگؤن مُقدّس شنبه گؤنو دور، سنه جایز ده‌ییل کی تَک و تولینگی آلانگ دالینگا آپارانگ.» 11آما کیشی اوللارا جواب وئردی: «منی شفا وئرَن آدام، منه دئدی: ”تَک و تولینگی ییغ و یولا دؤش.“» 12اوندان خبر آلدیلار: «او آدام کی سنه دئدی: ”تَک و تولینگی ییغ و یولا دؤش،“ کیم دیر؟» 13شفا توتان کیشی هئچ جواب یوخیدی کی اوللارا وئره، بو سَبریه کی عیسا او شلوغ ایچینده ناپید اولموشدو.
14اوندان سورا، عیسا او کیشی‌یی مَعبدده بولدو و بئلَسینه دئدی: «باخ، خوب اولموشانگ! داها گُناه ائدمه تا بوندان بدتَر باشینگا گلمه‌یه.» 15او کیشی گئتدی و یهودی‌لارینگ باشی بویوک‌لَرینه دئدی کی بئلَسینی شفا وئرَن آدام، عیسا ایمیش.
اوغول اِقتداری
16بو سَبریه کی عیسا بو ایشلَری یهودی‌لارینگ مُقدّس شنبه‌سی گؤنونده گؤروردو، یهودی‌لارینگ باشی بویوک‌لَری عیسایا جَفا ائدیرلَردی. 17آما عیسا اوللارینگ جوابینی بئله وئردی: «منیم گؤیده‌کی بووآم ایندی‌یانچاز ایش گؤرور، من ده ایش گؤرورَم.» 18بو خاطره ایدی کی یهودی‌لار ایلَرتردن آرتیق اؤنونگ اؤلدورمَکی قولونجوندا ایدیلَر، چونکی عیسا نه فقط مُقدّس شنبه گؤنونونگ قانونینی قیریردی، بلکی حتّی تارئ‌یی، اؤز بووآسی چاغیریردی و بئله اؤزونو، تارئ اینان بیر ائدیردی.
19عیسا یهودی‌لارینگ باشی بویوک‌لرینه دئدی: «گرچَکینی سیزه دئییرم، اوغول اؤز یانیندان هئچ ایش گؤره بیلمه‌ییر به‌غیری او ایشلَر کی گؤزو اینن گؤرور کی گؤیده‌کی بووآ او ایشلَری ائدیر. هَر ایش کی گؤیده‌کی بووآ گؤرور، اوغول دا ائله او ایشی گؤرور. 20گؤیده‌کی بووآ، اوغولی چوخ سئیر و واری او ایشلَری کی اؤزو ائدیر، اوغولا گؤرسَدیر و بوندان بویوکتر ایشلَر ده اؤنا گؤرسَدَر تا سیز تَعجّب ائدَینز. 21ائله اوله‌یین کی گؤیده‌کی بووآ، اؤلو‌لَری دئرّیدیر و اوللارا زندلیگ وئریر، ائله اوله‌یین ده اوغول او آداملارا کی سئیر، زندلیگ وئریر. 22گؤیده‌کی بووآ هئچ کَسه حکم ائدمه‌ییر بلکی بوتون حکم ائدمک ایشینی اوغولا تاپشیرمیش، 23تا واری خَلخ اوغولا حُرمَت ائدَلَّر، ائله اوله‌یین کی گؤیده‌کی بووآیا حُرمَت ائدیرلَر. هَر کَس کی اوغولا حُرمَت ائدمئیه، بووآیا دا کی اوغلو یوللامیش حُرمَت ائدمئیر.
24«گرچَکینی سیزه دئییرم، هَر کَس منیم سؤزلَریمی ائشیده و منی یوللایان تارئ‌یا ایمان گتیره، اَبَدی زندلیگ واری. او محکوم اولماز بو سَبریه کی او، اؤلومدن زندلیگه کؤچموش. 25گرچَکینی سیزه دئییرم، بیر زامان گلیر و ائله ایندی ده گلمیش کی اؤلولَر تارئ اوغلونونگ سَسینی ائشیده‌رلَر و ائشیدَنلَر دئرّیلَرلَر. 26چونکی ائله اوله‌یین کی گؤیده‌کی بووآ زندلیگ سَرچشمه‌سی دیر، اوغولا دا عَطا ائدمیش تا اوغول دا زندلیگ سَرچشمه‌سی اولا 27و اوغولا اِقتدار وئرمیش تا حکم ائده، بو سَبریه کی اوغول ائله انسان اوغلو دیر. 28بو گپ‌لَردن تَعجّب ائدمه‌ینز، بیر زامان گلیر کی واری اوللار کی مَزارلار ایچینده دیرلَر، اوغول سَسینی ائشیده‌رلَر 29و چیخه‌رلَر یازّیا. اوللار کی عَمل‌لَری خوب ایمیش، دئرّیلَرلَر تا اَبَدنچاز زندلیگ ائدَلَّر و اوللار کی عَمل‌لَری پیس ایمیش، دئرّیلَرلَر تا محکوم اولالّار.
30«من اؤزومدن هئچ ایش گؤره بیلمه‌ییرَم بلکی ائشیتدیگیمه گؤره حکم ائدیرَم. من عِدالت اینن حکم ائدیرم، بو سَبریه کی اؤز سئدیگیم قولونجوندا ده‌ییلم، بلکی منی یوللایان تارئ‌نینگ سئدیگی قولونجوندایام. 31اگر منیم اؤزوم تَک، اؤز باره‌مده گواهلیگ وئرسَم، گواهلیگیم اعتبارلی ده‌ییل. 32بیری داها وار کی منیم باره‌مده گواهلیگ وئریر و من بیلیرَم کی اؤنونگ گواهلیگی منیم باره‌مده اعتبارلی دیر. 33سیز بیر پارا آدام یوللادینز یحیا یانینا و او، حَقیقته گواهلیگ وئردی. 34بئله ده‌ییل کی من انسان وئردیگی گواهلیگه احتیاجیم اولا، بلکی بوللاری دئییرم تا سیز نجات توتاینز. 35یحیا بیر چیراغ له‌یین ایدی کی یانیردی و ایشّیق وئریردی و سیز سئیردینز کی بیر مُدّت اؤنونگ ایشّیقینده شادلیگ ائدَینز. 36آما منده بیر گواهلیگ وار کی یحیا گواهلیگیندن بویوکتر دیر: او ایشلَر کی گؤیده‌کی بووآ منه وئرمیش تا یئرینه ائتیشتیرَم، یعنی ائله بو ایشلَر کی گؤرورَم، منیم باره‌مده گواهلیگ وئریر کی گؤیده‌کی بووآ منی یوللامیش. 37و منی یوللایان گؤیده‌کی بووآنینگ اؤزو منیم باره‌مده گواهلیگ وئرمیش. سیز هئچ زامان اؤنونگ سَسینی ائشیتمه‌میشَینز و هئچ زامان شکلینی گؤرمه‌میشَینز 38و اؤنونگ کلامی سیزینگ ایچینزده مَنزل ائدمه‌میش، بو سَبریه کی سیز منه کی او یوللامیش ایمان گتیرمئیرَینز. 39سیز مُقدّس یازیلی‌لاری دقّت اینن اوخیراینز، بو سَبریه کی گمان ائدیرَینز کی اوللارینگ اوخوماگی اینان اَبَدی زندلیگه ائتیشیرَینز؛ بوللار ائله او یازیلی‌لار دیرلار کی منیم باره‌مده گواهلیگ وئریرلَر، 40آما حَلی ده سَمئیرَینز منیم یانیما گلَینز تا اَبَدی زندلیگ وارینز اولا.
41«من آداملار ائدَن عِزّت قولونجوندا ده‌ییلَم، 42آما سیزی تانیرام و بیلیرَم کی اؤره‌کینزده بیر ذرّه مُحبّت ده تارئ‌یا یوخینز. 43من گؤیده‌کی بووآم آدیندا گلمیشَم و سیز منی قبول ائدمه‌ییرَینز. آما اگر بیر آیری آدام اؤز آدیندا گلسه، اؤنو قبول ائده‌رَینز. 44نه‌یین ایمان گتیره بیلیرَینز وختی کی واحد تارئ ائدَن عِزّت یئرینه، آداملار ائدَن عِزّتینگ قولونجوندایاینز؟ 45گمان ائدمَینز کی گؤیده‌کی بووآ حُضوروندا سیزی مُتَّهم ائدَن منم. سیزی مُتَّهم ائدَن موسای پیغمبر دیر، ائله او کی اؤنا امید باغلامیشاینز. 46اگر گرچَکدَن موسایا اینانسایدینز، مَنه ده ایناناردینز، بو سَبریه کی او منیم باره‌مده یازمیش. 47آما اگر سیز اؤنونگ یازیلی‌لارینا اینانمئیراینز، نه‌یین منیم سؤزلَریمه ایناناراینز؟»
Селектирано:
یوحنا 5: QII
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
@ 2024 Korpu Company