Psalms 74
74
1အို ဘုရားရှင်၊ ကိုယ်တော်သည် အဘယ်ကြောင့် ကျွန်ုပ်တို့အား ထာဝရငြင်းပယ်ခဲ့သနည်း။ ကိုယ်တော်၏စားကျက်မှသိုးများအပေါ် ကိုယ်တော်သည် အဘယ်ကြောင့် အမျက်ဒေါသထွက်သနည်း။ 2ရှေးကာလက ကိုယ်တော်ဝယ်ယူထားသော ကိုယ်တော်၏လူမျိုးတော်၊ အမွေတော်အဖြစ် ကိုယ်တော်ရွေးနုတ်တော်မူသော အမျိုးအနွယ်နှင့် ကိုယ်တော်ကိန်းဝပ်တော်မူခဲ့ရာ ဇိအုန်တောင်ကို သတိရတော်မူပါ။ 3ထာဝရပျက်စီးဆိတ်သုဉ်းသောအရပ်သို့ ခြေဦးလှည့်တော်မူပါ။ ရန်သူတို့သည် သန့်ရှင်းရာဌာနတော်ထဲ၌ ရှိသမျှတို့ကို ဖျက်ဆီးကြပါပြီ။ 4ကိုယ်တော်၏ရန်သူတို့သည် ကိုယ်တော်၏ တွေ့ဆုံစည်းဝေးရာနေရာတွင် အော်ဟစ်ကြပါ၏သည်။ သူတို့၏အောင်လံများကို အမှတ်လက္ခဏာအဖြစ်စိုက်ထူကြပါပြီ။ 5သူတို့သည် သစ်ပင်ထူထပ်သောအရပ်တွင် ပုဆိန်ကိုဝှေ့ယမ်းသောသူကဲ့သို့ဖြစ်ပြီး 6ယခုတွင် ဗိမာန်တော်ထဲမှ ပန်းပုရုပ်အားလုံးတို့ကို ပုဆိန်နှင့်တူတို့ဖြင့် ရိုက်ချိုးကြသည်။ 7သူတို့သည် ကိုယ်တော်၏သန့်ရှင်းရာဌာနတော်ကို မီးရှို့ကြပါသည်။ ကိုယ်တော်၏နာမတော်တည်ရာအရပ်ကို မြေသို့ကျသည့်တိုင်အောင် ရှုတ်ချကြပါသည်။ 8“သူတို့ကို အပြီးတိုင်ချေမှုန်းကြမည်”ဟု မိမိတို့စိတ်ထဲ၌ ဆိုကြပါသည်။ တိုင်းပြည်တွင်ရှိသမျှသော ဘုရားရှင်၏ဝတ်ပြုကိုးကွယ်ရာဌာနတို့ကို မီးရှို့ပစ်ကြသည်။ 9ကျွန်ုပ်တို့၏အမှတ်လက္ခဏာများကို ကျွန်ုပ်တို့မမြင်ရပါ။ အရိယာသူတော်စင်လည်း မရှိတော့ပါ။ မည်မျှအထိ ဤသို့ဖြစ်မည်ကိုသိသောသူလည်း ကျွန်ုပ်တို့ထဲတွင်မရှိပါ။ 10အို ဘုရားရှင်၊ ရန်သူများသည် မည်မျှကြာအောင် ကိုယ်တော်အား လှောင်ပြောင်နေကြပါမည်နည်း။ သူတို့သည် ကိုယ်တော်၏နာမတော်ကို အစဥ်အမြဲ မထီလေးစားပြုနေမည်လော။ 11ကိုယ်တော်၏လက်တော်၊ ကိုယ်တော်၏လက်ယာလက်တော်ကိုပင် အဘယ်ကြောင့် ရုပ်သိမ်းတော်မူသနည်း။ လက်တော်ကို လျှိုထားရာမှထုတ်၍ သူတို့ကို အပြီးသတ်သုတ်သင်တော်မူပါ။ 12သို့သော် ဘုရားရှင်သည် ရှေးကာလမှစ၍ ကျွန်ုပ်၏ရှင်ဘုရင်ဖြစ်တော်မူသည်။ ကိုယ်တော်သည် ကမ္ဘာမြေပေါ်၌ ကယ်တင်ခြင်းအမှုကို ဆောင်ယူတော်မူလာသည်။ 13ကိုယ်တော်သည် တန်ခိုးတော်အားဖြင့် ပင်လယ်ကိုပိုင်းခြား၍ ရေထဲရှိသတ္တဝါကြီးတို့၏ဦးခေါင်းကို ခွဲတော်မူသည်။ 14ကိုယ်တော်သည် လဝိသန်၏ဦးခေါင်းတို့ကို ကြေမွစေ၍ ကန္တာရသတ္တဝါတို့အား စားစရာအဖြစ်ပေးတော်မူသည်။ 15ကိုယ်တော်သည် စမ်းရေနှင့်စမ်းချောင်းကို ပေါက်ထွက်စေ၍ အမြဲစီးဆင်းသောမြစ်များကို ခန်းခြောက်စေတော်မူသည်။ 16နေ့ကို ကိုယ်တော်ပိုင်တော်မူသကဲ့သို့ ညကိုလည်း ကိုယ်တော်ပိုင်တော်မူသည်။ ကိုယ်တော်သည် လနှင့်တကွ နေကိုတည်စေတော်မူသည်။ 17ကိုယ်တော်သည် ကမ္ဘာမြေကြီး၏ နယ်နိမိတ်အားလုံးကို သတ်မှတ်၍ နွေရာသီနှင့်ဆောင်းရာသီကို ဖြစ်ပေါ်စေတော်မူသည်။ 18အို အရှင်ဖြစ်သောဘုရားရှင်၊ ရန်သူသည် ကိုယ်တော့်ကိုကဲ့ရဲ့ပြစ်တင်သည်ကိုလည်းကောင်း၊ မိုက်မဲသောသူသည် ကိုယ်တော်၏နာမတော်ကို မထီလေးစားပြုသည်ကိုလည်းကောင်း အောက်မေ့တော်မူပါ။ 19ကိုယ်တော့်ချိုးငှက်၏အသက်ကို သားရဲတိရစ္ဆာန်အား ပေးတော်မမူပါနှင့်။ ကိုယ်တော်၏အဖိနှိပ်ခံရသော လူတို့၏အသက်ကို ထာဝရမေ့လျော့တော်မမူပါနှင့်။ 20ပဋိညာဉ်ကို ကြည့်ရှုဆင်ခြင်တော်မူပါ။ အကြောင်းမူကား ကမ္ဘာမြေကြီးပေါ်ရှိ မှောင်မိုက်သောအရပ်တို့သည် ရက်စက်ကြမ်းကြုတ်မှုကျက်စားရာ နေရာသက်သက် ဖြစ်သည်။ 21ဖိနှိပ်ချုပ်ချယ်ခြင်းခံရသောသူသည် အသရေပျက်၍ ပြန်လှည့်လာရခြင်း မရှိပါစေနှင့်။ အဖိနှိပ်ခံရသောသူနှင့် နွမ်းပါးသောသူသည် ကိုယ်တော်၏နာမတော်ကို ချီးမွမ်းကြပါစေသော။ 22အို ဘုရားရှင်၊ ထတော်မူ၍ ကိုယ်တော်၏အမှုကိစ္စကို ရင်ဆိုင်ဖြေရှင်းတော်မူပါ။ မိုက်မဲသောသူသည် ကိုယ်တော်ကို တစ်နေ့လုံး ကဲ့ရဲ့ပြစ်တင်သည်ကို အောက်မေ့တော်မူပါ။ 23ကိုယ်တော့်ရန်သူတို့၏ အသံတည်းဟူသော ကိုယ်တော်တစ်ဖက်၌ ထကြွသောသူတို့ထံမှ အစဉ်မပြတ်ထွက်ပေါ်လာသည့် အုတ်အုတ်ကျက်ကျက်အသံကို မေ့လျော့တော်မမူပါနှင့်။
Селектирано:
Psalms 74: TPV-RV
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.