मर्कुस 16
16
येसु मोर्लोक्भटे जिउँटो भेल
(मत्ति २८:१-८; लुका २४:१-१२; यहुन्ना २०:१-१०)
1बिसारिक दिन बित्नेसौ मरियम मग्दलिनि, याकुबक् माँयक मरियम आउँ सलोमिय येसुक् मोर्लो देहिमा लागाबक्नि मघ्मघ् बास्ना आइलाहार अत्तरक् तेललक् किन्लुहुन्। 2तसौ साताक् पैल्हो दिन बिहानिहि लहुँर झुल्कटे उखर्ह्वा येसुलाइ धर्ल चिहानै जाइलुहुन्। 3उखर्ह्वा पैंदाइ जाइतिहि कर्लटाकै एक्टाइ-ओर्कोक्सङ्हिं कहिन् कर्तिहि रैल्हुहुन्, “हाम्रा लागि चिहानक् मुखै धप्काल दोंखोसेहे कुनेग्वाइ हटाइदेला?” 4तर उखर्ह्वा चिहानै पुगिहिन् उप्रक्पाखा दिठाटे चिहानक् दोंखो हटाहिन् सक्ल देख्लुहुन्। उ दोंखो एकदमे बर्के रैल्हकुन्। 5उखर्ह्वा चिहान भिट्रै पोसिहिन् दिठाटे ओछि एकजेना गोरो लुगा पेहेर्ल ठिठा मानुसलाइ चिहानक् दैन्हँक्पाखा बसिहिन् रैल्ह देख्लुहुन्। यि देखिबानाइ उखर्ह्वा अचम्म मान्लुहुन्।
6तर ओहिं उखर्ह्वालाइ यन्हिं बोल्लाहा, “अचम्म बुन् भेहो, तोहोलेके कुरुसै टाङिहिन् मार्ल नासरतक् येसुलाइ खोज्तिहि रहला। तर येसु यछि बोइने, उ ता जिउँटो भेहिन् जाहिन् सक्ल रहैस्! दिठाहो, येसुलाइ धर्ल ठाउँ यिहे हो। 7तर असौ जाहा, तसौ ओक्राक् चेलालक् आउँ पत्रुसलाइ यि खभर देहेक् कि येसु तोहोराखर्ह्वाक् आगारि-आगारि गालिलै जाइतिहि रहैस्। ओहिं तोहोराखर्ह्वालाइ बोल्लोय अनुसार तोहोलेके ओक्रानि ओछिहि देखहँक्ला।”#मत्ति २६:३२; मर्कुस १४:२८
8तसौ उखर्ह्वा डरे थरथराटे आउँ अचम्म मानिहिन् चिहानक्भटे निस्किहिन् दग्रटे जाइलुहुन्। उखर्ह्वाइ यि कहिन् कुन्हुँलाइ नहिं बोल्लुहुन्। किसाबुने उखर्ह्वा एकदमे डराल रैल्हुहुन्।
येसु मरियम मग्दलिनिक्ठालाइ देख्वार पोर्लोक्
(मत्ति २८:९-१०; यहुन्ना २०:११-१८)
9[येसु साताक् पैल्हो दिन बिहानिहि मोर्लोक्भटे जिउँटो भेहिन् उठ्नेसौ उ सेब्भुइसौ आगारि मरियम मग्दलिनिक्ठालाइ देख्वार पोर्लोक्। ओक्राक्भटे येसुइ सातगोटा भुतलक् निस्काइदेल रैल्हकुन्। 10तसौ मरियमे जाइबानाइ येसुलाइ पछ्यालाहार चेलालकलाइ यि कहिन् सुनालाहा। उहेबेलाइ चेलालक् सोक करिहिन् काँर्तिहि रैल्हुहुन्। 11तसौ येसु मोर्लोक्भटे जिउँटो भेल आउँ मरियम आफ्निहि देख्ल कहिन् उखर्ह्वालाइ बोल्लाहा, भेटौसुधा उखर्ह्वाइ बिस्वास नहिंकर्लुहुन्।
येसु दुइजेना चेलालकक्ठालाइ देख्वार पोर्लोक्
(लुका २४:१३-३५)
12ओक्राक्पाछु दुइजेना चेलालक् गाँओक्पटि जाबा ठाल्लटाकै उखर्ह्वाक्ठालाइ येसु ओर्को रुपै देख्वार पोर्लोक्। 13तसौ उखर्ह्वा फर्किहिन् जाहिन् ओर्को चेलालकलाइ जानालुहुन्। भेटौसुधा ओर्को चेलालके उखर्ह्वा दुइजेनालाइ बिस्वासे नहिंकर्लुहुन्।
येसु एघार जेना चेलालकक्ठालाइ देख्वार पोर्लोक्
(मत्ति २८:१६-२०; लुका २४:३६-४९; यहुन्ना २०:१९-२३; प्रेरित १:६-८)
14ओक्राक्पाछु येसु एघार जेना चेलालक् खाबा ठाल्लटाकै येसु उखर्ह्वाक् माझै देख्वार पोर्लोक्। तसौ उखर्ह्वाइ अबिस्वास आउँ मन कठोर पार्ल सिहिरे येसुइ उखर्ह्वानि हप्कालाहा। किसाबुने येसु मोर्लोक्भटे जिउँटो भेहिन् उठ्नेसौ ओक्रालाइ देख्लाहारलके बाज्ल कहिनै उखर्ह्वाइ बिस्वासे नहिंकर्लुहुन्। 15तसौ येसुइ उखर्ह्वालाइ बोल्लाहा, “सेब्भ्रोउ सन्सारक् ठाउँलकै जाइबानाइ जम्माय मानुसलकलाइ खुसिक् खभर पर्चार करह।#प्रेरित १:८ 16बिस्वास करिबानाइ बप्तिस्मा लेलाहारे उद्धार पाट्थ्ला। तर बिस्वास नहिंकर्लाहारसेहे परमेस्वरक् आगारि दोसि ठहरट्थ्ला। 17तसौ बिस्वास कर्लाहार मानुसलके यरङ् अचम्म सङ्केतलक् देखाबाक् काम करट्थ्ला, उखर्ह्वाइ मोरा नाँओइ भुतलक् निस्काट्थ्ला आउँ लौओ-लौओ भासालकै साराट्थ्ला। 18उखर्ह्वाइ सापलक् गर्थट्थ्ला आउँ कुन्हुँ बिखालु थोक् पियटौ सुधा उखर्ह्वानि नोक्सानि नाभेथ्। तसौ उखर्ह्वाइ बिरामिलकक् उप्रै आफ्निक् हाथ धरिदेट्थ्ला, आउँ उखर्ह्वा राम्रो भेट्थ्ला।”
येसु स्वर्गोइ उठाइ लेगिजाइल
(लुका २४:५०-५३; प्रेरित १:९-११)
19चेलालकक्सङ्हिं यरङ् कहिन् बाजिहिन् सिधानेसौ पर्भु येसु स्वर्गोइ उठाइ लेगिजाइलक्, आउँ उ परमेस्वरक् दैन्हँ हाथक्पटि बस्लक्।#प्रेरित १:९-११ 20तसौ उ चेलालके सेब्भ्रोउ ठाउँलकै जाइबानाइ पर्चार कर्लुहुन्। पर्भुइ उखर्ह्वाक्भटे सङ्केतक् रुपै काम कर्लक्, आउँ अचम्मक् कामक्भटे ओक्राक् बचनलाइ सत्य ठहरालक्।]#१६:२० दुइग्वा जम्माहिंसौ पुरानो मुख्य गिरिक सोरोतै यि ९-२० पद लेख्ल बोइने, तर ओर्को मुख्य गिरिक सोरोतै ९-२० पद लेख्ल रहेला।
Селектирано:
मर्कुस 16: DEWZ
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
© 2024 (Active), Mother Tongue Translators Society and Wycliffe Bible Translators, Inc. All rights reserved.