मरकुस 2
2
लकवा केर बेमरिया के ठीक करेक
(मत्ती 9:1-8; लूका 5:17-26)
1थोरेक दिन केर पाछे यीशु फिन कफरनहूम नगर में घूइर आलक। हूवाँ केर आदमीमन के पता होलक कि यीशु घर में अहे। 2तब एतना आदमीमन जमा होलैं कि दुरा ठिना हों ठाँव नी मिललक, आउर यीशु उमन के परमेश्वर केर बचन सुनात रहे। 3आउर आदमीमन एगो लकवा मारल आदमी के चाइर झन आदमीमन से उठवाय के यीशु ठिना लेई लानलैं। 4मगर उमन भीड़ केर चलते यीशु ठिना नी पोंहचेक पारलैं, से लगिन उमन उ घर केर छाइन केर थोरेक खपरा के उजराय के बड़का टोका काइर देलैं, जेकर हेंठे यीशु रहे, आउर जब उके टोका करलैं, तब उ टोका से उ पटिया के जेकर में लकवा मारल आदमी सुतल रहे, यीशु केर आगे उतराय देलैं।
5जब यीशु इ जानलक कि उ आदमीमन मोर उपरे बिसवास करैना कि मोंय ठीक करेक पारोना, उ लकवा मारल आदमी से कहलक, “हे बेटा, मोंय तोर पाप के क्षमा करोना।” 6हूवाँ मूसा केर नियम के सिखाएक वाला थोरेक आदमीमन बाइठ रहैं, आउर जे गोइठ यीशु कइह रहे उकर बारे में अपन-अपन मन में बिचार करेक लगलैं, 7“इ आदमी के एइसन गोइठ नी कहेक चाही, एइसन गोइठ से परमेश्वर केर निंदा होवेला काले कि परमेश्वर के छोइड़ के आउर केऊ पाप क्षमा करेक नी पारबैं।” 8यीशु तुरते अपन आत्मा में जाइन गेलक कि उमन मोर गोइठ केर बारे में अपन-अपन मन में का बिचार कराथैं, आउर उमन से कहलक, “तोहरेमन अपन-अपन मन में इ बिचार काले कराथा? 9मोर लगिन इ कहेक का सहज अहे कि तोर पाप क्षमा होलक, या उके इ कहेक कि उठ अपन पटिया के उठाय के चल फिर? 10मगर मोंय चाहोना कि तोहरेमन इ गोइठ के जाइन लेवा कि मोंय आदमी केर बेटा धरती में पाप क्षमा करेक केर हों अधिकार रखोना।” तब यीशु उ लकवा मारल आदमी से कहलक, 11“मोंय तोर से कहाथों, उठ! अपन पटिया के उठाय के अपन घर चाइल जा।” 12तुरते उ आदमी उठलक, आउर अपन पटिया के उठाय के सोउब केर देखते-देखते हूवाँ से बाहरे निकइल के चाइल गेलक। इ घटना के देइख के सोउब आदमीमन चकित होई गेलैं, आउर परमेश्वर केर बड़ाई काइर के कहेक लगलैं, “हमरेमन एइसन कहियो नी देइख रही।”
लेवी नाँव केर आदमी के बोलाल जाएक
(मत्ती 9:9-13; लूका 5:27-32)
13यीशु एक बेर फिन निकइल के गलील केर झील किनारे गेलक। आउर हूवाँ ढेइर आदमीमन उकर ठिना आलैं, आउर उ आदमीमन के परमेश्वर केर बचन से उपदेस देवेक लगलक। 14उपदेस देवेक केर पाछे जब यीशु जात रहे, तब हलफई केर बेटा लेवी नाँव केर एगो आदमी के देखलक, जेकर दोसर नाँव मत्ती रहे। उ अपन मालगुजारी लेवेक केर ठाँव में बइठल रहे। यीशु उकर से कहलक, “मोर पिछे होई ले आउर मोर चेला बाइन जा।” लेवी उठलक आउर उ ठाँव के छोइड़ के यीशु केर संगे चाइल गेलक।
15थोरेक दिन केर पाछे यीशु आउर उकर चेलामन लेवी केर घर में खाएक लगिन बाइठ रहैं। आउर ढेइर मालगुजारी लेवेक वालामन आउर दोसर आदमीमन हों हूवाँ रहैं जेमन पापी जानल जात रहैं। उमन हों यीशु केर गोइठ के मानत रहैं आउर ओहोमन उमन संगे खात रहैं। इ लेखे से ढेइर आदमीमन रहैं जेमन यीशु केर संगे हर ठाँव में जात रहैं। 16मूसा केर नियम के सिखाएक वालामन जे फरीसी दल केर आदमीमन में से रहैं, इ देइख के कि उ तो पापीमन आउर मालगुजारी लेवेक वालामन केर संगे खाथे। उमन यीशु केर चेलामन से कहलैं, “उ तो मालगुजारी लेवेक वालामन आउर पापीमन केर संगे खायला-पियेला।” 17जब यीशु इ सुनलक तब उमन से कहलक, “भला-चंगा आदमीमन के बाइध केर दरकार नखे, मगर बेमरियामन के अहे। मोंय उमन के पाप करेक से छोड़वाय के बोलाएक नी आय हों, जेमन खुद के धरमी बुझैना, मगर मोंय उमन के पाप करेक से छोड़वाय के बोलाएक आय हों, जेमन जानैना कि हमरे पापी अही।”
उपास केर बारे में सवाल
(मत्ती 9:14-17; लूका 5:33-39)
18एक दिन यूहन्ना बपतिस्मा जल संस्कार देवेक वाला केर चेलामन आउर फरीसी दल केर आदमीमन उपास करत रहैं, मगर यीशु केर चेलामन नी करत रहैं। ओहे दिन थोरेक आदमीमन यीशु ठिना आलैं आउर पूछलैं, “यूहन्ना केर चेलामन आउर फरीसी आदमीमन उपास करैना, मगर तोर चेलामन उपास काले नी करैना?” 19यीशु उमन के जबाब देलक, “जब तक मोंय अपन चेलामन केर संगे अहों, उमन उपास कइसन करबैं? उमन नी करबैं काले कि उमन खुश अहैं, ठीक ओहे लेखे जइसन दूल्हा जब तक अपन संगमन केर संगे रही, उमन उपास नी करबैं। 20मगर उ दिनमन आवी कि दूल्हा उमन से अलग कराल जाई, उ बेरा उमन उपास करबैं।
21आदमीमन नवाँ लुगा केर टुकरा के पुरना लुगा संगे नी टसैना। निहीं तो धोवल जाएक से नवाँ टुकरा सिकुइड़ जाई, आउर पुरना लुगा के आउर फाइर देवी, तब पुरना लुगा केर टोका ढेइर बड़का होई जाई। 22एहे लेखे नवाँ अंगूर केर रस के पुरना चमड़ा केर थैला में केऊ नी रखैना, रखेक से अंगूर केर रस से फेन उठी आउर पुरना चमड़ा केर थैला नी फैलेक केर चलते फाइट जाई। इ लेखे अंगूर केर रस आउर चमड़ा केर थैला दुयो बरबाद होई जाई। इ लगिन अंगूर केर नवाँ रस के नवाँ चमड़ा केर थैला में रखैना।”
यीशु आराम दिन केर प्रभु
(मत्ती 12:1-8; लूका 6:1-5)
23एक बेर यहूदी मनक आराम केर दिन में यीशु आउर उकर चेलामन अन्न केर खेतमन में से होई के जात रहैं, तब उकर चेलामन हिंठते-हिंठते बाइलमन के तोइर के खाएक लगलैं। 24तब थोरेक फरीसी दल केर आदमीमन यीशु से कहलैं, “देख, तोर चेलामन जे काम यहूदी मनक आराम केर दिन कराथैं, उ मूसा केर नियम केर बिरोध हेके, तोके उमन के एइसन काम करेक से रोकेक चाही।” 25-26यीशु उमन के जबाब देलक, “का तोहरेमन पवितर किताब में नी पइढ़ हा कि हमर पुरखा राजा दाऊद एक बेर, जब उ आउर उकर संगमन के भूख लगलक तो का काइर रहे? उ बेरा अबियातार तंबू में यहूदी महापुरोहित रहे। दाऊद तंबू में गेलक आउर उ रोटीमन के खालक आउर अपन संगमन के हों देलक, जेके परमेश्वर के भेंट में चढ़ाल जाय रहे। तोहरेमन जानाला कि मूसा केर नियम केर मोताबिक उ पवितर रोटी के सिरिफ पुरोहितमन हें खाएक पारैना।” 27आउर यीशु उमन के कहलक, “परमेश्वर यहूदी मनक आराम केर दिन के आदमीमन लगिन बनाय हे, ना कि आदमीमन के आराम केर दिन लगिन बनाय हे। 28से लगिन मोंय आदमी केर बेटा यहूदी मनक आराम केर दिन केर हों मालिक हेकों।”
Селектирано:
मरकुस 2: SCK
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
Sadri Bible by The Love Fellowship is licensed under Creative Commons Attribution-ShareAlike 4.0 License.