Mataio 8
8
Kua Fakamālōlō e Iehu he Tamāloa
(Mlk 1.40-45; Luk 5.12-16)
1I te fanaifoga o Iehu mai luga o te mauga, na mulimuli atu kia te ia he kaifenua tokalahi. 2Oi na hau ai he lēpela kua tōtuli i mua o ia ma lea vē mai ki ei, “Te Aliki, kāfai koe e loto ki ei, e kē mafaia oi fakamamā#8.2 fakamamā Ho he tauale kino o te kili nae taku fakatahi lava ko te lēpela, ma nae iei te talitonuga ko nā tauale uma vēnei e hē mamā ai te tino e maua ai, i nā tu tau tāpuakiga, ma e tatau ke fakamālōlō muamua oi fātoā mafai ai ke toe auai ki nā tāpuakiga au.”
3Oi na papae atu ai ia Iehu, kua paki atu tona lima ki te lēpela ma lea vē atu, “Ko au e loto ki ei. Mamā loa!” Ma ko te taimi lava tēnā na mamā ai ia mai te lēpela. 4Oi na vāgana atu ai ia Iehu ki ei, “Fakalogo mai koe! Ko koe e hē lea lele ki he tino, kae fano oi fakaali tō tino ki he ohitāulaga; ma ofo atu ai he tāulaga e vē ona fakatonu mai e Mohe, ke fai ma fakamāoniga ki tagata ko koe kua mamā.”#Lev 14.1-32
Kua Fakamālōlō e Iehu te Kaukauna a he Takitakikau Loma
(Luk 1.7-10)
5Kua fanatu ia Iehu ki Kapenaumi, oi na fakafetaui mai ai ki ei he takitakikau Loma ma fakatagi ki ei mo he fehoahoani; 6“Te Aliki, ko taku kaukauna e takoto i te fale e tauale, e mate tētahi ona itū, ma e tīgāina lahi lele.”
7Kua lea atu ia Iehu ki ei, “Ko au la ka fanatu oi fakamālōlō tau kaukauna.”
8Kae kua tali mai te takitakikau. “Te Aliki, ko au ko he tino fakatauvā ma e hē talafeagai ke ulu koe ki loto o toku fale. Kae tau lava ko hau kupu, ma ka mālōlō ai taku kaukauna. 9Auā ko au foki ko he tino e i lalo o te pule a nā takitakikau e maualuluga atu ia te au, ma e iei foki nā fitafita e i lalo o taku pule. Ma kāfai au e lea ki te tino tēia, ‘Fano vē’ oi e fano; kāfai au e lea ki tētahi tino, ‘Hau’ oi e hau foki; ma kāfai au e lea ki taku kaukauna, ‘Fai te mea tēia!’ oi e vēnā lava ona fai e ia.”
10I te lagona atuga e Iehu o nā kupu iēnei a te takitakikau, oi na ofo lele ai; ma na vāgana atu ai ki nā tino nae tau mulimuli mai kia te ia, “E lea atu au kia te koutou, e hēki kō iloa lele he tino i Ihalaelu e vēnei hona fakatuatua! 11E takutino atu e au, e tokalahi kilātou ka ōmamai mai hahae ma hihifo oi nonofo fakatahi ki lalo ma Apelaamo, Ihaako ma Iakopo i te kaiga lahi i te Mālō o te lagi.#Luk 13.29 12Kae ko nā tino e tatau ke i loto i te Mālō, ka togi ki fafo ki te pōuli, ki te mea ka lauē ma katigū ai o lātou nifo.”#Mat 22.13; 25.30; Luk 13.28 13Oi na lea atu ai ia Iehu ki te takitakikau, “Fano loa ki te fale o koe. Ko te mea e talitonu koe ki ei, ka vēnā lava ona fakatāunuku mo koe.”
I te taimi lava tēnā na mālōlō ai te kaukauna a te takitakikau.
Kua Fakamālōlō e Iehu nā Tino e Tokalahi
(Mlk 1.29-34; Luk 4.38-41)
14Kua ulu atu ia Iehu ki te fale o Petelu, oi na kitea ai e ia te mātua o te āvaga a Petelu e takoto i tona moega e tauale i te fiva. 15Kua paki atu ia Iehu ki te lima o te fafine oi na fano kehe ai te fiva mai ia te ia. Oi na tū ake ai te fafine ki luga oi laulau te meakai a Iehu.
16I te afiafipō o te aho lava tēnā, na kaumai ai e kilātou kia Iehu nā tino e tokalahi nae ulufia e nā tēmoni. Na tuli e Iehu nā agaga kino ki fafo i he kupu ma fakamālōlō kilātou uma nae tauāle. 17Na fai e ia te mea tēnei ke taunuku ai te kupu a te pelofeta ko Ihaia e vēia,
“Na ia tau kavea o tātou tauale
ma tau hikia o tātou tīgā.”#Iha 53.4
Ko nā Tino na Ofo ke fai ma Hoko o Iehu
(Luk 9.57-62)
18I te kiteaga e Iehu ko te kaifenua kua hiko takamilo ia te ia, oi na fakatonu ai e ia ona hoko ke olo ki tētahi itū o te vaitūloto. 19Oi na hau ai he faiākoga o te Tūlāfono kia Iehu, kua lea vē ki ei, “Te Faiākoga, ko au kua hāuni ke olo ma koe ki ho he mea lava e fano koe ki ei.”
20Na tali atu ia Iehu kia te ia, “E fai ia lua o ālope, ma fai ia ōfaga o manulele; kae ko te Ataliki o te Tagata e hēai he mea ke takoto ki ei ke mālōlō ai.”
21Kua lea mai foki hētahi hoko o ia kia te ia, “Te aliki, ke mua fano kō au oi tanu toku tamana.”
22Kae na tali atu ia Iehu, “Mulimuli mai kia te au kae tuku vē nā tinooti ke tanu e kilātou o lātou tinooti.”
Kua Fakatonu e Iehu he Afā ke Mālū
(Mlk 4.35-41; Luk 8.22-25)
23Oi na hopo ai ia Iehu ki luga o he vaka, ma na olo ai ma nā hoko o ia. 24Kae nā lava e teki kua kikini he afā mālohi i te vaitūloto, ma na hopokia ai te vaka ma kua tāli goto. I te taimi tēnā ko Iehu nae moe. 25Oi na olo ai te kau hoko kua fafagu ma lea vē atu ki ei, “Te Aliki, fakaola kō kitātou auā kitātou ka mamate!”
26Na tali atu ia Iehu kia te kilātou, “Heā te mātataku ai koutou? Kai te taigole lele o te koutou fakatuatua!” Oi na tū ai ia Iehu ki luga kua fakatonu te matagi ma nā galu ke mālū, ma na toku ai loa te matagi ma toka te tai, ma kua tokihi te malino.
27Na ofo lele te kau hoko ma lea vē, “He itūkāiga tagata vēhea tēnei? E pa foki lava ki te matagi ma nā galu e uhitaki kia te ia!”
Kua Fakamālōlō e Iehu nā Tamāloa e Toka Lua e Ulufia e ni Tēmoni
(Mlk 5.1-20; Luk 8.26-39)
28Kua pa atu ia Iehu ki tētahi itū o te vaitūloto ko Kalilaia, ki te kogāfenua nae igoa kia Katala, oi na fakafetaui atu ai kia te ia ni tamāloa e toka lua na ōmamai i nā tugamau i te fenua tanu i kinā. Ko te toka lua tēnei nae ulufia e tēmoni ma nae fakamātakutaku lele, ma nae hēai lele foki he tino na toe fia kui i te auala tēnā. 29Ko te taimi lava na kitea atu ai e kilāua ia Iehu, oi na taukālalaga vē atu ai kia te ia, “E, te Ataliki o te Atua, heā kō ta koe e fai mai kia te kimāua? Ko koe nei kua hau ke fakahāuā mai kia te kimāua ka ko hēki pa ki te taimi tatau?”
30E hē mamao atu ma kinā nae kakai mai ai he lafu puā lahi. 31Ma na fakatagi atu ai nā tēmoni kia Iehu, kua lea vē atu, “Kāfai kimātou ka tuli e koe ki fafo, uga kō kimātou ki loto o te lafu puā tēnā.”
32“Olo kehe loa,” na lea atu vēnā ia Iehu kia te kilātou. Oi na olo kehe ai nā tēmoni, kua ulu ki loto o nā puā. Ma na fetutuli ifo ai te lafu puā ki lalo i te tafatō o te mauga ki loto o te vaitūloto, ma na mālelemu uma ai.
33Ma na fetutuli kehe ai nā tino nae kikilāgia nā puā, ma kua olo ki te kakai ma fakailoa ki tagata te tala kātoa ki te mea na tupu ki nā tāulelea nae ulufia e nā tēmoni. 34Oi na ōatu ai loa ia tagata uma o te kakai kua fakafetaui kia Iehu; ma i te kilātou kitea atuga o ia, na tauānau ai loa e kilātou ke fano kehe mai to lātou fenua.
Селектирано:
Mataio 8: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust