Mataio 5
5
Ko te Lāuga i Luga o te Mauga
1Kua kitea atu e Iehu te kaifenua tokalahi, oi na fano ai ki luga o te kautafa o he mauga ma nofo ai ki lalo i kinā. Oi na ōmamai ai nā hoko o ia ki ona tafa, 2ma kāmata ai kua akoako atu e ia kilātou:
Ko te Fiafia Moni
(Luk 6.20-23)
3“Amutia nā tino e kilātou iloa
to lātou mātitiva i nā mea tau ki te Atua;
auā e o kilātou te Mālō o te lagi!
4Amutia nā tino e fakanoanoa;#Iha 61.2
auā ka fakamāfanafana kilātou e te Atua!
5Amutia nā tino e loto maulalo;#Hal 37.11
auā ka maua e kilātou nā fakamanuiaga
kua uma te folafola e te Atua!#5.5 maua e kilātou… e te Atua; pe fai ma o lātou tofi te fenua
6Amutia nā tino e fia kakai ma fia inu ki te āmiotonu;
auā ka fakamaliegia kātoatoa kilātou e te Atua!#Iha 55.1, 2
7Amutia nā tino e alolofa ki iētahi tino;
auā ka alofagia kilātou e te Atua!
8Amutia nā tino e loto mamā; #Hal 24.3-4
auā ka kitea e kilātou te Atua!
9Amutia nā tino e fakatupua te fīlēmū;
auā ka takua kilātou ni fānau a te Atua!
10Amutia nā tino e maua i hāuāga
ona e kilātou faia te finagalo o te Atua;#1 Pet 3.14
auā e o kilātou te Mālō o te lagi!
11“Amutia koutou kāfai koutou e fakamātagā ma fakaogohia e tagata, ma kilātou faia ni talapepelo kino kehekehe e uiga kia te koutou, ona ko koutou ni hoko e o oku.#1 Pet 4.14 12Koutou ke fiafia ma olioli, auā e i te lagi te koutou taui lahi. Nae vēnei foki lava nā fakahāuāga nae fai e tagata ki nā pelofeta i nā aho kua teka.#2 NT 36.16; Gāl 7.52
Ko te Māhima ma te Mōlī
(Mlk 9.50; Luk 14.34-35)
13“Ko koutou e vē ko he māhima ki tagata uma o te lalolagi. Kae kāfai te māhima e uma tona kokona, e mafai vēhea nei ke toe fakakokona? E hē toe aogā ki he mea kae nā ko te togi lava ki fafo ma holi i vae o tagata.#Mlk 9.50; Luk 14.34, 35
14“Ko koutou e vē ko he mōlī mo tagata uma o te lalolagi. Ko he kakai e fau i luga o he mauga, e hē mafai ke hē kitea.#Ioa 8.12; 9.5 15E hēai he tino e ia tutua he mōlī ma tuku ai ki lalo o he tānoa; kae e tuku e ia ki luga o he tūgālāmepa, te mea e māina ai ki nā tino uma i loto o te fale.#Mlk 4.21; Luk 8.16; 11.33 16Ke vēnā foki oi māina atu tau mōlī ki tagata, kae ke kitea ai e kilātou au mea lelei e fai, ma vīkia ai te koutou Tamana i te lagi.#1 Pet 2.12
Akoakoga e Uiga ki te Tūlāfono
17“Ia koutou nā vēakē ko au na hau ke fakahēai te Tūlāfono a Mohe, ma nā akoakoga a te kau pelofeta. Ko au e hēki hau ke fakahēai, kae ke fakatino nā akoakoga a kilātou. 18Auā e takutino atu e au kia te koutou, ka ko hēki mavae atu te lagi ma te lalolagi, e hēai he mea e tōkehea mai te Tūlāfono, ke pa lava ki he koma pe he mataituhi—heiloga kua taunuku nā mea uma.#5.18 taunuku nā mea uma pe taunuku uma ana akoakoga #Luk 16.17 19Ko te mea ia, ko ai lava e hē uhitaki, e tuha lava pe ko te fakatonuga ia e pito hili te hē tāua, ma akoako e ia iētahi tino ke fakatakitaki ake kia te ia, ka kavea ia ma tino e hili atu te hē tāua i te Mālō o te lagi. Kae ko ai lava e uhitaki ma akoako e ia iētahi tino ke fakatakitaki ake kia te ia, ka kavea ia ma tino e tāua lahi i te Mālō o te lagi. 20Auā e lea atu au kia te koutou, e fātoā mafai oioti koutou ke hao atu ki te Mālō o te lagi, pe kāfai e hili atu te fakamāoni o koutou oi tauhi ki nā Tūlāfono, i lo nā faiākoga o te Tūlāfono ma te kau Falehaio.
Akoakoga e Uiga ki te Ita
(Luk 12.57-59)
21“Kua fakalogo koutou ki nā akoakoga nae fai ki tagata i nā aho kua leva, ‘Koutou nahe tāmate tino; ko te tino e fai e ia te mea tēnei, ka kave ki te fakamahinoga.’ #Eho 20.13; Teu 5.17 22Kae ko au e lea atu nei kia te koutou, ko ai lava e ita#5.22 ko ai lava e ita ko iētahi tuhituhiga e vē mai ko ai lava e hēai he māfuaga e ita ai ki tona uho, ka kave ki te fakamahinoga; ko ai lava e lea vē ki tona uho, ‘E hēai hō aogā!’ ka kave ki te Taupulega, ma ko ai lava e taku e ia tona uho ko he mea valea, e ono togi ki loto o te afi o Kēna. 23Kāfai la kua hāuni atu tau tāulaga ki te Atua i te fata faitāulaga kae manatua e koe i kinā, e iei he mea e hē fiafia ai tō uho kia te koe, 24tuku tau tāulaga i mua o te fata faitāulaga, kae fano oi fakalelei muamua ma tō uho, oi fātoā hau ai oi ofo atu tau tāulaga ki te Atua.
25“Kāfai he tino e fai hana tagi ma mōlia koe ki te fakamahinoga, teuteu vave te koulua vā koi iei he taimi, ka ko hēki pa koulua ki mua o te fakamahinoga. Auā e pa loa koulua ki ei, oi ka tuku atu ai loa koe ki te fakamahino, oi tuku atu ai koe ki leoleo, oi togi ai koe ki loto o te falepuipui. 26I kinā, e lea atu au kia te koe, ka nofo ai pea koe ke pa lava ki te taimi e uma ai te totogi o te toe hene o tau hala.
Akoakoga e Uiga ki te Mulilua
27“Kua fakalogo koutou ki nā akoakoga, ‘Koutou nahe mulilua.’#Eho 20.14; Teu 5.18 28Kae ko au e lea atu nei kia te koutou: ho te tino e kikila ki he fafine ma hahau ki ei, kua agahala ia i te mulilua i tona loto. 29Ko te mea ia, kāfai ko tō mata taumatau te māfua ai oi agahala koe, gape kehe oi tīaki. E hili atu te māumau o hō itūtino i lo te togi o tō tino kātoa ki Kēna. #Mat 18.9; Mlk 9.47 30Ma kāfai ko tō lima taumatau te māfua ai oi agahala koe, tipi kehe oi tīaki. E hili atu te māumau o hō lima i lo te togi o tō tino kātoa ki Kēna.#Mat 18.8; Mlk 9.43
Akoakoga e Uiga ki te Tatala Āvaga
(Mat 19.9; Mlk 10.11-12; Luk 16.18)
31“E lea mai foki nā akoakoga, ‘Ho he tino e tatala e ia tana āvaga, e tatau ke ia fōkia ki te fafine he pepa fakamāonia ko te lā āvaga kua tatala.’ #Teu 24.1-4; Mat 18.8; Mlk 9.43 32Kae ko au e lea atu nei kia te koutou: ho he tamāloa e tatala e ia tana āvaga i he māfuaga e kehe mai i lo te kua hē fakamāoni o te fafine, kua fai e ia te mea e mulilua ai tana āvaga; ma ko ai lava e fakaipoipo ki he fafine kua tatala tana āvaga, kua agahala foki ia i te mulilua.#Mat 19.9; Mlk 10.11-12; Luk 16.18; 1 Kol 7.10-11
Akoakoga e Uiga ki nā Tautōga
33“Kua fakalogo foki koutou ki nā akoakoga nae fai ki tagata i te kāloā, ‘Nahe kē tautō pepelo, kae fakatino nā mea kua uma tō tautō ai ki te Aliki e fai e koe.’ #Lev 19.12; Nūm 30.2; Teu 23.21 34Kae ko au e lea atu nei kia te koutou: nahe koutou tautō kāfai e fai ni autou folafolaga. Nahe koutou tautō ki te lagi, auā ko te nofoāliki tēnā o te Atua;#Iak 5.12; Iha 66.1; Mat 23.22 35pe ki te lalolagi, auā ko tona tamā nofoa tēnā e mapu ki luga ona vae; pe ki Ieluhalema, auā ko te kakai tēnā o te Tupu hili.#Iha 66.1; Hal 48.2 36Nahe tautō foki ki outou ulu, auā e hē koutou mafaia oi fakahinā pe fakauliuli he lāulu e fokotahi. 37Kae lea oioti, ‘Io’ pe ‘Hēai’—ko ho hētahi mea e lea ai koutou, e mai ia Hatani.#5.37 Hatani pe Tē e Kino;
Akoakoga e Uiga ki te Tauimahui
(Luk 6.29-30)
38“Kua fakalogo koutou ki nā akoakoga, ‘E hui te mata i te mata, ma te nifo i te nifo.’ #Eho 21.24; Lev 24.20; Teu 19.21 39Kae ko au e lea atu nei kia te koutou: nahe tauia e koutou he mea kino a he tino na fai kia te koutou. Kāfai tō pākōkō taumatau e po e he tino, liliu ki ei tētahi pākōkō. 40Kāfai he tino e fai hana tagi ki te fakamahinoga ki tō kofutino, fōki foki mo ia tō peleue. 41Kāfai koe e fakamālohia e he fitafita a he kautau kua pukea tō fenua, ke amo tana taga mo he maila, oi amo mo he lua maila. 42Kāfai he tino e gogō atu ki hau mea, fōki ki ei; kāfai he tino e fia fakaaogā e ia hau mea, fōki ke fakaaogā e ia.
Alolofa ki nā Fili o Koutou
(Luk 6.27-28, 32-36)
43“Kua fakalogo koutou ki nā akoakoga, ‘Alofa ki tō tuākoi, kae ita ki nā tino e fai koe ma o lātou fili.’#Lev 19.18 44Kae ko au e lea atu nei kia te koutou: alolofa ki nā tino e fai koutou ma o lātou fili, ma tatalo mo kilātou e fakahāuā atu kia te koutou, 45kae ke kavea ai koutou ma fānau a te koutou Tamana i te lagi. Auā e fakapupula e ia te lā ki tagata lelei ma tagata kino, ma fakamaligi ifo te ua kia te kilātou e āmiotonu ma kilātou e āmiokino. 46Auā kāfai koutou e alolofa oioti ki nā tino e alolofa atu kia te koutou, heā te ka maua tauānoa ai he koutou taui? E pa foki lava ki nā aolāfoga e kilātou faia te mea tēnā! 47Ma kāfai koutou e fakataumuna oioti ki autou uō, kua koutou faia nei he mea e kehe mai nā mea e fai e iētahi tino? E pa foki lava ki tagata nukukehe e kilātou faia te mea tēnā! 48E tatau koutou ke lelei kātoatoa—e vē ko te koutou Tamana i te lagi e kātoatoa tona lelei.#Lev 19.2; Teu 18.13
Селектирано:
Mataio 5: TOKU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society New Zealand Charitable Trust