फिलिप्पि 2
2
खिरिस्टबि मिःछुपा लॆङ्मॆ
1माल् खिरिस्टबि चुऎ हिङ्खामाऎ आन्ना पाङ्नुमिडानिहॆ? माल् खोमि नाम्नाम् पिसिॽमॆ खानावाँऎ आन्नामि निवाँ चॆकुवॆ मुबिडानिहॆ? माल् आन्ना सॆङ्सॆङॆ लावाबि साङ्गाटि लॆकानिहॆ? माल् आन्ना एक्कसॆ होइक नाम्नाम् हाङ् नाम्नावाँ लॆपॆ चुकानिहॆ? 2आक्र हाङ्ग काङा चेन्चामिॽमाम् लागि आन्ना एक्कन निवाँ नुङ्मा, एक्कसॆ होइक नाम्नाम् पिस्सिसे, एक्क खानावाँमि लागि योम्पक् यिक्खुबा, टङ्चाखुबा याॽमि लिसानॆ लोकानि।
3हाङ् टाङ्पामि टेःॽन नुऎ खाङ्मॆ हाङ् कायङ्पाये मिन्से माङ् योम्पक् स आयिगानॆ। हाङ् आन्ना मिःछुपा लॆङ्से एक्कसॆ होइक ङेबाम्नॆ हाङ् होइढाचि चाइ टाङ्पाबाङ्स ढ्या मिप्पॆ चुआनॆ। 4हाङ् टाङ्पाम टेःॽन नुऎ लिर आमिनानॆ, टर होइढाचिमि लागि सङ्क नुऎ लिर मिनानॆ। 5आन्नामि निवाँ येसु खिरिस्टमि रॽमान लिर।
6खो निवाँहाङ् रॽमान लॆःयुङ्सा हाङ्स खोसॆ निवाँहाङ् रक्न लिढाङ्मॆ निवाँ मामुसु।
7टर खोसॆ खोम् निवाँबाङ्न आक्खा चोब्न याइटु हाङ् एक्क योम्पक् मुखुबा रॽमान लिसा। खो कानि रक्न एक्क याॽमि लिसे जान्मालिसा।
8हाङ् खो मिःछुपा लॆङ्से सिखॆॽलढारि हाङ् कुरुसाबि सिखॆॽलढारि लोमिम्पा खेमु।
9मसॆ निवाँहाङ्ऎ येसु होइढाचिबाङ् चोब्बाङ् सङ्पिटु युङु हाङ् चोब्नबाङ् सङ्पिटुऎ निङ् पिट्टु।
10गरॽहाङ् पारुबि, बाखाटेम्पि हाङ् बाखाटेम् खुक्माबि चुःक्मिहा#२:१० गुबि पारुबि चुःक्मिहा चोब्न हिङ्चामिम्पाचि यो। हाङ् बाखाटेम्पि लोमॆ खानावाँऎ चाइ चोब्न याॽमिचि, काम्नुऎ लावा, काइसाहा लावा हाङ् चोब्न डेउटाचि लोमॆ खानावाँ रेम। खोचिऎ येसु स्यामिॽमा लॆः। हाङ् बाखाटेम् हङ्सॽयु लोमॆ खानावाँऎ चाइ सिःखॆॽमिम्पा याॽमिचिमि लावा हाङ् आक्कुबि पेनुक्मिहा चोब्न लावा कामानुङ् वाप्मा लॆ। चोप्पासॆ येसु स्यामिसे हुहु पोबुक्मि।
11हाङ् येसु खिरिस्ट न पारभु कामानुङ् चोप्पासॆ निवाँहाङ्मि निङ्लावा लॆःॽमा लॆ।
बाखाटेम्पि ओऎ ओप्लिङ्
12मसॆ काङॆ काम लाङ्काम्चि गरहाङ् लोकानि, काङा आन्नानुङ् चुइङर आन्नॆ हानाम्स काङॆ लोमिम्पा खासियुङ्सानि। हाङ् गरॽल काङॆ आन्ना याइडाडानि मसॆ मान्टहाङ् कॆ आन्ना लोडानि म खानावाँ एट्टान टिङ्मा लॆकानि। मसॆ आन्नामि निवाँयुङ् खाङ्मिॽमाम् लागि नुऎ योम्पक् यिक्ढाङ्सानॆ। आन्ना हिङ्पक्मिॽमॆ योम्पक् मायॆॽलढारि आन्ना खोमि किसिमाबि पेन्मा लॆ। 13मान्ठाभनॆ निवाँहाङ्ऎ आन्नाबि हानाम्स योम्पक् यिक्ढाङ्कु। हाङ् खोसॆॽन आन्ना खोसॆ माङ् योम्पक् यिक्मा मिनुकुवॆ म योम्पक् यिक्मॆ निवाँ हाङ् चॆक्मावा पिकानि।
14योम्पक् मुकानिर चॆङ्चॆङ् आकासानॆ हाङ् याटक्माटक् मान्लॆरे चोब्न योम्पक् यिगानॆ। 15आक्र लॆटानि हाङ्ग आन्ना हिङ्वा हाङ् टेराङ्गे लाम्ढुमिक्खुबा याॽमिम् लुम्पि निवाँहाङ्मि आब्डिक मॆॽडिङ्मा चाचाचिर सॆङ्सॆङॆ लिकानि। हाङ् साङ्केम्माऎ नाम्फोलिॽवा ओसिन्ट उम्चि लुम्पि आन्ना ओमा लॆ। 16हाङ् आन्नामि निवाँयुङ् निवाँहाङ्मि लागि एक्क सङ्टिॽमिम्पा भेटि न, हाङ् कामि हिङ्खामामि हारि आक्क सङ्टिॽमिम्पा खानावाँ सक्पि अङुॽ हला। आक्र लिसा हाङ्ग काङा चेन्चाॽङा। हाङ् चेन्चासे काङॆ आक्क कामि चेन्चामॆ खानावाँ आन्ना इमा मिकानि। 17हाङ् आन्नॆ सङ्टिॽमिम्पा निवाँयुङ्पि काङा एक्क सङ्टिॽमिम्पा योवार लिमा सिट्टिङ् हाङ्स काङा चेन्चाॽङा। हाङ् आन्ना चोब्ननुङ् काङा चेन्चाॽङा। 18आक्रहाङ्न आन्ना चेन्चाआनॆ हाङ् काङा सङ्क आन्नामि चेन्चामाबि चेन्चाॽङा।
टिमोठि हाङ् इपाफोरिडिटास
19पारभु येसुऎ टङ्पिटिङ् हाङ्ग आन्नाबि सॆॽलन टिमोठि पाङ्हाङ्मा मिनुकुङ। हाङ् कामि खानावाँ खोसॆ आन्नाबि टॆकु। हाङ् मान्टहाङ् आन्ना चेन्चामिट्टानि, मरहाङ्न खोसॆ आन्नामि खानावाँ काबि लाटॆकु। हाङ् काङा चेन्चामिङा 20हाङ् निवाँ हङ्सिॽयुबाङ्न आन्ना मिॽलाखुबा याॽमिचिबि टिमोठिबाङ् होइक काङानुङ् आसास माआमि। 21होइढाचि ग चोब्न उम्चि योम्पक्पि टेःॽन निवाँ टिःक्मि हाङ् येसु खिरिस्टमि योम्पक् मुमिनि। 22खोसॆ एक्क पासाऎ आपामि मान्टहाङ् निवाँयुङ्मा लिसे योम्पक् यिगुकु मरहाङ्न काङानुङ् टङ्से नुऎ खानावाँ खेम्मिॽमॆ योम्पक् यिगु लोमॆ लेकाम्निन। 23ह काङाबि माङ्माङ् लिटाऎर, आक्खा खानावाँ लिमा अक्सि काङॆ आन्नाबि टिमोठि पाङ्हाङ्कुङ। 24हाङ् पारभुऎ टङ्पिटिङ् हाङ्ग काङा सङ्क आन्नाबि सॆॽलन टाःॽङा कामानुङ् मिनुक्ङा।
25टर काङॆ कानिम् नुसा इपाफोरोडिटस आन्नाबि पाङ्हाङ्मा मिट्टुङ। खो आन्नॆॽन काङा पाइबाक्माम् लागि पाङ्हाङ्मिम्पा एक्क याॽमि रेम। काचिगा हिप्पान सोरि योम्पक् यिग्चिगा, हाङ् नुऎ खानावाँ खेम्मिॽमॆ योक्पक् सङ्क सोरिन एक्क टिलिङ्गार लिसे काङानुङ् पाइटा। 26मान्ठाभनॆ खोसॆ सङ्क आन्ना चोब्न एट्टान चुब्मा मिडानि। खो टुग्मिम्पा खानावाँ आन्नॆ लेटकाम्नि हेम कामानुङ् खोसॆ खेमुहाङ् एट्टान मिॽलाढाङ्डानि। 27चाइबान खो एट्टान टुक्सिखॆॽमिम्पासॆ सिखॆॽमा परॽमिम्पा लॆटा। टर निवाँहाङ्ऎ खो नाम्नाम् पिस्सिटु हाङ् सिखॆॽमा मान्पिट्टु। हाङ् खो टेःॽन हॆॽनॆ टर निवाँहाङ्ऎ काङा सङ्क नाम्नावाँ लॆटिङ् हाङ् काङॆ एक्क डुखा सक्पि होइक डुखा आङ्मा मासिॽ।
28मसॆ आन्नॆ खो हस खाङाम्नॆ हाङ् चेन्चाआनॆ कामानुङ् काङा सङ्क मिनुॽङॆसॆ काङॆ खो आन्नाबि पाङ्हाङ्मॆ पाइकुङ। हाङ् काम् निवाँ सङ्क सोप्पॆ लि। 29पारभुबि खो टाङ्पामि नुसार मिन्मानुङ् काम्नुःर लॆटाम्नॆ। गरहा याॽमिचि ङेःप्मा लॆःॽमि। 30मान्ठाभनॆ खोसॆ खिरिस्टमि योम्पक्मि लागि टाङ्पाम् सक्मा सङ्क टेॽमा परक्मिम्पा लॆटु। आन्नॆ काङा मुबाक्मा आहेखुबा ठालबि खोसॆ काङा मुबाकिङ।
© 2023, Wycliffe Bible Translators, Inc. and Nepal Bible Society