યાકૂબ નો 5
5
ધનવાનં નેં સેતવણી
1હે ધનવાન મનખોં, મારી વાત હામળો, તમું તમારી ઇપેર આવવા વાળં દુઃખં હારુ સિસાએં-સિસાએં નેં ગાંગરો. 2તમારું ધન નાશ થાએંજ્યુ અનેં તમારં સિસરં નેં ઉદાઈ ખાએં ગઈ હે. 3તમારા હુંના-સાંદી મ કીટ લાગેં ગઈ હે, અનેં વેયે કીટ તમારી વિરુધ મ ગવાહી આલહે, અનેં આ કીટ તમારા શરીર નેં આગ નેં જેંમ બાળ દેંહે. અનેં તમવેં સેંલ્લં દાડં મ ધન ભેંગું કર્યુ હે. 4ભાળો, ઝેંનં મજુરંવેં તમારં ખેંતરં મ કામ કર્યુ, હેંનં મજૂરં ની ગાંગરવા ની અવાજ હામળો, ઝેંનનેં હાતેં તમવેં મજૂરી આલવા મ ધુંખો દેંદો હે, અનેં હેંનં મજૂરં નું ગાંગરવું સેનાવં ના પ્રભુવેં હામળ્યુ હે. 5તમું ધરતી ઇપેર મોજ-મસ્તી મ લાગેંલં રિય અનેં ઘણુંસ સુખ ભુંગવ્યુ, એંવું કરેંનેં, તમું હેંનં જનાવરં નેં જુંગ ડીલી આવેંજ્ય હે, ઝેંનનેં મારેંનેં ખાવા પેલ ખવાડેંનેં ડીલી આણવા મ આવે હે. 6તમવેં ધર્મી નેં દોષી બણાવેંનેં માર નાખ્યો, પુંણ વેયો તમારો વિરોધ નહેં કરતો.
દુઃખ મ ધારેંણ રાખવી
7એંતરે હારુ હે વાલોં, પ્રભુ ઇસુ નેં પાસો આવવા તક ધારેંણ રાખો, ભાળો, ખેડુત કેંકેંમ ધરતી ની કિમતી ફસલ ની આહ રાખેંનેં પેલા અનેં સેંલ્લા વરહાત થાવા તક, ધારેંણ રાખે હે, એંતરે કે ફસલ વદે અનેં વાડણી હારુ તિયાર થાએ. 8હેંનેં જુંગ તમું હુંદં ધારેંણ રાખો, અનેં આહ નહેં સુંડો, કેંમકે પ્રભુ જલ્દી આવેં રિયો હે. 9હે વાલોં, એક બીજા ઇપેર દોષ નહેં લગાડો, એંતરે કે તમારી ઇપેર હુંદો દોષ નેં લગાડવા મ આવે, ભાળો, નિયા કરવા વાળો એકદમ ટીકે આવેંજ્યો હે. 10હે વાલોં, ઝેંનં ભવિષ્યવક્તંવેં પ્રભુ ના નામ થી વાતેં કરજ્યી, હેંનનું દુઃખ ઝેંલવું અનેં ધારેંણ રાખવાનું નમૂનો હમજો. 11ભાળો, હમું ધારેંણ રાખવા વાળં નેં ધન્ય કેંજ્યે હે, તમવેં અય્યૂબ ની ધારેંણ ના બારા મ તે હામળ્યુસ હે, અનેં પ્રભુ તરફ થી ઝી હેંનેં બદલા નું ફળ મળ્યુ, તમવેં હેંનેં હુંદું જાણેં લેંદું હે, ઝેંનેં થી પ્રભુ ની વદાર કરુણા અનેં દયા પરગટ થાએ હે. 12પુંણ હે મારં વાલોં, બદ્દ થી મુટી વાત આ હે કે હમ નહેં ખો, નેં હરગ નો, નેં ધરતી નો, નેં કઇની બીજી વસ્તુ નો, પુંણ તમું હમેશા હાવ તે હાવ, અનેં ના તે ના બુંલો, એંતરે કે તમું પરમેશ્વર દુવારા સજ્યા મેંળવવા નેં લાએંક નેં બણેં સકો.
પ્રાર્થના ની સામ્રત
13અગર તમં મ કુઇ દુઃખી હે, તે વેયુ પ્રાર્થના કરે, અગર ખુશ હે, તે વેયુ સ્તુતિ ન ગીતં ગાએ. 14અગર તમં મ કુઇ રુગી વેહ, તે વેયુ મંડલી ન વડીલં નેં બુંલાવે, અનેં વેયા પ્રભુ ના નામ થી હેંનેં ઇપેર તેંલ લગાડેંનેં હેંનેં હારુ પ્રાર્થના કરે. 15અનેં વિશ્વાસ ની પ્રાર્થના દુવારા રુગી બસેં જાહે અનેં પ્રભુ હેંનેં હાજું કરહે, અગર હેંને પાપ હુંદો કર્યો વેંહે, તે પરમેશ્વર હેંનેં માફ કરહે. 16એંતરે હારુ તમું એક-બીજા નેં હામેં પુંત-પુંતાનં પાપં નેં કબુલ કર લો, અનેં એક બીજા હારુ પ્રાર્થના કરો, ઝેંનેં થી તમું હાજં થાએં જો, ધર્મી મનખં ની પ્રાર્થના થી ઘણી અસર પડેં સકે હે. 17એલિય્યાહ ભવિષ્યવક્તા હુંદો તે આપડી જેંમેંસ માણસ હેંતો, અનેં હેંને પુંતાના પૂરા મન થી પ્રાર્થના કરી, કે વરહાત નેં વરહે, અનેં હડા તાંણ વરહં તક ધરતી ઇપેર વરહાત નેં વરહ્યો. 18ફેંર હેંને પ્રાર્થના કરી, તે આકાશ મહો વરહાત થાયો, અનેં ધરતી મહી ફસલ ઉપજી. 19હે મારં વાલોં, અગર તમં મ કુઇ હાસ ના રસ્તા નેં સુંડ દે, અનેં અગર કુઇ હેંનેં મન ફેંરવવા મ મદદ કરે, 20તે તમારે એંમ જાણ લેંવું જુગે, કે કુઈક હેંના ભટકેંલા પાપી નેં મન ફેંરવવા મ મદદ કરે હે, તે વેયુ એક જીવ નેં મોત થી બસાવહે, અનેં પરમેશ્વર હેંનં ઘણં પાપં નેં માફ કર દેંહે.
Селектирано:
યાકૂબ નો 5: GASNT
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.