પ્રેરિતોનાં ક્રત્યો 18
18
કુરિન્થુસ મ પાવલુસ
1એંના પસી પાવલુસ એથેંસ સેર નેં સુંડેંનેં કુરિન્થુસ સેર મ આયો. 2તાં હેંનેં અક્વિલા નામ નો એક યહૂદી માણસ મળ્યો, ઝેંનું જલમ પુન્તુસ પરદેશ મ થાયુ હેંતું. વેયો પુંતાની બજ્યેર પ્રિસ્કિલા નેં હાતેં ઈટલી દેશ થી હમણસ આયો હેંતો, કેંમકે ક્લોદિયુસ રાજાવેં બદ્દ યહૂદી મનખં નેં રોમ દેશ મહં નકળેં જાવા ની આજ્ઞા આલી હીતી, હીની આજ્ઞા નેં લેંદે વેય કુરિન્થુસ સેર મ આય. 3અનેં પાવલુસ હેંનનેં મળવા જ્યો, કેંમકે વેય હુંદં મંડપ બણાવવા વાળં હેંતં, એંતરે હારુ વેયો હેંનનેં હાતેં રેંનેં કામ કરવા મંડ્યો. 4પાવલુસ દરેક આરમ ને દાડે ગિરજા મ સવાલ-જવાબ કરેંનેં યહૂદી અનેં બીજી જાતિ ન મનખં નેં ઇસુ મસીહ ઇપેર વિશ્વાસ કરવા હારુ હમજાડતો હેંતો.
5ઝર સિલાસ અનેં તીમુથિયુસ મકિદુનિયા પરદેશ મ આયા, તે હેંને મંડપ બણાવવું બંદ કર દેંદું, અનેં પાવલુસ વસન હમળાવવા ની ધુંધ મ યહૂદી મનખં નેં ગવાહી આલવા મંડ્યો, કે ઇસુસ મસીહ હે. 6પુંણ ઝર યહૂદી મનખં પાવલુસ નો વિરોધ અનેં હીની નિંદા કરવા મંડ્ય, તે હેંને પુંતાનં સિસરં થી ધૂળ ખખેંરેં નેં હેંનનેં કેંદું, “પરમેશ્વર ના હમિસાર નેં ગરહણ નેં કરવા ને લેંદે તમું પુંતેસ હેંના દંડ હારુ જવાબદાર હે, ઝી તમનેં પરમેશ્વર તરફ થી મળહે. પુંણ હૂં તે દોષ વગર નો હે અનેં હાવુ થી હૂં જાએંનેં બીજી જાતિ ન મનખં ની વસ મ પરમેશ્વર ના હમિસાર નો પરસાર કરેં.” 7તાં થી સાલેંનેં વેયો તીતુસ યૂસ્તુસ નામ ના પરમેશ્વર ના એક ભગત ના ઘેર મ હિકાડવા હારુ આયો, ઝી બીજી જાતિ નો હેંતો, અનેં ઝેંનું ઘેર ગિરજા ની નજીક હેંતું. 8તર ગિરજા ના મુખી ક્રીસ્પુસેં પુંતાના આખા કુટુમ હાતેં પ્રભુ ઇસુ ઇપેર વિશ્વાસ કર્યો, અનેં ઘણસ કુરિન્થુસ સેર મ રેંવા વાળેં મનખંવેં હામળેંનેં પ્રભુ ઇપેર વિશ્વાસ કર્યો અનેં બક્તિસ્મ લેંદું. 9પ્રભુવેં એક રાતેં દર્શન દુવારા પાવલુસ નેં કેંદું, “સમકે નહેં, પુંણ વસન નો પરસાર કરતો જા, અનેં સપ નહેં રે. 10કેંમકે હૂં તારી હાતેં હે, અનેં કુઇ તારી ઇપેર સડાઈ કરેંનેં તારું નુકસાન નેં કરે, કેંમકે એંના સેર મ ઘણસ મનખં હે, ઝી મારી ઇપેર વિશ્વાસ કરહે.” 11એંતરે હારુ પાવલુસ હેંનં મનખં મ પરમેશ્વર નું વસન હિકાડતો જાએંનેં ડોડ વર તક રિયો.
12ઝર ગલ્લિયો અખયા પરદેશ નો અધિકારી હેંતો, તે યહૂદી મનખંવેં એક મત થાએંનેં પાવલુસ નેં હાદો, અનેં હેંનેં નિયા કરવા ની રાજગદ્દી અગ્યેડ લાવેંનેં કેંવા મંડ્ય, 13“ઇયો મનખં નેં હમજાડે હે, કે પરમેશ્વર ની આરાધના ઇવી રિતી થી કરજ્યે, ઝી નિયમ ની વિરુધ હે.” 14ઝર પાવલુસ બુંલવાનોસ હેંતો કે, તે ગલ્લિયોવેં યહૂદી મનખં ને કેંદું, “હે યહૂદી મનખોં, અગર ઇયુ કઇક અન્યાય કે ગુંના ની વાત હીતી, તે અસલ હેંતું, કે હૂં તમારી હામળતો. 15પુંણ અગર ઇયે તકરાર, શબ્દ, અનેં નામં, અનેં તમારા નિયમ ના બારા મ હે, તે તમુંસ જાણો, કેંમકે હૂં ઇવી વાતં નો નિયા નહેં કરવા માંગતો.” 16અનેં ઇયુ કેંતે જાએંનેં ગલ્લિયોવેં આજ્ઞા આલી, કે હેંનનેં નિયા કરવા ની રાજગદ્દી થી બારતં કાડ દેંવા મ આવે. 17તર બદ્દ મનખંવેં ગિરજા ના મુખી સોસ્થિનેસ નેં હાએંનેં રાજ કરવા ની રાજગદ્દી અગ્યેડ માર્યો, પુંણ ગલ્લિયોવેં ઇની વાત ઇપેર કઇ હુદી સિન્તા નેં કરી.
અંતાકિયા મ પાવલુસ નું પાસું આવવું
18પાવલુસ ઘણં દાડં તક કુરિન્થુસ સેર મ રિયો, ફેંર વિશ્વાસી મનખં કનહો વળેંનેં જહાંજ મ બેંહેંનેં સિરિયા પરદેશ જાતોરિયો. પ્રિસ્કિલા અનેં અક્વિલા હુંદં હેંનેં હાતેં હેંતં, અનેં સિરિયા જાવા થી કીંખ્રિયા સેર મ પાવલુસેં પુંતાનું માથું કતરાવેં લેંદું. કેંમકે હેંને એક બુલી કરી હીતી. 19અનેં પાવલુસ ઇફિસુસ સેર મ પોત્યો, તે હેંને પ્રિસ્કિલ્લા અનેં અક્વિલા નેં તાંસ રેંવા દેંદં, અનેં વેયો પુંતે ગિરજા મ જાએંનેં યહૂદી મનખં નેં હાતેં બુંલા-બાલી કરવા મંડ્યો. 20ઝર મનખંવેં પાવલુસ નેં અરજ કરી, “હમારી હાતેં હઝુ અમુક દાડા રે,” તે હેંને ના પાડ દેંદું. 21અનેં એંમ કેં નેં હેંનં કન થી સુટો પડ્યો, “અગર પરમેશ્વર ની અસ્યા વેંહે તે હૂં પાસો તમારી કનેં આવેં.” તર વેયો ઇફિસુસ સેર થી જાવા હારુ જહાંજ મ બેંહેંનેં જાતોરિયો. 22અનેં કેસરિયા પરદેશ મ ઉતરેંનેં યરુશલેમ સેર મ જ્યો, અનેં મંડલી ન મનખં નેં મળેંનેં અંતાકિયા સેર મ આયો.
પાવલુસ ના તીજા પરવાસ ની સરુવાત
23ફેંર થુંડાક દાડા રેંનેં અંતાકિયા સેર થી જાતોરિયો, અનેં એક તરફ થી ગલાતિયા અનેં ફ્રુગિયા પરદેશ મ થાએંનેં વિશ્વાસી મનખં નેં વિશ્વાસ મ મજબૂત કરતો જ્યો.
ઇફિસુસ સેર મ અપુલ્લોસ
24હેંના ટાએંમ મ અપુલ્લોસ નામ નો એક યહૂદી માણસ હેંતો, ઝેંનું જલમ સિકંદરિયા સેર મ થાયુ હેંતું, ઝી પવિત્ર શાસ્ત્ર નું જ્ઞાન રાખવા વાળો હેંતો, વેયો ઇફિસુસ સેર મ આયો. 25હેંને પ્રભુ ના રસ્તા નું શિક્ષણ મેંળવ્યુ હેંતું, અનેં મન લગાડેંનેં ઇસુ ના બારા મ ઠીક-ઠીક હમળાવતો અનેં હિકાડતો હેંતો, પુંણ વેયો ખાલી યૂહન્ના ના બક્તિસ્મ ની વાત જાણતો હેંતો. 26વેયો ગિરજા મ બીક વગર બુંલવા મંડ્યો, ઝર પ્રિસ્કિલા અનેં અક્વિલાવેં હીની વાતેં હામળજ્યી તર વેય હેંનેં પુંતાનેં ઘેર લેં જ્ય, અનેં પરમેશ્વર નો રસ્તો હેંનેં હઝુ ઠીક રિતી થી વતાડ્યો. 27ઝર અપુલ્લોસેં નકી કર્યુ કે વેયો દરજ્યા ઇપેર થાએંનેં અગ્યેડ અખયા પરદેશ મ જાએ, તે વિશ્વાસી મનખંવેં હેંનેં હિમ્મત આલેંનેં જાવા દેંદો, અનેં અખાયા પરદેશ ન વિશ્વાસી મનખં નેં લખ્યુ, કે વેયા અપુલ્લોસ નેં ગરહણ કરે, અનેં હેંને તાં પોતેંનેં હેંનં મનખં નેં વિશ્વાસ મ વદવા હારુ મુટી મદદ કરી, ઝેંનવેં અનુગ્રહ નેં લેંદે વિશ્વાસ કર્યો હેંતો. 28અપુલ્લોસેં પવિત્ર શાસ્ત્ર થી સાબિત કરેંનેં વતાડ્યુ કે ઇસુસ મસીહ હે, અનેં ઝી યહૂદી મનખં હેંનેં બુંલા-બાલી કરેં રિય હેંતં, હેંનનેં હેંને વસન થી વતાડેં-વતાડેંનેં બદ્દની હામેં હેંનની વાતં નો વિરોધ કરતો જ્યો.
Селектирано:
પ્રેરિતોનાં ક્રત્યો 18: GASNT
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.