1 યોહાન 4
4
આત્માવં નેં પારખો
1હે વાલોં, દરેક આત્મા ઇપેર વિશ્વાસ નહેં કરો, ઝી પવિત્ર આત્મા દુવારા બુંલવાનો દાવો કરે હે. પુંણ આત્માવં નેં પારખો કે વેયો પરમેશ્વર ની તરફ થી હે કે નહેં, કેંમકે ઘણા બદા ઝૂઠા ભવિષ્યવક્તા દુન્ય મ હે. 2તમું ઇવી રિતી થી પરમેશ્વર ના આત્મા નેં વળખેં સકો હે, કે ઝી આત્મા એંમ કબુલ કર લે હે કે ઇસુ મસીહ માણસ બણેંનેં દુન્ય મ આયો, વેયોસ પરમેશ્વર નેં તરફ થી હે. 3અનેં ઝી આત્મા ઇસુ નેં કબુલ નહેં કરતો વેયો પરમેશ્વર ની તરફ થી નહેં, અનેં વેયોસ તે મસીહ નો વિરોધ કરવા વાળો આત્મા હે, ઝેંના બારા મ તમું હામળેં સુક્ય હે કે મસીહ નો વિરોધ કરવા વાળો આવવા નો હે, અનેં વેયો હમણં હુંદો દુન્ય મ હે.
4હે બાળકોં, તમું પરમેશ્વર ન સુંરં હે, અનેં તમવેં હેંનં ઝૂઠં ભવિષ્યવક્તં ઇપેર જીત મિળવી હે. કેંમકે ઝી તમારી મ રે હે, વેયો ઝી દુન્ય મ હે હેંનેં કરતં મુંટો હે. 5વેયા ઝૂઠા ભવિષ્યવક્તા દુન્ય ના હે, એંતરે હારુ વેયા દુન્ય ની વાતેં કરે હે, અનેં દુન્ય ન મનખં હેંનની વાતેં હામળે હે. 6પુંણ આપું પરમેશ્વર ન મનખં હે. ઝી પરમેશ્વર નેં જાણે હે, વેયુ આપડી વાતેં માને હે, અનેં ઝી પરમેશ્વર નેં નહેં જાણતું વેયુ આપડી વાત નહેં માનતું, ઇવી રિતી થી આપું હાસું બુંલવા વાળા આત્મા અનેં ઝૂઠુ બુંલવા વાળા આત્મા નેં વળખેં લેંજ્યે હે.
પરમેશ્વર પ્રેમ હે
7હે વાલોં, આપું એક-બીજા હાતેં પ્રેમ રાખજ્યે, કેંમકે પ્રેમ પરમેશ્વર નેં તરફ થી હે. અનેં ઝી કુઇ એક-બીજા હાતેં પ્રેમ કરે હે, વેય પરમેશ્વર ન બેંટા-બીટી હે, અનેં પરમેશ્વર નેં જાણે હે. 8પુંણ ઝી એક-બીજા હાતેં પ્રેમ નહેં રાખતં, વેય પરમેશ્વર નેં નહેં જાણતં, કેંમકે પરમેશ્વર પ્રેમ હે. 9પરમેશ્વરેં પુંતાનો પ્રેમ આપનેં ઇવી રિતી થી વતાડ્યો, કે હેંને પુંતાના એક ના એક સુંરા ઇસુ નેં ઇની દુન્ય મ મુંકલ્યો, એંતરે કે હેંનેં દુવારા આપનેં અમર જીવન મળેં સકે. 10પ્રેમ ઇયો નહેં કે આપેં પરમેશ્વર ઇપેર પ્રેમ કર્યો, પુંણ વાસ્તવિક પ્રેમ ઇયો હે કે પરમેશ્વરેં આપડી ઇપેર પ્રેમ કર્યો, અનેં આપડં પાપં ની માફી હારુ હેંને પુંતાના એક ના એક સુંરા નેં ભુંગ થાવા હારુ દુન્ય મ મુંકલ્યો.
11હે વાલોં, અગર ઇવી રિતી થી પરમેશ્વરેં આપડી ઇપેર પ્રેમ કર્યો હે, તે આપડે હુંદું એક-બીજા ઇપેર પ્રેમ રાખવો જુગે. 12પરમેશ્વર નેં કેંરં યે કેંનેં યે નહેં ભાળ્યો, પુંણ અગર આપું એક-બીજા ઇપેર પ્રેમ રાખજ્યે હે, તે પરમેશ્વર આપડી મ વાસો કરે હે, અનેં હેંનો પ્રેમ આપડી મ પૂરો થાએ હે.
13આપું પરમેશ્વર ની સંગતિ મ રેંજ્યે હે, અનેં વેયો આપં મ રે હે, એંનેં થી આપું જાણન્યે હે કે આપું હેંનેં મ અનેં વેયો આપડી મ વાસો કરે હે, કેંમકે હેંને આપનેં પુંતાનો પવિત્ર આત્મા આલ્યો હે. 14અનેં હમવેં બેંટા નેં ભાળ્યો હે અનેં હીની ગવાહી આલજ્યે હે, કે બા પરમેશ્વરેં બેંટા નેં દુન્ય ન મનખં નો તારનારો કરેંનેં મુંકલ્યો હે. 15ઝી કુઇ ઇસુ નેં પરમેશ્વર નો બેંટો હે એંમ કરેંનેં માન લે હે, વેયુ પરમેશ્વર મ વાસો કરે હે અનેં પરમેશ્વર હેંનેં મ વાસો કરે હે. 16ઝી પ્રેમ પરમેશ્વર આપડી ઇપેર રાખે હે, હેંનેં આપું જાણન્યે હે અનેં હેંનેં ઇપેર વિશ્વાસ કરજ્યે હે. પરમેશ્વર પ્રેમ હે, અનેં ઝી કુઇ પ્રેમ મ બણે રે હે, વેયુ પરમેશ્વર મ રે હે, અનેં પરમેશ્વર હેંનેં મ રે હે. 17એંનેં થીસ પ્રેમ આપડી મ પૂરો થાયો, કે આપનેં નિયા ને દાડે હિમ્મત રે. કેંમકે ઝેંવો વેયો હે વેમેંસ દુન્ય મ આપું હુંદં હે. 18પ્રેમ મ બીક નહેં રિતી, પુંણ પૂરો પ્રેમ બીક નેં કાડ દે હે, કેંમકે બીક નો સબંધ સજ્યા નેં હાતેં હે, અનેં ઝી બીક રાખે હે હેંનેં કન પૂરો પ્રેમ નહેં. 19આપું પરમેશ્વર ઇપેર એંતરે હારુ પ્રેમ રાખજ્યે હે, કેંમકે પેલ હેંને આપડી ઇપેર પ્રેમ કર્યો હે. 20અગર કુઇ કે, કે “હૂં પરમેશ્વર ઇપેર પ્રેમ રાખું હે,” પુંણ વિશ્વાસી ભાઈ ઇપેર વેર રાખે, તે વેયુ ઝૂઠુ હે. કેંમકે ઝી વિશ્વાસી ભાઈ ઇપેર પ્રેમ નહેં રાખતું ઝેંનેં હેંને ભાળ્યુ હે, તે વેયુ પરમેશ્વર ઇપેર હુંદું પ્રેમ નહેં રાખેં સક્તું કેંમકે હેંને પરમેશ્વર નેં ભાળ્યોસ નહેં. 21હેંનેં થી આપનેં ઇયે આજ્ઞા મળી હે, કે ઝી કુઇ પરમેશ્વર ઇપેર પ્રેમ રાખે હે વેયુ વિશ્વાસી ભાઈ-બુંન ઇપેર હુંદું પ્રેમ રાખે.
Селектирано:
1 યોહાન 4: GASNT
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.