Esta 6
6
Netam tuswe tu Haman Nefà nku'ni Mardokai
1A be yen tèttswe' là, mfen ke ku'ni nezi. Mfen ghù bo lo' ṅwa'ni tse tshô ngô be ntùm bwe, ba Kronika nse' yi mbwe i. 2Bo #Est. 2.21-22siaṅ tshen ṅwa'ni là mbwe mfen, mfon ju ze Mardokai na' nda'te, num tu Bigtan bo Téresh tse mbantshù' mfen na' ngù là ntùm bwe, ndù bo kite. Tshen ben bàa li na' mbèn nke mbéb nzendà, nke ndiag nekab mbu num mfen Asuérus. 3Mfen tshob ndù: a zit nku'ni bo ghamte ze bo fà Mardokai num yen nu l'à? Ben tse bo ke mfa' mfen nà bùnte ndù: a ke' ghù sàm ju.
4Ndùlala mfen tshob ndù: we z'a ntshundà à? A lo be be ndù Haman se' ntshundà ndà mfen ze njam njù, nebètte mfen ntaṅ Mardokai num saṅ s'a te tù là. 5Tshe' mfen bùnte ntshob mfen ndù: a b'a Haman bèn mbe ntshundà. Mfen tshob mb'a tsho ndà. 6Haman tsho ndà mfen bètt'é ndù: ke z'a bwô neghù mèn ze mfen tshwèt nkô neghamt'é l'à? Haman tshob ntù i ndù: a zit mèn ze be mfen bèn ngamt'é k'a ke b'a nda' m'à? 7Ndùlala Haman bùnte mfen ndù: a be ze mfen kô neghamte mèn nà, 8mb'a bwô nelo' nzwe fen ze mfen be ma' là mba nyàmdiaṅ ze mfen be nko' bwe là, njab tshu kwiwut tse bo be ma' num nyàm ndùse mfen ko' bwe là; 9mfà tshen nzwe bo nyàmdiaṅ nà mo' mfen ndùb netèt fenfen mfen. Yen mfen ni nsi ma' nzwe num mèn ze mfen kô neghamt'é là, te i num nyàmdiaṅ lo' i katte yi netèt tusô ke kua' mbwe i tshob ndù: tshù mb'a bwô neghù mèn ze mfen kô neghamt'é li.
10Ndùlala mfen tshob Haman ndù: lo' nzwe tshàm bo nyàmdiaṅ àm ndende mb'o tshob là, ngù be ndaṅndaṅ num Mardokai ze Yuda z'a tswe nzendà mfen nà. Kà wag ke bèn mfaṅ sàm ju num tshu ts'o tùnte là. 11Haman lo' nzwe bo nyàmdiaṅe, ma' nzwe num Mardokai, nte i num nyàmdiaṅ nke nkatte yi netèt tusô, nke nkua' ntshob ndù: tshù mb'a bwô neghù mèn ze mfen kô neghamt'é li!
12Mardokai bèn njam nzendà mfen, Haman nànte mbèn la' i, ndù nu tshùa i, a tshùaṅ tu i nsi. 13Haman soṅ nzwi i Zéresh boa njoṅ shun tse fa nu z'a tum yi là. Kum shun tse là mba nzwi i Zéresh tshob yi ndù: A be ze Mardokai z'o to' nevù mbwe i b'a ze Yuda là, mb'o ke' ku'ni neghù sàm ju num i, là mb'o nsi ke vù mbwe i à be nevù.
14Mba bo ke nke' ntshob yi là, ba mbantshù' mfen tsho ndà, ndo' Haman be ndùse nèn num jùa Esta na' nabte là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.