К Римлянам 11
11
Кияӷныӷым Наңлъыгьягускаңи Израилыӷмӣт
1Ынка̄м а̄птамси: Кияӷныӷым Израилыӷмӣт юксюгнаниҳтакӣ? Йыӷлыгилъю! Хўаңа катам Израилыӷмӣңӯңа, Авраамым киңунӷа, Вениаминым рамкыңан пиңӯңа. 2Кияӷныӷым юксюгнанилъҳитӣ юни қаюҳлъяк накмикыхкақӣ сялин нунаңлъялъҳилъюни. Лӣсимакынӷистыхӯ Акузитни Игақыхкани Илиям қикыҳқуткыхкақыхкаңи Кияӷныӷмун Израилыӷмӣт? Хўатын пика̄лӷӣ: 3«Атанық, туқуқуқақӣт ӯкналиқистытын, улъыҳқуқақӣт аҳқыфихтын; хўаңаңинаҳа̄гуңа сӣпнық, туқунъақуткақа̄тңалъю». 4Иўырңа Кияӷныӷым пикақа̄:
«Паниның 7,000мың юлгӯңа манигӯсигалңӯт кияӷныңлъяқамун Ваалымун».
5Ма̄тынлъю таўатытут. Сӣпнылгӯқ Кияӷныӷым накмикыхка̄ның наңлъыхталъыӷмикун. 6Кияӷнық накмӣӷумакуми наңлъыгьюлъыӷмикун, та̄ўа накмикылъҳитӣ пинитун пилъҳитхун. Таўатын накмикумакумики, та̄ўа накмикылъҳитӣ наңлъыгьюлъыӷмикун.
7Хўатын пӣқуңа: Израилыӷмӣт на̄лъкылъҳита̄т ивақаҳтың, Кияӷныӷым накмикыхкаҳӣнӣта на̄лъкыхкақа̄т. Иляңи тама̄кут Кияӷныӷым пиныҳлъю̄хтыстыкақӣ. 8Катам Акузитни Игақыхкани игақыхка̄лӷӣ:
«Кияӷныӷым умьюгӣт лӣгиксяҳқа̄наниҳқыхкақӣ.
Хўавымун кынляңа аӷныӷмун ӣйңит ысҳаӷьяҳқа̄наниҳқыхкақӣ,
сигутңитлъю нагақӯсяҳқа̄наниҳқыхкақӣ».
9Давидылъю пика̄гуқ:
«Нықынӷаҳқылъҳит ныгаӷа̄ҳлъит,
на̄птылъҳуҳлъит, на̄хтусӣҳлъит, аӷью̄ӷисӣҳлъит лъңитнун.
10Ӣйңит ая̄лъыңлит ысҳаӷнанӣсқылъюки,
қукӣтлъю пакыгныңлит уқигитның сыӷлылӣлъҳита қӯнпырухлъяк».
11Ынка̄м а̄птамси, Израилыӷмӣт на̄хтақңамың, алъя ныкывыпагниңитақа̄т? Йыӷлыгилъю! Иўырңа Израилыӷмӣт сыӷлыҳқылъҳит апалъюқлъюки, язычнигыт югулилъыңут. Ынка̄м югулилъыңылъҳита Израилыӷмӣт ақинастӣт. 12Кияӷныӷым атуқыхкақӣ сыӷлыҳқылъҳит Израилыӷмӣт тагинъалюку қуястылъыҳлъяк нунам юганун. Израилыӷмӣт ифлъӣлъҳита тагита̄т қуястылъыҳлъяк язычнигнун. Та̄хкын қамахлъютың накмикыхка̄т Израилыӷмӣт, иляскумың югуликанун, қуястылъҳыт натынми угляҳтаткалъықат!
Югулилъҳат Язычнигыт
13Ма̄тын алыҳқуӷьюгамси лъпыси язычнигни. Кияӷныӷым накмикыхкақа̄ңа апостолыңулюңа язычнигның. Ынка̄м пира̄мсипихлъюңа пӣқақа уна мыгнуналӷӣ қыпҳақақ Кияӷныӷым қылӷутка̄ хўаңамнун. 14Апыҳтуӷилъымкун лъпысинун ақинасналюки пӣнка Иудеялгутынка, иляңи югулилъыңысқылъюки. 15Кияӷныӷым иҳсякақңаки Иудеит, нунам юги Иудейеңунӷилңӯт илялӣҳтыстыкақӣ лъңанун. Ынка̄м Иудеит тугуклъинқихтыкумики, уңуваҳлъыҳӣстун туқукат аюқсяҳқа̄гут.
16Нықыкшаңлъям икылъықсюхўа̄ӷа тӯныхкақ Кияӷныӷмун, аглыӷна̄ңукан, та̄ўа ӣңунаӷми нықыкшаңлъяқ аглыӷнаҳтуқ. Аккўи уқфигым аглыӷнақата, авайӣлъю аглыӷнаҳтут.
17Иудеит пӣтысиӷақастун маслинам уқфигатун аюқут иляңи авая̄н айымтыкат. Лъпыси язычнигни аваястун аюқуси айымтыкат пӣтысиӷалъҳилңуӷмың маслинам уқфиганың. Та̄мың уқфигмың, китум тугулюку аваяқ ныкыхтыкумигу пӣтысиӷақамун маслинам уқфиганун, алъхыӷусяҳқа̄гуқ акум мыся̄ның пӣнъапихлъыҳӣмың. 18Сюмыҳтаӷаҳпынаси пиниӷатаӷаӷнилюси аваяның айымтыканың. Қука̄юхтыхпынаси, қаюҳлъяк аваяра̄ӷина̄гуси. Акут икнақуҳтысигатаси, акӯгут икнақуҳсяӷилӷӣт лъпысиның.
19Иўырңа пилъықуси: «А̄а, аваят айымтыка̄гут ныкыхналюта уқфигмун». 20Та̄на ипаңӯқ. Кияӷныӷым айымтақӣ аваят қаюҳлъяк ухпықынӷилъкаңат лъңа. Иўырңа лъпыси ныкыхтыстыкақӣси уқфигмун қаюҳлъяк ухпықыхкыси лъңа. Ынка̄м қука̄юхтыхпынаси, йыӷлыги алиңитык. 21Иудеит аваяҳпига̄гут. Кияӷныӷым айымтыкақутаңаның аваяҳпига̄т, та̄ўа лъпысилъю айымлъықӣси уқфигмың нагныӷунъыӷилъкуфсигу ухпылъыҳси. 22Ынка̄м лӣгикаҳси Кияӷнық наңлъыхтаҳтуқ, аӷью̄тапихтуқлъю. Аӷью̄ӷақӣ сыӷлыҳқыхкат, иўырңа наңлъыкақӣси ныӷьюкумаңинаныҳпысигу наңлъыхталъҳа. Иўырңа ныӷьюкнанӣмакуфсигу лъпысилъю кыпулъықӣси. 23Иудеит ухпықынқихтыкумыхтыху Кияӷнық, ныкыхнықихлъықӣ уқфигмун. Кияӷнық аҳтуӷьяҳқа̄нӷилъылгӯқ ныкыхнықихсяҳқа̄люки ныксяқаңитхун. 24Лъпыси язычнигни аваяпикынӷитӣси пӣтысиӷақам маслинам уқфиган. Кияӷныӷым кыпыхкақӣси пӣтысиӷалъҳилңуӷмың маслинам уқфиганың. Та̄хкын ныкыхтыкақӣси пӣтысиӷақамун маслинам уқфиганун, қайўа югыт ныкыхтиңигасяӷңа̄та уқфигмун таўатылңуӷмың аваямың. Иудеит пӣтысиӷақамың маслинам уқфиганың пиңутмыхның, Кияӷныӷми пияқнӣтут ныкыхнықихсяҳқа̄люки лъңита катам уқфигитнун.
Кияӷнық Наңлъыхтаҳтуқ Тамаңанун
25Ухпықа̄лгутымни, лӣгикысюгамси сямың қайвиҳсимаңилңуӷмың сивунӷани. Апыӷью̄гусиқа лъпысинун унаңӯқ: пыҳқинӷуюгныӷуфқа̄фси писқылъюси сюмыҳтаӷаткаҳтыкилъю. Иляңита Израилыӷмӣт ухпықсюгумаңита̄т Кияӷнық. Таўатылъықут кынляңа Кияӷныӷым накмикыхкӣ язычнигыт қамахлъютың тагиляӷа̄тылъҳитнун лъңанун. 26Та̄хкын қамахлъютың Израилыӷмӣт югулилъыңылъықут. Акузитни Игақыхкани игақңалӷӣ:
«Югулиӷиста тагилъықуқ Сионымың; иқилъықӣ қамахлъюки сыӷлыӷыт киңунӷаның Иаковым.
27Та̄на акықусяқақа лъңитнун
иқискумки сыӷлыҳқылъҳит».
28Иудеит иҳсякыхкақӣт Пинилӷӣт Уңипат ынка̄м Кияӷныӷым аңуякӣ. Лъпыси апалъюқлъюси язычнигни Кияӷныӷым атуқыхкақа̄ иҳсякилъҳат қуясналюси. Иўырңа Иудеит паниның Кияӷныӷым накмикыхкақӣ югыт. Пиниқумаңина̄ўӣ апалъюқлъюку акықусяни сивунӷитнун. 29Кияӷныӷым умьюгагни алъяңуҳтықаҳна̄нӷита̄к. Выҳна̄нӷитӣ тунусяни, пыхна̄нӷитӣлъю накмикыхкани лъңанун югулюки. 30Сивунӷани лъпыси язычнигни қа̄ткылъҳитаҳси Кияӷнық. Иўырңа ма̄тын алъхыҳтаҳси Кияӷныӷым наңлъыхталъҳа қаюҳлъяк Иудеит қа̄ткунъыӷилңӯт. 31Ма̄тын Иудеит қа̄ткусигатут Кияӷныӷмун, ынка̄м наңлъыкақӣси язычнигни. Иўырңа иляңани аӷныӷым лъңиталъю алъхыҳлъықа̄т Кияӷныӷым наңлъыхталъҳа. 32Қамахтыңъўа̄ӷлютың югыт қа̄ткигата̄т Кияӷнық. Қа̄ткунъыӷитылъҳат анусимиңлъяӷвихтун аюқуқ, Кияӷныӷым таўавык канаҳтақыхкаңи. Таўатын пӣқуқ наңлъыкналюки қамахлъюки.
Усюқилъық Кияӷныӷмун
33Ка̄й, сыӷлыҳлъягӯт Кияӷныӷым аклъюңиңи, пыҳқинылъҳа, лӣсималъҳалъю!
Китумңам лӣгикңўа̄ҳлъықаки нанқихтилъҳи?
Китумңам лӣгикңўа̄ҳлъықаки иглыӷныӷи?
34Катам Акузитни Игақыхкани игақңалӷӣ:
«Китум лӣсимакакык умьюгакык Атанӷым?
Китумңам алыҳқуҳлъықагу апақунъалюку?
35Китум алңунак сялисигатагӯу Атанық,
Атаныӷмун лъивикысқылъюку утыӷмун?»
36Сяңўа̄ қамахлъюни лъңаның пиңӯқ, лъңакун пиңӯқ, лъңанунлъю пиңӯқ.
Лъңа усюқылъыңли қӯнпырухлъяк! Аминь.
Селектирано:
К Римлянам 11: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.