От Иакова 4
4
Тӯнитык Лъпысиның Катам Кияӷныӷмун
1Ся̄м а̄ҳтӣра̄ӷутыстақисилъю, пилъюгутыстақӣсилъю? Апалъюқақаҳси, сыӷлыӷым пиюкылъыҳпыси пилъюўаӷақӣ пинилӷӣт пиюкылъыси. 2Қилӣӷақуси аваңинъыҳпысини ынка̄м юхтаӷьяҳқаҳтақуси алъхыҳналюки қилӣқыхкаси. Қилӣҳлъягақуси та̄ўаңинақ алъхыҳтыпагниңитақаҳси ынка̄м а̄ҳтӣра̄ӷутақуси, пилъюгутақуси. Алъхыӷусигатуси Кияӷнық а̄псигатутыхпысиның. 3Талўа а̄птыӷңа̄ҳпысигу Кияӷнық алъхыҳсигатаҳси қаюҳлъяк сыӷлыӷмун атуҳқа̄люки а̄птақылӷӣси. Пиюкыхкаҳси лъпыси катам пиюкыхкаҳӣнаҳпысинун аюқақылӷӣ. 4Укуҳси ата̄сӣӷныӷилңуӷни! Лӣсимакынӷистыхӯ пиниқыхкуфсигу нунам сыӷлыӷа, угумикаҳси Кияӷнық? Китум алңунак пиниқыхкумигу нунам сыӷлыӷа аңуягӯқ Кияӷныӷмун. 5Сюмыҳтаӷаҳпынаси Акузитыт Игақыхкат тымңиңунилюку хўатын пилъҳат, таӷныӷак кияҳлъыҳӣк илюмнъи ақинанақныҳтӯк. 6Тама̄кын апалъюқлъюку Кияӷныӷым каюсӣтаӷаӷақӣлъю нуқытутысқылъюки пиюкылъылюпут. Иўырңа Акузитыт Игақыхкат пӣт:
«Кияӷныӷым каюсиӷақӣ қусывыгңалӷӣт пӯру кипулъыгмун пӣқӣ қука̄югныӷыт».
7Тӯнлюси лъпысиның катам Кияӷныӷмун. Аяклъиҳтыху туӷныӷақ, анагнӣҳлъықуқ лъпысиның. 8Қантаӷалъӣӷаҳтык Кияӷныӷмун, Кияӷнық қантаӷалъӣӷаҳлъықуқ лъпысинун. Сыӷлыҳқыстыни, ӯҳтуҳтык! Лъпыси ата̄сӣҳтылъҳилңуӷни, укмаңиҳтыки илюси қа̄мкут. 9Қуянӷитык, асымыҳқитык, қиятык! Ныңляҳқылъҳыси қиялъҳуҳтыки, қуялъыси қуянӷилңӯҳтыстыки. 10Қусывыхтык Атаныӷмун, қӯлваҳлъықӣси.
Нанқихтутыхпынаси
11Ухпықа̄лгутымни, сыӷлықӯӷутыхпынаси. Китум алңунак сыӷлықӯқумигу ухпықа̄лгутыни, сыӷлықӯҳлъықӣ Лӣлиҳтӯсят. Нанқихтыкумигулъю ухпықа̄лгутыни нанқихтыңъўӣ Лӣлиҳтӯсят. Нанқихтыкуфки Лӣлиҳтӯсят қа̄ткыңъунӷитатын. Йыӷлыги Лӣлиҳтӯсят нанқихтистыка̄тын. 12Кияӷныҳӣна̄гуқ Лӣлиҳтӯсяңлъяҳта, нанқихтисӣлюки атуқақӣ, ынка̄м сяңанңам нанқихсигу юлгутын? Кияӷныҳӣна̄гуқ югулиӷияҳқақ, на̄фқияҳқақ.
Налъюкаҳпут Уна̄ми Сялъыҳқаҳпут
13Иляси хўатын пӣқут: «Аӷныӷми налиӷмың уна̄ми таўавык нунамун аӷуляқылъықуңа. Тама̄нлъықуңа ата̄сиқ аюмиқулъық, маниңлъяҳлъықуңа». 14Иўырңа налъюкаҳси уна̄ми сялъыҳқаҳси! Талўа налъюкаҳси уңувалъыҳпыси тахталъкаҳқа̄. Уңувалъыҳси такысқуҳа̄гуқ, агыпсюӷрухаӷыстун аюқуқ, мулюхпынани авӣӷуткаюк. 15Итупилъ хўатын пӣқитык: «Атанӷым пиюкылъқыхкагу уңувакыстаҳлъықукут ынка̄м апыӷӣӷутақылъықукут сямың алңунак». 16Таўатын пинӷилъкуфси а̄ңа̄юхлъықусилъю, қанаңулъықусилъю. Тама̄кут а̄ңа̄юхтылъҳыт сыӷлыӷӯт.
17Ынка̄м китум алңунак лӣсимакыӷңа̄ӷмигу пинитун пилъық атуқынӷилъкумигу, сыӷлыҳқыңъӯқ.
Селектирано:
От Иакова 4: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.