ဢီႉသႃႇယႃႉ 45
45
ထႃႇဝရႃႉၽြႃးၶၢၼ်းၶုၼ်ၵူႉရူႉ
1ထႃႇဝရႃႉၽြႃး မီးဢမိင်ႉတီႈၶုၼ်ၵူႉရူႉ ဢၼ်ပဵၼ်ၵူၼ်းမၼ်းၸဝ်ႈ ဢၼ်ၶၢမ်ႇၽိၵ်ႈသိၵ်ႈ ဢၼ်ၵဝ်ၵမ်ႉထွၵ်ႈမိုဝ်းၶွၼ်ၶႂႃမၼ်း ႁႂ်ႈလႆႈဢဝ်တိၼ်ယဵပ်ႇၶၢမ်ႈ ၵူႈသိုင်ႇၵူႈမိူင်းၵႃႈတီႈၽၢႆႇၼႃႈမၼ်းႁႂ်ႈလႆႈၽုၺ်ႇၽၵ်းတူ ဢၼ်မီးသွင်မႂ်ပၼ်ႇလႄႈဢမ်ႇလႆႈ၊ ဢၼ်ၵဝ်ႁဵတ်းႁႂ်ႈ ဢႅဝ်ၶုၼ်ႁေႃၶမ်းတင်းလၢႆဢူၼ်ႈၵႂႃႇ ဢိၵ်ႇတင်းဢုတ်းၽၵ်းတူ ၽၢႆႇတၢင်းၼႂ်းၼၼ်ႉၸမ်ႉ၊- 2ၵဝ်တၵ်းၵႂႃႇဢွၼ်တၢင်းမႂ်းလႄႈ ႁႂ်ႈတီႈဢၼ်သုင်တင်းလၢႆပဵင်းဢေႃႈ။ ၵဝ်တၵ်းၵႄႈႁၵ်းပႅတ်ႈၽၵ်းတူတွင်းလိူင်တင်းလၢႆလႄႈ တႅပ်းၵိူၼ်ႇလဵၵ်းပႅတ်ႈ ပဵၼ်ပွတ်းပဵၼ်တွၼ်ႈဢေႃႈ။- 3ၵဝ်တၵ်းဢဝ်ၽၼ်ႇတႃႇ ဢၼ်မီးၵႃႈတီႈလပ်းသိင်ႇ၊ ဢုၵ်ႉၸႃႇဢၼ်သိူင်ႇလပ်ႉဝႆႉ လွတ်ႈလွတ်ႈလီလီ ၸိူဝ်းၼၼ်ႉ ပၼ်တီႈမႂ်းႁႂ်ႈမႂ်းလႆႈႁူႉလွင်ႈဢၼ် ၵဝ်ထႃႇဝရႃႉၽြႃး ဢၼ်ႁွင်ႉၸိုဝ်ႈႁွင်ႉသဵင်မႂ်းၼၼ်ႉ ပဵၼ်ၽြႃးပဵၼ်ၸဝ်ႈ ဢီႉသရေႇလႃႉၼၼ်ႉဢေႃႈ။- 4ပုၼ်ႈယႃႇၵုပ်ႈ ဢၼ်ပဵၼ်ၶႃႈၵဝ်၊ ဢီႉသရေႇလႃႉဢၼ်ၵဝ်လိူၵ်ႈၵဵပ်းဢဝ်ၼၼ်ႉၸိုင်၊ ၵဝ်ဢဝ်ၸိုဝ်ႈမႂ်းသဵင်မႂ်းႁွင်ႉႁဵၵ်ႈမႂ်းဢေႃႈ။ပိၵ်ႉသမ်ႉမႂ်းဢမ်ႇႁူႉၵဝ်သေၵေႃႈ ၵဝ်ထၢပ်ႈပၼ်ၸိုဝ်ႈသဵင်ဢၼ်မႂ်ႇ တီႈမႂ်းဢေႃႈ။- 5ၵဝ်သူႇလဵဝ်ပႃးလဵဝ်ၵူၺ်း ပဵၼ်ထႃႇဝရႃႉၽြႃးဢေႃႈ။ ၼွၵ်ႈသေၵဝ်ၼႆႉၽြႃးပဵၼ်ၸဝ်ႈ တၢင်ႇသူႇတၢင်ႇပႃးဢမ်ႇမီး။ ပိၵ်ႉသမ်ႉမႂ်းဢမ်ႇႁူႉၸၵ်းၵဝ်သေၵေႃႈ ၵဝ်တၵ်းႁတ်ႉပၼ်ဢႅဝ်မႂ်းဢေႃႈ။- 6ႁႂ်ႈၶဝ်ၸိူဝ်းဢၼ်ယူႇၸႃႉၸဵမ်တီႈဢၼ်ၵၢင်ဝၼ်းဢွၵ်ႇ တေႃႇထိုင်ႁွတ်ႈတီႈဢၼ်ၵၢင်ဝၼ်းတူၵ်းၼၼ်ႉ လႆႈႁူႉလွင်ႈဢၼ် ၼွၵ်ႈသေၵဝ်ၼႆႉဢမ်ႇမီးၽြႃး တၢင်ႇသူႇတၢင်ႇပႃးလႄႈ ၵဝ်သူႇလဵဝ်ပႃးလဵဝ်ၵူၺ်း ပဵၼ်ထႃႇဝရႃႉၽြႃး ၼၼ်ႉဢေႃႈ။- 7ၵဝ်ႁဵတ်းပဵၼ်ဢၼ်လႅင်းလႄႈ ဢၼ်လပ်းသိင်ႇၵေႃႈ ၵဝ်ၽၢၼ်ႇသၢင်းဢေႃႈ။ ၵဝ်ႁႂ်ႈတၢင်းဢၼ်ၼိမ်ဢၼ်လီ ပဵၼ်မႃးလႄႈဢႃႉမင်ႇၵလႃႇၵေႃႈ ၵဝ်ၽၢၼ်ႇသၢင်းဢေႃႈ။ ၵဝ်ပဵၼ် ထႃႇဝရႃႉၽြႃး ဢၼ်ႁဵတ်းလွင်ႈတၢင်းၵႃႈမီး တင်းသဵင်ႈတင်းလူင်ၸိူဝ်းၼႆႉဢေႃႈ။- 8ၽႃႉၵၢင်ႁၢဝ်ၶဝ်ဢိူၺ်း၊ ႁူဝ်ႈယွတ်ႇသေ ၵႃႈတီႈၼိူဝ်တူၵ်းတႃႉ။ ႁႂ်ႈၽႃႈၽူၼ်ၸိူဝ်းၼၼ်ႉ တူၵ်းၽူၼ်တြႃးသေ။ ႁႂ်ႈလိၼ်မိူင်းၼႆႉ ၽုၺ်ႇပိုတ်ႇလႄႈ မၢၵ်ႇမၢၵ်ႇတၢင်းဢၼ်ၵႄႇသႄႇၶျွတ်ႈဢဝ်ၼၼ်ႉသေ။ ႁႂ်ႈတြႃးဢၼ်သိုဝ်ႈတေႃႇၼၼ်ႉ ဢွၵ်ႇမႃး ၽွမ်ႉၵမ်းလဵဝ်ၵၼ် သေ။ ၵဝ်ထႃႇဝရႃႉၽြႃး ၽၢၼ်ႇသၢင်းၸိူဝ်ႉၼင်ႇၼၼ်ဢေႃႈ။
ထႃႇဝရႃႉၽြႃးပဵၼ်ၸဝ်ႈပဵၼ်ပိုၼ်းဢၼ်ၽၢၼ်ႇသၢင်းႁဵတ်းပဵၼ်
9ၵေႃႉဢၼ်ႁဵတ်းၶတ်းၵၼ်တင်း ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မၼ်းၼၼ်ႉ မီးဢႃႉမင်ႇၵလႃႇဢေႃႈ။ မၼ်းပဵၼ်ၽၢၵ်ႇမေႃႈၵႃႈၼႂ်းၽၢၵ်ႇမေႃႈလိၼ်တင်းလၢႆလူင်ပႄႇ။ လိၼ်မေႃႈ တၵ်းလႆႈထၢမ်တီႈၵေႃႉဢၼ် ဢဝ်မၼ်းႁဵတ်းၼၼ်ႉလႄႈဝႃႈ၊ မႂ်းဢဝ်ႁဵတ်းၵႃႈသင်၊ ဝႃႈၼင်ႇၼႆႁိုဝ်။ လွင်ႈတၢင်းဢၼ်မႂ်းႁဵတ်းၼၼ်ႉတၵ်းလႆႈလၢတ်ႈလႄႈဝႃႈ၊ ၵေႃႉဢၼ်ႁဵတ်းၵဝ်ၼၼ်ႉ ဢမ်ႇမီးမိုဝ်းၵူၺ်ႉ၊ ဝႃႈၼင်ႇၼႆႁိုဝ်။- 10ၵေႃႉဢၼ် လၢတ်ႈတီႈပေႃႈမၼ်းလႄႈဝႃႈ၊ မႂ်းတၵ်းႁႂ်ႈပဵၼ်ဢၼ်ၸိူဝ်ႉၼင်ႇႁိုဝ်ၼၼ်ႉ၊ ဝႃႈၼင်ႇၼႆလႄႈ လၢတ်ႈတီႈမႄႈမၼ်း လႄႈဝႃႈ၊ မႂ်းတၵ်းၵိူတ်ႇလဵင်ႉ ဢၼ်ၸိူဝ်ႉၼင်ႇႁိုဝ်ၼၼ်ႉမႃး၊ ဝႃႈၼင်ႇၼႆၼၼ်ႉ မီးဢႃႉမင်ႇၵလႃႇဢေႃႈ။- 11ထႃႇဝရႃႉၽြႃး ၸဝ်ႈဢၼ် မူတ်းၸၢင်ႇမဵဝ်းဢီႉသရေႇလႃႉ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မဵဝ်းၼၼ်ႉ မီးဢမိင်ႉဝႆႉၸမ်ႉ၊သူဢွၼ်ၵၼ်တွင်ႈထၢမ် လူၺ်ႈလွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉတီႈၵဝ်တႃႉ။ ဢွၼ်ၵၼ်ၸီႇယၢင်ႇၵဝ်လူၺ်ႈလွင်ႈ လုၵ်ႈလၢင်းၵဝ် ဢိၵ်ႇတင်းလူၺ်ႈလွင်ႈတၢင်းဢၼ်မိုဝ်းၵဝ်ႁဵတ်းၼၼ်ႉတႃႉ။- 12ၵဝ်ႁဵတ်းလိၼ်မိူင်းဝႆႉယဝ်ႉ။ ၵဝ်ၽၢၼ်ႇသၢင်းႁဵတ်းပဵၼ်ၵူၼ်း ၵႃႈၼိူဝ်မၼ်းဝႆႉယဝ်ႉ။ ၵဝ်ဢၼ်ဝႃႈ မိုဝ်းၵဝ်ၼႆႉ ၶဵင်ႈမုင်း ၽႃႉၵၢင်ႁၢဝ်ဝႆႉလႄႈ ၸီႇယၢင်ႇၶၢၼ်းၶိူင်ႈပိူင်မၼ်း တင်းသဵင်ႈတင်းလူင်ဝႆႉယဝ်ႉ။- 13ၵဝ်ႁႂ်ႈမၼ်းၼၼ်ႉ ပေႃႇဢွၵ်ႇမႃး ၸွမ်းၵႃႈၼင်ႇဢၼ်တြႃးတၢင်းသိုဝ်ႈတေႃႇမီးၼၼ်ႉလႄႈ ၵဝ်တၵ်းႁႂ်ႈသဵၼ်ႈတၢင်းၵႃႈဢၼ်မၼ်းၵႂႃႇမၼ်းပႆၼၼ်ႉသိုဝ်ႈဢေႃႈ။ မၼ်းတၵ်းတႄႇႁဵတ်းဝဵင်းၵဝ်လႄႈ မၼ်းယင်းဢမ်ႇဢဝ်ၵႃႈမၼ်းၶၼ်မၼ်း၊ ယင်းဢမ်ႇၶၢမ်ႇဢဝ်သူး ဢဝ်လၢပ်ႈလႄႈ တၵ်းပွႆႇၵူၼ်းၵဝ်ဢၼ်လႆႈၶၢမ်ႇတၢင်းဢၼ်သိမ်းဢဝ်ၶျုၵ်ႈဝႆႉၸိူဝ်းၼၼ်ႉလွတ်ႈဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇ ၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။- 14ထႃႇဝရႃႉၽြႃး သမ်ႉမီးဢမိင်ႉထႅင်ႈၸမ်ႉ၊ တၢင်းဢၼ်မိူင်းဢေႇၵိပ်ႉတူႉ ဝီႉရီႉယႃႉ ႁဵတ်းၵႃႉႁဵတ်းၶၢႆ တၢင်းဢၼ်မိူင်းၵူႉသႃႉ ပဵၼ်တိုၼ်းပဵၼ်ႁွၼ်း ဢိၵ်ႇတင်း ၵူၼ်းမဵဝ်းသေးၽႃႉ ဢၼ်တူဝ်ယႂ်ႇတူဝ်သုင်ၸိူဝ်းၼၼ်ႉ တၵ်းလႆႈႁွတ်ႈမႃးၵႃႈတီႈၽၢႆႇမႂ်းလႄႈ ပဵၼ်ဢုၵ်ႉၸႃႇမႂ်းဢေႃႈ။ ၶဝ်ၼၼ်ႉ တၵ်းလႆႈၸွမ်းပႃႈလင်မႂ်းလႄႈ ၶၢမ်ႇတၢင်းဢၼ် ၸိူၵ်ႈလဵၵ်းမတ်ႉၽုၵ်ႇယူႇ သေလႄႈ ၸွမ်းဢေႃႈ။ ၶဝ်တၵ်းဢွၼ်ၵၼ်ၶုပ်ႉမူပ်ႇၵႃႈတီႈ ၽၢႆႇၼႃႈမႂ်းလႄႈ တွင်းပၢၼ်ႇတီႈမႂ်းလႄႈဝႃႈ၊ ၽြႃးပဵၼ်ၸဝ်ႈ မီးတီႈၸဝ်ႈႁဝ်း ဢမၢၼ်ႇၶၼ်ပဵၼ်ၶႃႈဢေႃႈ။ ၼွၵ်ႈသေၽြႃးၼၼ်ႉ ဢမ်ႇမီးၽြႃး တၢင်ႇသူႇတၢင်ႇပႃးၶႃႈယဝ်ႉ၊ ဝႃႈၼင်ႇၼႆဢေႃႈ။- 15ၽြႃးပဵၼ်ၸဝ်ႈ မဵဝ်းဢီႉသရေႇလႃႉ၊ ၸဝ်ႈဢၼ် ၵႄႇသႄႇၶျွတ်ႈဢဝ်တီႈၶႃႈ၊ ၸဝ်ႈႁဝ်းပဵၼ် ၽြႃးပဵၼ်ၸဝ်ႈ ဢၼ်သိူင်ႇလပ်ႉတူဝ်ၸဝ်ႈၵဝ်ႇဝႆႉတီႈၶႃႈဢေႃႈ။- 16ၶဝ်ၵႃႈဢၼ်ႁဵတ်းရုၵ်ႈထူႉ ၸိူဝ်းၼၼ်ႉ တၵ်းဢွၼ်ၵၼ်ဢူၵ်းဢၢႆ သေလႄႈ ၵႂင်ၸႂ်ယုင်ႈၸႂ်လႄႈ တၵ်းလႆႈႁွတ်ႈထိုင်ၵႂႃႇ ၵႃႈၼႂ်းတၢင်းဢၼ်ၸႂ်မၢၵ်ႇၸႂ်မိူဝ်ၼၼ်ႉ ၽွမ်ႉမိူဝ်ႈလဵဝ်ၵမ်းလဵဝ်ၵၼ်ဢေႃႈ။- 17မဵဝ်းဢီႉသရေႇလႃႉၸမ်ႉ၊ တၵ်းႁွတ်ႈထိုင်တၢင်းဢၼ် ထႃႇဝရႃႉၽြႃး ၵႄႇသႄႇၶျွတ်ႈဢဝ် ထႃႇဝရႃႉၼၼ်ႉလႄႈ၊ ၵၢင်းလွတ်ႈတင်း တၢင်းဢၼ်ဢူၵ်းဢၼ်ဢၢႆ တၢင်းဢၼ်ၵႂင်ၸႂ်ယုင်ႈၸႂ်ယူႇ ၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်းဢေႃႈ။- 18ထႃႇဝရႃႉၽြႃး ဢၼ်ၽၢၼ်ႇသၢင်းၽႃႉၵၢင်ႁၢဝ်၊ ၽြႃးပဵၼ်ၸဝ်ႈ ဢၼ်ပွင်မႄးႁဵတ်းပဵၼ်လိၼ်မိူင်းလႄႈ ႁႂ်ႈတႄႇယူႇမၼ်ႈမၼ်ႈၶိူင်ႇၶိူင်ႇ၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မၼ်း ပဝ်ႇဝႆႉလၢပ်ႈဝႆႉဢမ်ႇၸႂ်ႈ၊ ဢၼ်ပွင်မႄးမၼ်းဝႆႉ ႁႂ်ႈပဵၼ်ပုၼ်ႈဢၼ်သတ်ႉတဝႃႇ တၵ်းလႆႈယူႇလႆႈသဝ်းၼၼ်ႉ မီးဢမိင်ႉဝႆႉၸမ်ႉ၊ ၵဝ်ပဵၼ် ထႃႇဝရႃႉၽြႃးဢေႃႈ။ ၼွၵ်ႈသေၵဝ်ၼႆႉဢမ်ႇမီးၽြႃးတၢင်ႇသူႇတၢင်ႇပႃး၊- 19ၵဝ်ဢမ်ႇႁေႃးလၢတ်ႈၼႂ်းတီႈဢၼ်တဵတ်ႇဢၼ်မႅပ်ႉ၊ တီႈဢၼ်လပ်းသိင်ႇ ၵႃႈၼႂ်းလိၼ်မိူင်း၊ ၵဝ်ဢမ်ႇလၢတ်ႈတီႈမဵဝ်းယႃႇၵုပ်ႈလႄႈဝႃႈ၊ သူၼႆႉယင်းဢမ်ႇမီးဢၵျူဝ်းလႄႈ ႁႃဢဝ်ၵဝ်တႃႉ၊ ဝႃႈၼင်ႇၼႆၼၼ်ႉ။ ၵဝ်ထႃႇဝရႃႉၽြႃး ၸၢင်ႈမွၵ်ႇလၢတ်ႈတၢင်းဢၼ်သိုဝ်ႈ ဢၼ်တေႃႇလႄႈ ႁေႃးလၢတ်ႈလွင်ႈတၢင်းဢၼ်ၸိုဝ်ႈဢၼ်ၸႂ်ႈဢေႃႈ။
ထႃႇဝရႃႉၽြႃးဢိၵ်ႇတင်းရုၵ်ႈထူႉသၢင်းထူႉမိူင်းပႃႇပူႉလုၼ်ႇ
20သူၵေႃႈၸူႉၵၼ်တုမ်ၵၼ်သေလႄႈမႃးတႃႉ။ သူၸိူဝ်းဢၼ် လွတ်ႈသေၽေးၵူႈသိုင်ႇၵူႈမိူင်းၶဝ်ဢိူၺ်း၊ ဢွၼ်ၵၼ်သုတ်ႉၸပ်းသုတ်ႉၸူးတီႈၵၼ်တႃႉ။ ၶဝ်ၸိူဝ်းဢၼ်ဢဝ်ၼိူဝ်ႉမႆႉရုၵ်ႈထူႉ ဢၼ်ၶဝ်တွင်ႈႁဵတ်းၶၵ်းႁဵတ်းၼၼ်ႉ ၵႂႃႇလႄႈ သူးတွင်းႁဵတ်းပထၼႃႇ တီႈၽြႃးဢၼ်ဢမ်ႇၵႄႇသႄႇၶျွတ်ႈဢဝ်လႆႈၼၼ်ႉၸိူဝ်းၼၼ်ႉ ဢမ်ႇမီးပိင်ႇၺႃႇ။- 21ဢွၼ်ၵၼ်မွၵ်ႇလၢတ်ႈလႄႈ ၽုၺ်ႇဢွၵ်ႇၼႄပျႃးတႃႉ။ ႁႂ်ႈၶဝ်တိူင်ႇပၢင်ႇၵၼ်သေ။ ၽူႈလႂ်ၽုၺ်ႇဢွၵ်ႇၼႄပျႃးလွင်ႈတၢင်းၼႆႉ ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉ။ ၽူႈလႂ်မွၵ်ႇလၢတ်ႈ မိူဝ်ႈမိုၼ်ႉၸိုၼ်ႉသိုၼ်းၼၼ်ႉ။ ၵဝ်ထႃႇဝရႃႉၽြႃး မွၵ်ႇလၢတ်ႈဢမ်ႇၸႂ်ႈႁိုဝ်။ ၼွၵ်ႈသေၵဝ်ၼႆႉ ဢမ်ႇမီးၽြႃးပဵၼ်ၸဝ်ႈတၢင်ႇသူႇတၢင်ႇပႃး။ ၵဝ်ပဵၼ်ၽြႃး ဢၼ်သိုဝ်ႈတေႃႇ၊ ၽြႃးဢၼ်ၵႄႇသႄႇၶျွတ်ႈဢဝ်ဢေႃႈ။ ၼွၵ်ႈသေၵဝ်ၼႆႉ ဢမ်ႇမီးၽြႃးပဵၼ်ၸဝ်ႈတၢင်ႇသူႇတၢင်ႇပႃး။- 22သူၸိူဝ်းဢၼ်ယူႇ ၵႃႈတီႈသုတ်းလိၼ်မိူင်း တင်းသဵင်ႈတင်းလူင်ၶဝ်ဢိူၺ်း၊ ႁႅၼ်တူၺ်းၵဝ်လႄႈ ၶၢမ်ႇဢဝ်ၵျေးၸူးတၢင်းဢၼ်ၵႄႇသႄႇၶျွတ်ႈဢဝ်တႃႉ။ ၵဝ်ၼႆႉပဵၼ် ၽြႃးပဵၼ်ၸဝ်ႈဢေႃႈ။ ၼွၵ်ႈသေၵဝ်ၼႆႉ ဢမ်ႇမီးၽြႃးတၢင်ႇသူႇတၢင်ႇပႃး။- 23ၵဝ်ဢဝ်တူဝ်ၸဝ်ႈၵဝ်ႇ တိူင်ႇဝႃႈလႄႈ ၵႂၢမ်းလႆႈဢွၵ်ႇသူပ်းၵဝ် ၸွမ်းၼင်ႇတြႃးတၢင်းဢၼ်သိုဝ်ႈတေႃႇၼၼ်ႉ လႄႈဝႃႈ၊ ၵူႈၵေႃႉၵူႈၵူၼ်းတၵ်းလႆႈၶုပ်ႉၶဝ်ႇ ၵႃႈတီႈၽၢႆႇၼႃႈၵဝ်ဢေႃႈ။ ၵူႈၵေႃႉၵူႈၵူၼ်းတၵ်းလႆႈဢဝ်တင်းသူပ်းၶဝ်ၶၢမ်ႇသဵတ်ႈၸႃႇဢေႃႈ၊ ဝႃႈၼင်ႇၼႆယဝ်ႉလႄႈ ယင်းဢမ်ႇပျေႉၸုမ်ႇဢမ်ႇလႆႈယူႇ။- 24ၵူႈၵေႃႉၵူႈၵူၼ်း တၵ်းလႆႈဢွၼ်ၵၼ်လဝ်ႊလၢတ်ႈတီႈၵဝ်လႄႈဝႃႈ၊ ၵႃႈၼႂ်းထႃႇဝရႃႉၽြႃး ၵူၺ်းမီးတၢင်းဢၼ်သိုဝ်ႈတေႃႇ ဢိၵ်ႇတင်း တၢင်းဢၼ်ၵတ်ႉဢၼ်ၶၼ်ဢေႃႈ၊ ဝႃႈၼင်ႇၼႆဢေႃႈ။ ၵူၼ်းတင်းလၢႆ တၵ်းဢွၼ်ၵၼ်မႃးတီႈမၼ်းၸဝ်ႈလႄႈ ၶဝ်ၸိူဝ်းဢၼ်ဢမ်ႇၼႃႇလူဝ်ႇမၼ်းၸဝ်ႈ တင်းသဵင်ႈတင်းလူင်ၼၼ်ႉ တၵ်းဢွၼ်ၵၼ်ႁွတ်ႈထိုင် တၢင်းဢၼ်ဢူၵ်းဢၼ်ဢၢႆဢေႃႈ။- 25ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် တၵ်းဢွၼ်ၵၼ်ႁွတ်ႈထိုင် တၢင်းဢၼ်သိုဝ်ႈတေႃႇ ၵႃႈၼႂ်း ထႃႇဝရႃႉၽြႃးလႄႈ ဢုပ်ႇဝၢဝ်းဢေႃႈ။
Copyright © 2021 by OMF International, Shan Baptist Churches Fellowship