ဢီႉသႃႇယႃႉ 26
26
ၵႂၢမ်းယွင်ႈယေႃးပုၼ်ႈတၢင်းပႄႉၼႅင်ႇ
1ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ၵႂၢမ်းဢၼ်တၵ်းလႆႈႁဵတ်းၵႂၢမ်းၵႃႈၼႂ်းမိူင်းယူႉတႃႉၸမ်ႉ၊ ႁဝ်းမီးဝဵင်းဢၼ်မၼ်ႈၶိူင်ႇဢေႃႈ။ မၼ်းၸဝ်ႈတၵ်း ၸီႇယၢင်ႇၶၢၼ်း ၵျေးၸူးတၢင်းဢၼ်မၼ်းၸဝ်ႈ ၵႄႇသႄႇၶျွတ်ႈဢဝ်ၼၼ်ႉ ဝႆႉပဵၼ်ပုၼ်ႈလမ်းဝဵင်း ဢိၵ်ႇတင်း ထဵင်လၢင်းတင်းလၢႆဢေႃႈ။- 2ဢွၼ်ၵၼ်ၽုၺ်ႇပိုတ်ႇၽၵ်းတူ ႁႂ်ႈမဵဝ်းၵူၼ်းဢၼ်ပႂ်ႉသဵတ်ႈၸႃႇလႄႈ သိုဝ်ႈတေႃႇၼၼ်ႉ လႆႈၶဝ်ႈတႃႉ။- 3ၸဝ်ႈႁဝ်းတၵ်းပႂ်ႉလူပႂ်ႉတူၺ်းယူႇ ႁႂ်ႈၵေႃႉဢၼ်ႁူဝ်ၸႂ်တႄႇလီၼိမ်လီၼၼ်ႉ လႆႈမီးတၢင်းဢၼ် တႄႇၼိမ်ၵူၺ်းၵူၺ်း ၵွပ်ႈပိူဝ်ႈဢၼ်မၼ်း ဢိင်ပိုင်ႈၸဝ်ႈႁဝ်းယူႇၼၼ်ႉတီႈၶႃႈဢေႃႈ။- 4ဢွၼ်ၵၼ်ဢိင်ပိုင်ႈ ထႃႇဝရႃႉၽြႃး ယူႇတႃႇသေႇဢမ်ႇထၢတ်ႇတႃႉ။ ၸဝ်ႈထႃႇဝရႃႉၽြႃး ပဵၼ်တီႈဢၼ်သွၼ်ႈပိုင်ႈ ၼိၵ်ႈၸႃႉထႃႇဝရႃႉဢေႃႈ။- 5မၼ်းၸဝ်ႈဢဝ်ၶဝ်ၸိူဝ်းဢၼ် ယူႇၵႃႈတီႈဢၼ်သုင်ၼၼ်ႉ ၶျႃးတူၵ်းသေလႄႈ ၵိူၼ်ႇယႃႉဝဵင်းဢၼ်သုင်မျၢတ်ႈၼၼ်ႉလႄႈ ၶျႃးတူၵ်းၸူးတီႈလိၼ် သေလႄႈ ႁဵတ်းႁႂ်ႈတႅမ်ႇတေႃႇထိုင်ႁွတ်ႈမုၼ်ႈလိၼ်ဢေႃႈ။- 6တိၼ်ဢၼ်ဝႃႈ တိၼ်ၶဝ်ၸိူဝ်းဢၼ်ၽၢၼ်ဢၼ်ၵိၼ်း ဢိၵ်ႇတင်း ယၢင်ႈတိၼ်ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉတၵ်းဢွၼ်ၵၼ်ယဵပ်ႇၶၢမ်ႈမၼ်းဢေႃႈ။- 7သဵၼ်ႈတၢင်းၵေႃႉဢၼ်သိုဝ်ႈတေႃႇၼၼ်ႉ ပဵၼ်ဢၼ်သိုဝ်ႈလီဢေႃႈ။ ၸဝ်ႈႁဝ်းဢၼ်သိုဝ်ႈတေႃႇၼႆႉ တၵ်းပွင်ႁဵတ်းပွင်မႄးသဵၼ်ႈတၢင်းၵေႃႉဢၼ်သိုဝ်ႈတေႃႇၼၼ်ႉတီႈၶႃႈဢေႃႈ။- 8ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁဝ်းၶဝ်ၸွမ်းသဵၼ်ႈတၢင်းတၢင်းဢၼ် ၸဝ်ႈႁဝ်းၸႅတ်ႈထၢမ်ၸီႇယၢင်ႇၸိူဝ်းၼၼ်ႉယူႇသေလႄႈမုင်ႈမွင်း ၸဝ်ႈႁဝ်းယူႇလႄႈ ႁူဝ်ၸႂ်ၶႃႈၸဝ်ႈႁဝ်းၶဝ် တိူင်ႇႁႃၵၢဝ်ႇႁႃၼႃႇမႃႉၸိုဝ်ႈသဵင်ၸဝ်ႈႁဝ်း ဢိၵ်ႇတင်းတၢင်းဢၼ် ၶုၵ်းၸႂ်လႆႈၶႆႈၸႂ်ထူပ်း ၸဝ်ႈႁဝ်းၼၼ်ႉယူႇတီႈၶႃႈဢေႃႈ။- 9ၶိင်ႇၵၢင်ၶိုၼ်း ၶႃႈၸဝ်ႈဢဝ်တင်းႁူဝ်ၸႂ်တိူင်ႇႁႃၵၢဝ်ႇႁႃၸဝ်ႈႁဝ်းယူႇလႄႈ ၶိင်ႇၵၢင်ၼႂ်၊ ၶႃႈၸဝ်ႈဢဝ်တင်းဝီႉၺိၺ်ႇဢၼ်ၵႃႈၼႂ်း ႁႃၸဝ်ႈႁဝ်းယူႇတီႈၶႃႈဢေႃႈ။ ယၢမ်းမိူဝ်ႈဢၼ်တၢင်းဢၼ် ၸဝ်ႈႁဝ်းၸႅတ်ႈထၢမ်ၸီႇယၢင်ႇၸိူဝ်းၼၼ်ႉ မီးၵႃႈၼိူဝ်လိၼ်မိူင်းၼၼ်ႉၸိုင်၊ ၵူၼ်းလေႃးၵီႇတင်းလၢႆ ဢွၼ်ၵၼ် သွၼ်ဢဝ်တြႃးတၢင်းဢၼ်သိုဝ်ႈတေႃႇဢေႃႈ။- 10ၵေႃႉဢၼ်ဢမ်ႇတြႃးၼၼ်ႉ ပိၵ်ႉသမ်ႉလႆႈၶၢမ်ႇ ၵျေးၸူးသေၵေႃႈ၊ ဢမ်ႇၸၢင်ႈသွၼ်ဢဝ်တြႃးတၢင်းဢၼ်သိုဝ်ႈဢၼ်တေႃႇတီႈၶႃႈ၊ မၼ်းႁဵတ်းမိူၵ်ႈႁဵတ်းရိူင်း ယူႇၵႃႈၼႂ်းမိူင်းဢၼ်ၵမ်ၵျၢင်ႉတြႃးယူႇၼၼ်ႉလႄႈ ဢမ်ႇၸၢင်ႈႁူႉၸၢင်ႈႁၼ် မုၼ်ၽုင်းထႃႇဝရႃႉၽြႃးတီႈၶႃႈ၊- 11ထႃႇဝရႃႉၽြႃးတီႈၶႃႈ၊ ပိၵ်ႉသမ်ႉၸဝ်ႈႁဝ်းယုၵ်ႉမိုဝ်းၸဝ်ႈႁဝ်းဝႆႉသေၵေႃႈ ၶဝ်ၼၼ်ႉဢမ်ႇႁူႉဢမ်ႇႁၼ်တီႈၶႃႈ၊ ၼႂ်းဝႃႈၼၼ် သေၵေႃႈ၊ ၶဝ်ၼၼ်ႉတၵ်းလႆႈႁူႉလႆႈႁၼ်လွင်ႈဢၼ်ၸဝ်ႈႁဝ်း ၸႂ်ႁႅင်းယႂ်ႇၼႃႇ ပုၼ်ႈၵူၼ်းၸဝ်ႈႁဝ်းတင်းလၢႆၼၼ်ႉလႄႈ ဢူၵ်းဢၢႆ တီႈၶႃႈဢေႃႈ။ ၽႆးတၵ်းလႆႈမႆႈရၢၼ်ႇသူႇၸဝ်ႈႁဝ်းတင်းလၢႆပႅတ်ႈတီႈၶႃႈဢေႃႈ။- 12ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းတၵ်းပၼ်တၢင်းဢၼ်ၼိမ်ဢၼ်လီ တီႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ လွင်ႈမၼ်းၸမ်ႉ ၸဝ်ႈႁဝ်းႁဵတ်းဢမူႉၶႃႈၸဝ်ႈႁဝ်းၶဝ်ၵႃႈမီးၼၼ်ႉ ပုၼ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။- 13ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ။ ၼွၵ်ႈသေၸဝ်ႈႁဝ်းၼႆႉ ၸဝ်ႈတၢင်ႇၵေႃႉတၢင်ႇၵူၼ်း လႆႈဢွၼ်ၵၼ်ဢုပ်ႉပိူင်ႇၶႃႈၸဝ်ႈႁဝ်းၶဝ်တီႈၶႃႈယဝ်ႉ။ မိူဝ်ႈလဵဝ်ၼႆႉၸမ်ႉ၊ တၵ်းဢွၼ်ၵၼ်ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းၵူၺ်း တီႈၶႃႈဢေႃႈ။- 14ၸဝ်ႈၸိူဝ်းၼၼ်ႉ တၢႆယဝ်ႉတီႈၶႃႈယဝ်ႉ။ ၵမ်းလိုၼ်းဢသၢၵ်ႈဢမ်ႇလႆႈၶိုၼ်းလိပ်းတီႈၶႃႈ၊ ပဵၼ်ၵူၼ်းပႃႇႁဵဝ်ႈသၢင်းၶႅင်းလႄႈ ဢမ်ႇလႆႈမီးတၢင်းဢၼ်လုၵ်ႉၶိုၼ်းတီႈၶႃႈ၊ ပိူဝ်ႈၼႆလႄႈၸဝ်ႈႁဝ်း မႃးလူမႃးတူၺ်းၶဝ်လႄႈ ယႃႉၶဝ်ပႅတ်ႈသေလႄႈ ႁဵတ်းႁႂ်ႈတီႈမၢတ်ႈတီႈတွင်းၶဝ် လူႉလႅဝ်ႁၢႆလၢႆၵႂႃႇမူတ်းမူတ်းသဵင်ႈသဵင်ႈတီႈၶႃႈယဝ်ႉ။- 15ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းႁႂ်ႈၵူၼ်းမဵဝ်းၶႃႈၸဝ်ႈႁဝ်းၶဝ် ယႂ်ႇၽႄႈၼမ်ၵိုၼ်းမႃးတီႈၶႃႈယဝ်ႉ။ ၸဝ်ႈႁဝ်းႁႂ်ႈမဵဝ်းၶႃႈၸဝ်ႈႁဝ်းၶဝ် ယႂ်ႇၽႄႈၼမ်ၵိုၼ်းမႃးတီႈၶႃႈယဝ်ႉ။ ၸဝ်ႈႁဝ်းႁႂ်ႈမုၼ်ၽုင်းၸဝ်ႈႁဝ်းယႂ်ႇၼႃႇတီႈၶႃႈယဝ်ႉ။ ၸဝ်ႈႁဝ်းႁႂ်ႈၶွပ်ႇၼမ်ႉလႅၼ်လိၼ်မိူင်းၸဝ်ႈ ၵႂၢင်ႈတီႈၶႃႈယဝ်ႉ။- 16ထႃႇဝရႃႉၽြႃးတီႈၶႃႈ၊ ၶဝ်ဢွၼ်ၵၼ်သုတ်ႉၸပ်းသုတ်ႉၸူးတီႈၸဝ်ႈႁဝ်းၼႂ်းမိူဝ်ႈဢၼ် ၶဝ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉလႄႈ ဢဝ်ၵႂၢမ်းသူးတွင်းပထၼႃႇ သွၼ်းလေႃႇၼႂ်းမိူဝ်ႈဢၼ် တၢင်းဢၼ်ၸဝ်ႈႁဝ်းသင်ႇသွၼ်သုင်းမႃႉၼၼ်ႉ တူၵ်းႁွတ်ႈၵႃႈၼိူဝ်ၶဝ်ၼၼ်ႉ တီႈၶႃႈယဝ်ႉ။- 17ၸိူဝ်ႉၼင်ႇဢၼ်မႄႈယိင်းဢၼ်ပႃးတွင်ႉလႄႈၸဵပ်းၶိုၼ်ႈ ၼႂ်းမိူဝ်ႈဢၼ်ၸမ်ၶိင်ႇဢၼ်တၵ်းၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉ သႅၼ်ႇႁွင်ႉၵွပ်ႈပိူဝ်ႈဢၼ်ၸဵပ်းၶိုၼ်ႈၼၼ်ႉ၊ မိူၼ်ၸိူဝ်ႉၼင်ႇၼၼ်၊ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁဝ်းၶဝ်ပဵၼ်ၵႃႈတီႈၽၢႆႇၼႃႈၸဝ်ႈႁဝ်း တီႈၶႃႈယဝ်ႉ။- 18ပိၵ်ႉသမ်ႉၶႃႈၸဝ်ႈႁဝ်းၶဝ် ပႃးတွင်ႉလႄႈ လႆႈၶၢမ်ႇဝူၺ်ႇတၼႃႇတၢင်းဢၼ်ၸဵပ်းၶိုၼ်ႈသေၵေႃႈ ပဵၼ်ၸိူဝ်ႉၼင်ႇဢၼ်ၵိူတ်ႇလဵင်ႉလူမ်းမႃးၼၼ်ႉယဝ်ႉတီႈၶႃႈလူင်ပႄႇ။ ၶႃႈၸဝ်ႈႁဝ်းၶဝ် ဢမ်ႇႁႂ်ႈၵူၼ်းမိူင်းၸဝ်ႈတင်းလၢႆ ႁွတ်ႈထိုင်တၢင်းဢၼ် ၵႄႇသႄႇၶျွတ်ႈဢဝ်လႆႈ လႃးလႃးတီႈၶႃႈ၊ ၵူၼ်းလေႃးၵီႇတင်းလၢႆ ယင်းဢမ်ႇလူမ်ႉလႄႈယူႇတီႈၶႃႈယဝ်ႉ။- 19ၵူၼ်းတၢႆၸဝ်ႈႁဝ်းတင်းလၢႆ ဢသၢၵ်ႈတၵ်းလိပ်းတီႈၶႃႈဢေႃႈ။ တူဝ်တၢႆၶဝ်တင်းလၢႆၵေႃႈ တၵ်းလုၵ်ႉၶိုၼ်းတီႈၶႃႈဢေႃႈ။ သူၸိူဝ်းဢၼ်ယူႇၵႃႈၼႂ်းမုၼ်ႈလိၼ်ၶဝ်ဢိူၺ်း၊ တိုၼ်ႇမႃးလႄႈ ဢွၼ်ၵၼ်ႁဵတ်းၵႂၢမ်းတႃႉ။ လွင်ႈမၼ်းၸမ်ႉ ၼမ်ႉၼၢႆးၸဝ်ႈႁဝ်း ပဵၼ်ၸိူဝ်ႉၼင်ႇ ၼမ်ႉၼၢႆး ဢၼ်ႁႂ်ႈတူၼ်ႈယိူဝ်ႈဢွၵ်ႇၼၼ်ႉလႄႈ လိၼ်ၼႆၵေႃႈ တၵ်းဢဝ်ၵူၼ်းပႃႇႁဵဝ်ႈသၢင်းၶႅင်းမၼ်းတင်းလၢႆ ဢွၵ်ႇဢေႃႈ။
20ၵူၼ်းမဵဝ်းၵဝ်ဢိူၺ်း၊ မႃးတႃႉ။ ၶဝ်ႈၵႃႈၼႂ်းလုၵ်းတၢင်းၼႂ်းမႂ်းသေလႄႈ ဢုတ်းႁပ်းၽၵ်းတူဢၼ်ႁႄႉၵင်ႈမႂ်းၸိူဝ်းၼၼ်ႉဝႆႉတႃႉ။ တဵတ်ႇမႅပ်ႉယူႇၵမ်းဢွၼ်ႇၼိုင်ႈ တေႃႇထိုင်ႁွတ်ႈ တၢင်းၸႂ်မႆႈၶႆႈၸႃႉၸဝ်ႈ ပူၼ်ႉၵႂႃႇၼၼ်ႉတႃႉ။- 21လွင်ႈမၼ်းၸမ်ႉ ထႃႇဝရႃႉၽြႃး ဢွၵ်ႇသေၵႃႈၼႂ်းတီႈထႃႇၼႃႉမၼ်းၸဝ်ႈမႃး ႁႂ်ႈလႆႈပၼ်ဢပႅတ်ႈတီႈၵူၼ်းလိၼ်မိူင်း တင်းလၢႆ ၵွပ်ႈပိူဝ်ႈတူႉၸရိူၵ်ႈၶဝ်ဢေႃႈ။ မိူဝ်ႈၼၼ်ႉလိၼ်မိူင်းတၵ်းၽုၺ်ႇဢွၵ်ႇၼႄပျႃးလိူတ်ႈ ဢၼ်မီးၵႃႈတီႈမၼ်းလႄႈ ၵမ်းလိုၼ်းဢမ်ႇလႆႈႁူမ်ႇဝႆႉလပ်ႉဝႆႉ ၶဝ်ၸိူဝ်းဢၼ်လႆႈၶၢမ်ႇတၢႆတီႈမၼ်းၸိူဝ်းၼၼ်ႉ။
Copyright © 2021 by OMF International, Shan Baptist Churches Fellowship