Yexejqel 37
37
Muudus dungal ka Buuc Mndengu
1Dehuk heyi mu ka baga Utux Tmninun. Spooda na Bgihur na maadis kenan, pniqun ku na ckceka dxeral breenux. Dxeral breenux nii we stngayan buuc mndengu. 2Pdaun ku na ssiyo buuc mndengu. Qtai! Nii stenge buuc mdengu ka dxeral breenux. Qtai! Mdengu riyung. 3Rmengo kenan ka heya: “Laqi seediq! Mtduwa muudus dungal ka buuc nii ho?” Rmengo ku: “Utux Tmninun Bukung! Mkela su ka isu.” 4Rmengo kenan dungal ka heya: “Rngage kari pgeela ka buuc nii. Rngagi ka dheya: Buuc mdengu! Qbahang kari Utux Tmninun. 5Rmengo dbuuc nii ka Utux Tmninun Bukung: ‘Qtai! Prmuxun mu ckceka namu ka hengak. Kiya ka mpkuudus namu. 6Pniqun maku urac, heyi ma, lbuun maku qraqil. Psaun maku hengak ka ckceka namu, kiya ka mpkuudus namu. Kiya de mpkeela namu, yaku ka Utux Tmninun.’”
7Kiya de, muyu ka kari rmnengo rmengo ku kari pgeela. Rmengo kari pgeela ciida, niqan hrenang. Qtai! Niqan mlgelu dxeral. Pplutuc ka buuc. 8Qmita ku, qtai! Bobo buuc we niqan urac. Meeyah ka heyi ma, gisu lbuun qraqil. Kiya de ida uka ka hengak na. 9Rmengo kenan ka Utux Tmninun: “Laqi seediq! Rengo kari pgeela, pquri bgihur rmengo kari pgeela. Rengo so nii ka isu, So nii ka kari Utux Tmninun: Hengak! Psbgihur peeyah ani inu. Yupi ka heyi dseediq pnhuqil nii ma, pkdusi ka dheya.” 10Kiya de, muyu ka tnugesa na rmengo ku kari pgeela de, asi remux buuc ka hengak, kiya de muudus ka buuc. Dungal we mtutuy ka papak na ma, ma rahul paru riyung supi ka dheya.
11Rmengo kenan ka heya: “Laqi seediq! Buuc nii we sapah Israel. Rmengo ka dheya: ‘Qtai! Mkeruh ka buuc nami, msetuq ka snluwan miyan ma, mpkuuka nami di!’ 12Maanu so kiya de rengo kari pgeela ka isu, rengo dheya, so nii ka rnengo Utux Tmninun Bukung: Seediq mu, qtai! Mpraguh ku habung namu, mpdudul ku yamu mlatac peeyah habung ma, desun maku dxeral Israel. 13Seediq mu! Rmaguh ku habung namu ma, mdudul ku yamu mlatac peeyah habung namu de, mpkeela namu, yaku ka Utux Tmninun. 14Psaun mu ckceka namu ka Bgihur mu. Kiya ka mpkuudus namu. Psaun maku dxeral namu nanak de, mpkeela namu, rnengo yaku Utux Tmninun ka nii ma, ida mpkeso kiya mooda. Rnengo Utux Tmninun ka nii.”
Mskingal ka Yehudah ma Israel
15Meeyah kenan ka kari Utux Tmninun, rmengo, 16“Laqi seediq! Ngali 1 hukuc, btasi ‘Ririh Yehudah ma ddangi seediq Israel’ ka bobo niya. Dungal we ngali 1 hukuc, btasi ‘Ririh Yosehu, kiya ka hukuc Eprayim ma ddangi sapah Israel.’ 17Plutuc 2 hukuc nii ma, ma kingal hukuc. Ma kingal meeniq baga su ka dheya. 18Mquri sunan rmengo ka dseediq su: ‘Maanu mesa ka nii ho? Uxe su mptgesa yami ho?’ 19Rngagi ka dheya, rmnengo so nii ka Utux Tmninun Bukung: Qtai! Pltudun mu ma pskingal hukuc ka hukuc nuYosehu ma ddangi dseediq Israel, kiya ka hukuc gaga baga Eprayim. Mskingal mplutuc hukuc Yehudah meeniq baga mu ka dheya. 20Meeniq berah doriq mu, doi baga su ka 2 hukuc pnatis nii. 21Rngagi ka dheya, rmnengo so nii ka Utux Tmninun Bukung: Qtai! Ngalun mu peeyah qqlhangan nsaan seediq Israel ma, pssliun mu ma desun mu dxeral daha nanak ka dheya. 22Mskingal qlhangan meeniq dxeral nii ma, ddgiyaq Israel ka dheya ma, maha niqan 1 qbsuran paru mpqbsuran paru kana daha. Uxe npsalun mtgdaha qlhangan ma, uxe mpswaye 2 qlhangan ka dheya. 23Uxe spsalun smrutiq tikung, pqnqihun noda ma, kana qnquwan noda. Mpdoi ku baga platac kana qnquwan noda nniqan daha hiya ka yaku. Mpsbgurah ku dheya, kiya de ma seediq mu ka dheya ma, mpuUtux ku baro daha ka yaku.”
24“Mpqbsuran paru daha ka Dawid tnqliyan mu. Ma mskingal ba mtabu daha ka dheya. Dheya we, mpuyu gaya bneku mu, mqeepah kari pndakar mu ka dheya. 25Meeniq dxeral bnege mu Yakobu tnqliyan mu ka dheya. Kiya ka dxeral nniqan pusu rudan namu. Meeniq hiya ani betaq knuwan ka dheya, lqlaqi daha ma, lqlaqi laqi daha. Mqbsuran paru dheya ka Dawid tnqliyan mu betaq ani knuwan. 26Mpsdehu ku ssbleyaq dheya ka yaku. Mpsdhegan ani betaq knuwan ka nii. Sblequn mu peeniq ka dheya ma prnaun mu knhbragan daha. Pniqun mu ckceka daha hiya ka nniqan mu mrtaso betaq ani knuwan. 27Meeniq ckceka daha ka sapah thmkuwan mu. MpuUtux ku baro daha ka yaku ma, mpseediq mu ka dheya. 28Meeniq ckceka seediq Israel betaq ani knuwan ka nniqan mrtaso mu, kiya de mpkeela ka dqqlhangan, yaku ka Utux Tmninun prtaso psaanak Israel.”
Селектирано:
Yexejqel 37: Stgdaya
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
The Bible Society in Taiwan, 2020
© 台灣聖經公會版權所有，2020