Yexejqel 34
34
Mtabu Israel
1Meeyah kenan ka kari Utux Tmninun, rmengo, 2“Laqi seediq! Rngage kari pgeela ka dmtabu Israel. Rngagi ka dheya, rmnengo so nii ka Utux Tmninun Bukung: Smtali su bale! Tmabu dheya nanak ka dmtabu Israel. Uxe mtabu rahul miric ka mtabu peni? 3Yamu we mekan namu siyang, mlukus namu lukus ubal, muyak namu mtbeno tnbugan ma, ini namu tabu rahul miric. 4Ini namu psbyaxi ka muuwic, ini namu pkmlei ka mnarux, ini namu lbui ka mnangal luqah, ini namu pbrnahi ka mgeedang mlatac ma ini namu gimi ka wada uka. Sdoi namu qnnaqah qmlahang dheya. 5Ado uka mtabu ka dheya, mkrehak ma uqun ani maanu camac bbuyu. 6Gaga prhepun mgeedang ddgiyaq ma ddgiyaq biciq, kana dxeral ka miric mu. Uka ka seediq mosa smiling ma mosa migin.
7Maanu so kiya de, yamu dmtabu we, asi namu ka mbahang kari Utux Tmninun. 8Rmengo ka Utux Tmninun Bukung: Psdehu ku knuudus mu betaq ani knuwan, ririh uka mtabu, kiya ka wada daha ngalan glekan ma, uuqun kana camac bbuyu ka miric mu. Mtabu we ini iigin miric mu. Wano dheya nanak tbugan daha ma, ini tabu miric mu. 9Maanu so kiya de dmtabu nii, asi namu ka mbahang kari Utux Tmninun. 10Rmnengo so nii ka Utux Tmninun Bukung: Qtai! Mpknpais ku dmtabu mu ka yaku. Mpeeyah ku baga daha mpbrinah ku miric mu. Kiya ka uxe mu ptbugun dheya ka rahul miric mu. Uxe mpnpusal dmanga dheya nanak ka dmtabu. Ngalun mu peeyah quwaq daha ka miric mu ma, uxe mu pngalun uqun daha.”
Seediq Malu Mtabu
11“Rnengo so nii ka Utux Tmninun Bukung: ‘Qtai! Yaku nanak ka maha migin miric mu ma, slayun mu. 12Hmuwa mesa migin miric na ali wada mkrehak ka rahul miric na ka mtabu we, mpuyu ku so kiya migin ku miric mu. Mkrehak ani inu meeniq ali msurung ma mnkuung ciida we, pbrahun mu dmoi baga peeyah hiya ka dheya. 13Mplatac ku dmudul dheya peeyah kana seediq ma, psseli dheya peeyah dqlhangan ma, adis mu dxeral daha. Mptabu ku dheya meeniq bobo dgiyaq Israel, kana ssiyo yayung ma, kana dxeral malu niqun hiya. 14Tbugun mu malu ba speriq tbugan hiya ka dheya. Qnalang daha we meeniq bobo dgiyaq Israel. Mpstkemu malu ba tibu ma, meekan speriq mttapa tbugan bobo ddgiyaq Israel ka dheya. 15Tbugun mu nanak ka rahul miric mu ma, psngayun mu nanak ka miric mu. Rnengo Utux Tmninun Bukung ka nii. 16Giimun mu ka wada uka. Pbrnahun mu wada lwaqun. Plbuun mu ka mnangal luqah. Pklmeun mu ka wada mnarux. Wano ba mtbeno na ka phqilun mu. Sdoi mu pgntena tmabu ka dheya.’”
17“Rahul miric mu! Quri so yamu we, rmnengo so nii ka Utux Tmninun Bukung: Qtai! Mooda ku psgao ckceka miric ma, ckceka baus miric rudu ma baus miric ka yaku. 18Mekan namu speriq malu tbugan hiya ka yamu we, ngalun namu biciq ka ooda nii ho? Betaq namu stmaqan papak namu ka speriq mnsngari. Mnimah namu qsiya mrtaso de, smrsaqan namu papak ka mnsngari qsiya. 19Quri so miric mu, wano ba qnleqah namu ka uqun namu ma, snrsaqan namu ka mahun namu.
20Maanu so kiya, rmnengo yamu so nii ka Utux Tmninun Bukung: Qtai! Yaku nanak ka mooda psgao ckceka miric mtbeno ma mkuure. 21Ado skiwax namu nbuyas cmikul, sqnhiqur namu sese ma rungun namu urung ptakur ka muuwic. Kiya de wada namu lwaqun nganguc ka dheya. 22Manu so kiya, mpdoi ku baga miric mu. Uxe ngalun uuqun dungal ka dheya. Mpsgao ku ckceka miric ka yaku uri. 23Mpheyu ku 1 mtabu bobo daha. Kiya ka tnqliyan mu Dawid ka mptabu dheya. Mpdanga dheya ka heya ma, mptabu dheya. Pniqun mu 1 mtabu ka dheya ma mtabu dheya. 24Yaku, Utux Tmninun ka Utux Baro daha. Mpqbsuran paru ckceka daha ka Dawid tnqliyan mu. Rnengo mu, Utux Tmninun ka nii.
25Mpsdehu ku sndhegan ssbleyaq dheya, kiya de lwaqun mu peeyah ckceka qlhangan naqah camac. Mptbleyaq meeniq tadus brenux ka dheya ma, mptaqi ckceka nrao uri. 26Sblequn mu ka dheya ma mtqiri dgiyaq mu. Pqyexun mu ka pkelu nyusan krkarac knkawas ciida. Mntena quyux malu ka ssbleyaq. 27Mgheyi ka qhuni breenux, peeyah uqun ka dxeral. Mtgbleyaq meeniq dxeral daha nanak ka dheya. Gmeerung ku kudo nduyung daha ma, dmoi ku baga dheya peeyah mnangal tnqliyan dheya. Ciida, mpkeela ka dheya, yaku ka Utux Tmninun. 28Uxe npsalun qmerac dseediq qqlhangan icil ka dheya ma, uxe uqun camac bbuyu dungal ka dheya. Mptbleyaq meeniq ka dheya ma, uka ka mpsiicu dheya. 29Mpheyu ku malu ba ngayan dxeral phreun ka dheya. Uxe mu npsalun pooda ure pkuuka dheya ma, uxe mu npsalun pqsiqa dqqlhangan ka dheya. 30Maha mpkeela ka dheya, yaku we Utux Tmninun nuUtux Baro mtheyaq dheya. Dungal we maha daha klaun, sapah Israel we seediq mu kiya. Rnengo Utux Tmninun Bukung ka nii. 31Dseediq yamu nii we, seediq mu kiya. Kiya ka miric tnbugan speriq mu. Yaku we Utux namu Baro. Rnengo Utux Tmninun Bukung ka nii.”
Селектирано:
Yexejqel 34: Stgdaya
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
The Bible Society in Taiwan, 2020
© 台灣聖經公會版權所有，2020