Yexejqel 32
32
Spaangal Na Qlebang Rcilung ka Qbsuran Paru Micrayim
11 ali 12 idas tg12 knkawas, meeyah kenan ka kari Utux Tmninun, rmengo, 2“Laqi seediq! Pysani uyas tsdamac ka Paroh qbsuran paru Micrayim. Rngage:
Meeniq su ckceka qqlhangan, mntena su so balas rkelic rudu,
mntena su so qlebang ckceka rcilung ka isu,
mtbboyak su bobo yayung,
krkilan su papak su ka dqsiya,
smrsaqan su ka yayung.
3Rmnengo so nii ka Utux Tmninun Bukung:
Mppsseli ka hbaro ba seediq ciida,
mqada ku kadi mu sunan,
mplebil sunan meeyah baro ka dheya.
4Qada misu bobo dxeral,
qdanun misu breenux.
Mptuting bobo heyi su ka qbheni karac,
ririh isu mptengi mekan ka kana camac bobo dxeral.
5Qada mu cenga ddgiyaq ka heyi su,
pqhdeun merus bqerus su ka ayu.
6Pqlliun mu dara pneyah sunan,
mphuriq kana dxeral,
muubung kana bungu dgiyaq,
mpstenge kana ddaun yayung.
7Qmada ku isu ciida,
bungun kana karac,
pngkmaanun kana ka pngerah.
Qrayun mu knedux plabu ka hido,
uxe mpkledax uri ka idas.
8Dmledax kana karac baro,
mpngkmaanun mu baro su,
mpngkmaanun mu ka dxeral su uri.
Rnengo Utux Tmninun Bukung ka nii.
9Mpkuuka su meeniq dqqlhangan uxe su nklaan seediq. Ciida, ririh isu mpslhebun riyung ka hbaro seediq. 10Pheyu ku hlmadac mu berah su ciida, ririh isu mpslhebun ka kana seediq. Ririh isu mpkrkerang ka dqbsuran paru daha. Ali mntakur su ciida, mpkrkerang knuudus daha nanak ka dheya. 11Rmnengo so nii ka Utux Tmninun Bukung: Ida meeyah sunan ka hlmadac qbsuran paru Babirun. 12Pdaun mu hlmadac mnpahung supi mptakur supi su. Dseediq nii we dseediq naqah riyung meeniq dqlhangan.
Mpkuuka pnsparu Micrayim ka dheya,
pkuuka kana ka supi Micrayim.
13Mooda ku phuqil kana tnbugan ssiyo qsiya,
uxe mpqleqah qsiya nii ka papak seediq,
uxe mpqleqah qsiya nii ka papak camac.
14Ciida, mpsbgurah ka qsiya daha,
mpkeso abura tghuwe qluli ka yayung daha.
Rnengo Utux Tmninun Bukung ka nii.
15Pktdusun mu malix ka dxeral Micrayim,
mpkuuka ani manu ka dxeral nii,
dungal we mphuqil dseediq mneeniq hiya.
Ciida, mpkeela ka dheya, yaku ka Utux Tmninun.
16Uyas mbasi csdmatun muyas seediq ka nii. Dweewa dqlhangan we mpuyas uyas mbasi nii. Ririh Micrayim ma supi na ka ppyasun daha uyas mbasi nii. Rnengo Utux Tmninun Bukung ka nii.”
Mbasi Rmengac Micrayim
1715 ali 1 idas tg12 knkawas, meeyah kenan ka kari Utux Tmninun, rmnengo, 18“Laqi seediq! Tsdamac lmingis dsupi Micrayim ka isu. Psuupu dqlhangan mbeyax ka premux toma dxeral ka dheya ma, ptheyaq dseediq mpremux tuxan mnkuung ka heya.
19‘Mgkala ima ka qnsdiqan su ho?
Heruc ma psuupu mksaro dseediq ini ooda ptgaya psalak!’
20Mptakur dseediq pnhuqil hlmadac ka dheya. Bege phqilun hlmadac ka Micrayim, Tlusun daha maadis ka heya ma dsupi na. 21Mprengo qbsuran paru Micrayim ma dangi na gaga meeniq tuxan mnkuung ka mkkere supi. Wada mtuting ma mtakur ka ini ooda ptgaya psalak ma dseediq pnhuqil hlmadac.
22Gaga hiya ka Asur ma kana supi na. Gaga mtqiri ssiyo daha ka habung. Dseediq pnhuqil hlmadac kana ka dheya. 23Habung daha we gaga mgtruma bale beling ma, dsupi daha we gaga mtqiri habung daha. Mntakur pnhuqil hlmadac kana ka dheya ma, smiicu seediq mneeniq dxeral muudus seediq ka dheya.
24Gaga hiya ka Eylam ma, gaga mtqiri habung na ka kana supi na. Mntakur pnhuqil hlmadac kana ma ini ooda ptgaya psalak mosa toma dxeral ka dheya ma, smiicu seediq mneeniq dxeral muudus seediq ka heya. Mpsuupu mheal tnsyaxan seediq ka heya ma dseediq mremux tuxan mnkuung. 25Smalu qlapo na ma dsupi na meeniq dseediq pnhuqil ka seediq. Ssiyo daha we habung. Ini ooda ptgaya psalak ma pnhuqil hlmadac ka dheya ma, smiicu seediq mneeniq dxeral muudus seediq ka dheya. Mpsuupu mheal tnsyaxan seediq ka heya ma dseediq mremux tuxan mnkuung. Gaga su psaun ckceka dseediq pnhuqil ka Eylam.
26Gaga hiya ka Mesek ma Tubal ma kana supi na. Ssiyo daha we bqerus kana. Ini ooda ptgaya psalak ma pnhuqil hlmadac kana ka dheya ma, smiicu seediq mneeniq dxeral muudus seediq ka dheya. 27Asi ka ini tduwa pspuun mksaro dmpahung supi ini ooda ptgaya psalak ka dheya. Wada mremux tuxan mnkuung ka dmpahung supi mnadis qyqeya mccebu. Stpunu daha ka hlmadac, madis qnquwan noda daha ka buuc daha ma, smiicu seediq mneeniq dxeral muudus seediq ka dheya. 28Paroh! Mpsuupu su mhuqil dseediq ini ooda ptgaya psalak ka isu ma, mpsuupu su mksaro seediq gnaliq hlmadac.
29Gaga hiya ka Edom. Ani mnpahung riyung ka qbsuran paru na ma dqbsuran mdudul na we, ida mpsuupu mksaro seediq gnaliq hlmadac ka dheya. Ida maha msuupu ini ooda ptgaya psalak ma dseediq mnremux toma dxeral ka dheya.
30Gaga hiya ka dqbsuran paru tgdaya ma kana seediq Cidon. Msuupu dseediq pnhuqil mosa mremux toma kana. Ani yaa mnpahung we, ida mpkiicu seediq ma, mangal qnsiqa. Ini ooda ptgaya psalak, gaga pspuun mksaro dseediq pnhuqil hlmadac. Mpsuupu mheal tnsyaxan seediq ma dseediq mnremux tuxan mnkuung ka dheya.
31Qmita dheya ka Paroh de, ririh supi na, kiya ka dseediq nParo ma kana supi na we wada phqilun hlmadac maha malu kuxul na. Rmnengo Utux Tmninun Bukung ka nii. 32Ani mpkiicu seediq mneeniq dxeral muudus seediq we, ida mpksaro ckceka ini ooda ptgaya psalak ma dseediq gnaliq hlmadac ka Paroh ma dsupi na. Rnengo Utux Tmninun Bukung ka nii.”
Селектирано:
Yexejqel 32: Stgdaya
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
The Bible Society in Taiwan, 2020
© 台灣聖經公會版權所有，2020