Yexejqel 31
31
Qulic Bale Paru
11 ali 3 idas tg11 knkawas, meeyah kenan ka kari Utux Tmninun, rmengo, 2“Laqi seediq! Rngagi ka Paroh qbsuran paru Micrayim ma supi na:
Quri so knbeyax su we, ima ka mptena knpruwan su ho?
3Qtai! Qulic bale Lebanon ka Asur,
malu ba ka cida na ma, bale niqan saso,
bbaro ba ma, dehuk plabu ludux na.
4Pndakil heya we qqsiya,
pnkparu na we qsiya toma dxeral.
Qluli mtqiri dxeral na ka dyayung,
pdhekun na kana qhuni breenux ka qnlliyan na.
5Kiya de hmrinas kana qhuni breenux ka knbragan na.
Ado msngari qsiya mdakil ciida,
malu ba ka cida na, bale niqan saso.
6Tmrudu cdcida biciq hiya ka kana qbheni karac,
tmwawa toma cdcida paru hiya ka kana camac,
meeniq saso na hiya ka kana paru qqlhangan.
7Paru ba ka hnyegan na, bbaro ma malu ba ka cida na,
ado gaga ssiyo qqsiya ka gamil na.
8Ini tduwa bungun qulic bale dxeral qbleqan Utux Baro ka heya,
ini pntena cida na ka tqilung,
ini pntena cida na ka tgebil,
Kana qhuni dxeral qbleqan Utux Baro hiya we ini tduwa pntnaun knmalu na.
9Yaku ka pnkeegu cida na,
kiya ka malu riyung qtaan.
Meeniq dxeral qbleqan Utux Baro hiya,
kana qhuni meeniq Eden hiya we snhuur heya kana.”
10Maanu so kiya de, rmnengo so nii ka Utux Tmninun Bukung: “Ado bbaro ba ka hnyegan na ma, dehuk plabu baro ka ludux na de psparu tmdahu ka lhebun na. 11Bege mu baga mbeyax ba seediq qqlhangan ka heya. Mpooda qnnaqah noda daha pkdira heya. Wada mu lwaqun ka heya di. 12Seediq pneeyah icil, kiya ka dseediq kmmhemuc tmraqil ka wada smeqic ma qmada heya. Cida na we mtuting ckceka dgiyaq ma kana ayu. Betaq mgeerung ka cida na ma, mtuting dxeral kana elu yayung. Mlatac peeyah saso na ka kana seediq ma hmiti qmada heya. 13Yahun meeniq kana qbheni karac ka qhuni mntakur ma, niqun kana camac bbuyu uri ka toma cida na. 14So uxe maha knpruwan na mdakil dungal ka cida qhuni ma, so uxe maha mgkala betaq plabu ka ludux qhuni gaga ssiyo qsiya. Pnhuriq qsiya we uxe mpheyu ckceka hiya. Ado dheya nii we wada sbege hhuqil ma mpsuupu seediq mheruc beling toma mosa tuxan mnkuung.”
15Rmnengo so nii Utux Tmninun Bukung: “Mosa tuxan mnkuung ali ciida ka heya we, bungun mu ka ebun toma ma, hterun mu ka yayung ma ini kkesa ka dqsiya ptuura tnbasi lhebun. Ririh hiya, mpqnaqah kuxul ka Lebanon ma ririh hiya, msnbasur kana ka qhuni breenux. 16Yaku ka qmnada heya mremux beling msuupu dseediq mtuting tuxan mnkuung ka heya. Ciida, mpkrkerang hrenang pnttingan na ka dqqlhangan. Sblequn pqaras lnglungan daha tuxan mnkuung hiya ka kana qhuni Eden, qhuni Lebanon gaga dhekan qsiya ma malu ba gneegan. 17Mpsuupu heya mosa tuxan mnkuung gaga niqan seediq pnhuqil hlmadac hiya. Dheya nii mnhiqul baga heya ma, mneeniq toma saso na ckceka dqlhangan. 18Gaga inu tduwa mntena knledax ma knbbeyax su nii ka dqhuni Eden ho? Kiya de, mptheyaq su dqhuni Eden mosa tuxan mnkuung. Mpsuupu su meeniq seediq ini ptgaya psalak ma msuupu su mtakur dseediq pnhuqil hlmadac.
So nii ka Paroh ma dsupi na. Rnengo Utux Tmninun Bukung ka nii.”
Селектирано:
Yexejqel 31: Stgdaya
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
The Bible Society in Taiwan, 2020
© 台灣聖經公會版權所有，2020