2 Tɛsolonianɛ 2
2
Anyɛ Gɛ Ama Nɛ Ɔshã Kanyaka
1Nɛ bulɔ Apalete Yesu Kristo tɛbɛba nɛ shu anɛ bulɔ tɛxuxogo vɛnɔ yɛ ɔbha, bu tsre nɔ, badzya mɔ, 2sɛ kɛ tɛ za sɛ ba hwuanɔ nɔ bubɔɛbɔɛ ɔdɔgɔsɛ no shuku ɔkpɛ ebuiɖuɖɔlu, bunubhubhui ɔdɔgɔsɛ keplukpa gɛ ke be de bulɔ kɔ, gɛ kaa ɖɔ sɛ Apalete nɛ kiwi nɛ tɛ ba. 3Nɔ tɛ kɔ anɔnyanɔ awɛ nɔ nɛ kidzonyɛdzoa bha, alasɛ kiwi lɛlɛ nɛ tɛ baa ba odi nu sɛ kititilulɔ bɛ lɛ mɛ klɛ be bu anɔ gɛ ama ɔshã kanyaka mɛ nɛ akasɛ, anɔ nɛ gɛ atɛ wɔlɛ eku butsyrɔ mɛ. 4Aba lɔɛ titi klɛ aba kpɛ shu nɛa bha kɔ kɛkanyaka gɛ be klua sɛ Kpaya ɔdɔgɔsɛ ba kpɛ kɛtɔkpuesi akɔ, sɛ tɛ edzu yɛ shu nɛ Kpaya busɔlɛvu nɛ mɛ, eze kulu shu asɛ enu Kpaya.
5Nɔ dɛ baka sɛ gɛ ɛza wɔnɔ bha itsre nɔ ebuia nɛ petee? 6Klɛ ɔtsɔ̃ no nyi kɛdɔnɔ nɛ gɛ dzuahwɛ yɛa bha kpɛ de, sɛ tɛ be be bu yɛ akasɛ nɛ kibe dzyɔgo nɛ mɛ. 7Alasɛ ɔshã kanyaka maza maza kemi kpukpu anɔ nɛ aflɛ wa kɛxwɛ; pɔ anɔ nɛ gɛ edzuahwɛ ɔlɛa bha vɛnɔɛ de nɛ aba za kɛlɛa bha aza bhɛtɛ ana ɔdɔnanɔ kibe lɛ gɛ be feke yɛ ebu nɛ kidzo nɛ mɛ. 8Klɛ ɔkɛlɛ flogo pɛ be be bu agɛ ama ɔshã mɛ nɛ akasɛ, agɛ yɛ Apalete Yesu nɛ aba tsɛ atɛ̃ nɛ yɛ onugbu mɛ ɔfufɔɛ klɛ yɛ tɛbɛba anɛ yɛ tɛpupudi nɛ ba zi yɛ. 9Agɛ ama ɔshã kanyaka mɛ nɛ tɛbɛba nɛ ba za nɛ Satana kɛxwɛwɛwa nɛ nu gɛ be bu akasɛ ganɔ itro ebui nɛ petee gɛ abhɛtɛ bi nɛ mɛ, 10klɛ nɛ kibui tsutsɔmɔ kanyaka gɛ wɛɛ bagɛ bee beke. Be beke alasɛ ba dɛ dɛmɛ asɛ tɛ ba ɖɔ kɛgba sɛ tɛ be bua lɛ. 11Kibui nɛ shu so Kpaya asɛsɛ alɛ kɛdɔ gɛ ba wɛɛ anɔ gɛganɛ sɛ tɛ ba yɛkɛ otro nɛa bha ŋa 12klɛ so sɛ tɛ be bu bagɛ ba dɛ yɛkɛ kɛgba nɛa bha ŋa nɛ petee pɔ, gɛ ba mɔ same nɛ kɛtɔkpum gɛganɛ shu.
Za Gɛganɛɛ
13Pɔ alasɛ tɛ kibenyɛbe buhu Kpaya ahwɛ nɛ nɔɛ tɔkpu, badzya gɛ Apalete nɛ aɖɔ, alasɛ denɔ kesikpɛkpɛ Kpaya ekulu nɔ sɛ tɛ be bu nɔ ganɔ Ɔfufɔɛ nɛ kɛxwɛ shu dɛdanɛ nɛ ganɔ kɛgba nɛa bha yɛyɛkɛŋa mɛ. 14Ekulu nɔ akɔ kibui ganɔ bulɔ kibui dzyɔgoe nɛa bha, sɛ tɛ nɔ mɔ kapɛ tieli nɛ bulɔ Apalete Yesu Kristo ishubhubhui nɛ mɛ. 15So nɛɛ, badzya mɔ, nɔ za gɛganɛɛ tɛ nɔ nyɛna kɛdɔkɛkasɛ nɛ gɛ bu yɛkɔ kɔ nɔ nɛm, kɛɛ dzi sɛ ganɔ onugbuaɖɔ mɛ o ɔdɔgɔsɛ kɛplukpa ŋuŋlɔmɛ mɛ o.
16Kɔ bulɔ Apalete Yesu Kristo nahwɛ anɛ bulɔ Aka Kpaya, gɛ aɖɔ lɔ klɛ ganɔ yɛ eshutukubui didi mɛ pɛ akɔ lɔ ɔfufɔɛ mɛ kemikpɛkpɛ anɛ kidzoenudidi dzyɔgo, 17akpɛ wɔnɔ idzyi nɛ kemi klɛ tɛ akɔ nɔ gɛganɛ nɛ nɔ kibui dzyɔgo bhɛbhɛtɛ kanyaka mɛ anɛ kaɖɔɖuɖɔ.
© Ghana Institute of Linguistics, Literacy and Bible Translation