Kut 42
42
1Yakobo ku yaahuriire ngu Misiri hariyo ebyokurya by'omujuma, yaagira abatabani ati: Ahabw'enki nimureebana nimutsimbana eriisho? 2Ayongyera abagira ati: Reeba, mpuriire ngu Misiri hariyo ebyokurya by'omujuma, nimwirooko muze kubitugurirayo, tukaagira amagara tureka kufa. 3Batyo beene Yakobo ikumi bashuuma, baza Misiri kugura ebyokurya. 4Kwonka Yakobo tayohereza Benyamiini murumuna wa Yosefu kugyenda na bakuru be, ahabw'okuba akatiina ngu atakaaguubwaho akabi. 5Batyo batabani ba Isiraeli bagyenda n'abandi abagiireyo kushaka, ahabw'okuba ensi ya Kanaani ekaba eteirwe enjara.
6Mbwenu obwo Yosefu niwe yaabaire ari omutegyeki mukuru w'egyo nsi orikushakisa abantu baamwo boona. Bakuru ba Yosefu ku baizire, baamuramya bajuumaire ahansi. 7Yosefu yaareeba bakuru be abo yaabamanya, kwonka yaabatwaza nk'abu atarikumanyana nabo. Yaabagambisisa ekikabuko, ati: Nimuruga hi? Nabo bati: Nituruga omu nsi ya Kanaani, twizire kushaka.
8Yosefu nikwo yaamanyire atyo bakuru be, kwonka bo batamumanye. 9Kandi Yosefu ogwo yaijuka ebirooto bi yaabarootsireho. Nikwo kubagira ati: Muri entatsi mwizire kureeba ah'ensi egi etaine maani g'okwejuna. 10Baamugira bati: Ngaaha, mukama waitu, kureka itwe abaheereza baawe twizire kushaka. 11Twena turi batabani b'omushaija omwe, turi abantu b'amazima, itwe abaheereza baawe tituri ntatsi. 12Nawe abagira ati: Ngaaha! Ekibareetsire n'okureeba ah'ensi egi etaine maani. 13Bamugarukamu bati: Itwe abaheereza baawe turi eishe-emwe ikumi na babiri, batabani b'omushaija omwe ow'omu nsi ya Kanaani; kureka murumuna waitu omuto niwe atsigaire na tataitwe, kandi ondi takibaho. 14Reero Yosefu abagira ati: Manya ekyo nikyo naabagirira nti: Muri entatsi. 15Mbwenu ekyo nikyo muraamanyirweho: Buso bwa Faraaho, timurikwija kuruga aha, murumuna waanyu omuto yaaba ataizire. 16Nimutume omwe omuriimwe areete murumuna waanyu, obwo imwe muri omu kihome, ebi mwagamba bibone kuhamibwa yaaba muri ab'amazima. Kitari ekyo, buso bwa Faraaho, buzimazima muri entatsi. 17Atyo boona abata omu kihome bamaramu ebiro bishatu.
Simeoni okutsigara omu kihome
18Aha kiro kya kashatu, Yosefu akabagira ati: Mbwenu nimukore eki, nibwo muraakire, ahabw'okuba nyowe nintiina Ruhanga. 19Ku muraabe muri ab'amazima, murekye mwene shoimwe omwe atsigare omu kihome, abandi bagyende batware ebyokurya by'okutambira ab'eka yaanyu enjara. 20Haza mundeetere murumuna waanyu omuto, ebi mugambire bibone kuba eby'amazima, murekye kufa. Nabo baatwaza batyo. 21Bwanyima baagambirana bati: Buzimazima nitusingwa orubanja ahabwa murumuna waitu ou twareebire aine enaku nyingi, obu yaatweshengyereza tukanga kumuhurira. Nikyo ezi naku zaatwitira. 22Reubeeni abagira ati: Tindabagizire nti: Mutakora kubi ogwo mwana, haza mukanga kumpurira? Mbwenu reeba eshagama ye yaatutukurira. 23Tibaramanyire Yosefu ku abamanyire, ahabw'okuba hakaba hariho omugambiririzi. 24Yosefu atyo ahinduka abarugaho arira. Bwanyima agaruka ahi bari agamba nabo. Mpaho abaihamu Simeoni amuboha nibamureeba.
Bakuru ba Yosefu okugarukayo Kanaani
25Reero Yosefu aragiira ku baijuza enshaho zaabo ebyokurya by'omujuma n'okugarura empiiha za buri muntu omu nshaho ye kandi n'okubaha entanda y'okuriira omu muhanda. Haza ekyo bakibakorera.
26Na banu beekoreza endogoya zaabo ebyokurya, bagyenda. 27Mbwenu omwe aharibo, ku yaakomoroire enshaho ye kuha endogoya ye ebyokurya ahi baaraire, yaashanga empiiha ye omu minwa y'enshaho. 28Atyo agira beene ishe ati: Empiiha yangye baagingarurira. Reeba ngigi omu minwa y'enshaho! Haza ekyo kibagwisa enshazi. Bahindukirana nibatetema nibagira bati: Mbwenu eki n'enki eki Ruhanga atukozire?
29Ku baahikire Yakobo ishebo omu nsi ya Kanaani, baamuteekyerereza byona ebyabaireho nibagira bati: 30Omushaija, mukama w'egyo nsi akatukabukira, yaatweta abaizire kutata ensi. 31Kwonka itwe twamugira tuti: Turi abantu b'amazima, tituri ntatsi, 32turi eishe-emwe ikumi na babiri, batabani ba tataitwe. Omwe takibaho, kandi murumuna waitu omuto atsigaire na tataitwe omu nsi ya Kanaani. 33Mpaho ogwo mushaija mukama w'egyo nsi atugira ati: Eki nikyo ndaamanyireho ku muri ab'amazima; ni muntsigire omwe ahari beene shoimwe; imwe mutware ebyokurya by'omujuma eby'okutambira ab'eka yaanyu enjara. Haza mugyende 34mundeetere murumuna waanyu omuto, nibwo ndaamanye ku mutari ntatsi, kureka abantu b'amazima. Naanye nibwo ndaabarekurire mwene shoimwe, mukabona kushuubura omuri egi ensi.
35Mbwenu ku baafunkukwire enshaho zaabo, buri omwe yaashanga ekiboho ky'empiiha kiri omu nshaho ye. Haza bo na ishebo ku baareebire ebyo biboho byabo by'empiiha, baatiina munonga. 36Yakobo ishebo nikwo kubagira ati: Mbwenuho mwanshara amabeere. Yosefu takibaho, na Simeoni takiriho, kandi hati nimwenda kutwara na Benyamiini; haza ebyo byona niinye bigweraire. 37Bwanyima Reubeeni yaagira ishe ati: Ku ndaabe ntamukugaruriire oite batabani bangye bombi. Munkwatse, haza nyowe niinyija kumukugarurira. 38Nawe abagarukamu ati: Omwana wangye tarikwija kugyenda naimwe, ahabw'okuba mukuru we akafa, kandi niwe wenka otsigaireho. Manya akabi ku kaakumugwera omu muhanda gu mwaza kuzamu, nk'oku nyine ezi nju mukandeetera obujune bumpuhura nza okuzimu.
Beene Yakobo okugaruka Misiri baine Benyamiini
Селектирано:
Kut 42: RKK2008
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Bible with Apocrypha in Runyankore-Rukiga, new revised joint translation © The Bible Society of Uganda, 2008.