Kur 2
2
1Mbwenu omushaija w'omu ruganda rwa Leevi akagyenda yaashwera omukazi muhara w'Abaleevi. 2Omukazi ogwo yaatwara enda, yaazaara omutabani. Ku yaareebire omwana ari murungi, yaamusherekyera ameezi ashatu. 3Ku yaaremirwe kuguma amusherekire, yaareeta akagyega k'omubimbiri k'okumutamu. Yaakasiiga enzibuuro na koroto, yaakatamu ogwo mwana, yaakata ahagati y'ebibingo by'aha nkungu y'omugyera. 4Kandi munyaanya w'ogwo mwana yaayemerera hangahari, kureeba ekyakumubaho.
5Ago magingo muhara wa Faraaho ku yaashuumire aha mugyera kwoga, abazaana be baaguma nibagyendagyenda aha rubaju rwagwo. Reero yaareeba akagyega kari omu bibingo, yaatuma omuzaana we kukareeta. 6Ku yaakafundwire, yaashangamu omwana; haza ogwo mwereere akaba naarira. Yaamwitsa esaasi, yaagira ati: Ogu mwana n'ow'Abaheburaayo. 7Mbwenu munyaanya w'omwana ogwo agira muhara wa Faraaho ati: Nze kukwetera omurezi w'omu Baheburaayokazi, aije akurerere ogu mwana? 8Muhara wa Faraaho amugarukamu ati: Eego! Irooko. Ogwo mwishiki atyo agyenda, ayeta nyina w'ogwo mwana. 9Muhara wa Faraaho amugira ati: Twara ogu mwana omunderere, haza nyije nkuhe ebihembo. Omukazi nawe atwara omwana amurera. 10Ogwo mwana ku yaakuzire, onu yaamureetera muhara wa Faraaho, yaaba omutabani, yaamweta eiziina Musa, ahabw'okuba akagira ati: Nkamwiha omu maizi.
Musa okusaasibwa beene waabo
11Musa ku yaakuzire, eizooba rimwe yaaza kushuura beene waabo, haza yaareeba oku barikukoresibwa n'amaani. Kandi yaashanga Omunyamisiri naateera Omuheburaayo w'omu baabo. 12Musa ku anaga amaisho oku n'oku ataareeba muntu weena, aita ogwo Munyamisiri, amuziika omu musheenyi. 13Eizooba ryakuratsireho, ku yaashohoire yaashanga Abaheburaayo babiri nibarwana. Yaagira owaashaagize ati: Ahabw'enki nooteera mugyenzi waawe? 14Onu amugarukamu naamubuuza ati: N'oha owaakuhaire obushoboorozi bw'okututegyeka n'okutucwera emanja? Nooyenda kuunyita nk'oku oitsire Omunyamisiri? Musa atyo atiina, agira ati: Kwokwo ekyo kintu kimanyirwe. 15Na Faraaho ku yaakihuriire, yaasherura oburyo bw'okwita Musa ogwo.
Musa okuhungira Midiyani
Kwonka Musa akahunga Faraaho, yaatuura omu nsi ya Midiyani. 16Mbwenu omuhongyerezi Omumidiyani akaba aine abahara mushanju. Eizooba rimwe, Musa ku yaabaire ashutami aha rubaju rw'eiziba, abo baishiki baija, baataha amaizi, baijuza amaato kweshera obusyo bwa ishebo bw'entaama. 17Abariisa ku baizire baababinga. Kwonka Musa yaimuka yaabarwanaho, yaayeshera obusyo bwabo. 18Ku baahikire ahari ishebo Yetero#2:18 Yetero: Ogu obundi bamweta Reueli. yaababuuza ati: Byaba bita eri izooba, ka mwarahukayo? 19Baamugarukamu bati: Omunyamisiri niwe yaatujuna abariisa, akatutahira amaizi, akatwesherera n'obusyo. 20Nawe abuuza bahara be ati: Mbwenu ogwo muntu ari nkahi? Ahabw'enki mwamutsigayo? Nimwirooko mumwete, aije arye. 21Mpaho Musa asiima kuguma n'ogwo mushaija. Bwanyima onu ahingira Musa muhara we Zipora. 22Ogwo mukazi azaara omutabani, Musa amweta Gereshomu; ahabw'okuba akagira ati: Nshuuhuukiire omu nsi etari yaitu.
Abaisiraeli okutakira Ruhanga
23Ku haahingwireho ebiro bingi, omugabe wa Misiri yaafa. Abaisiraeli baakabibwa emirimo y'obuhuuku, baataka ngu hakaagira owaabajuna. Haza okuhooga kwabo kw'okusaasibwa obuhuuku kwahika ahari Ruhanga, 24yaahurira okutsinda kwabo, yaijuka endagaano ye na Aburahamu na Isaaka na Yakobo. 25Ruhanga yaareeba Abaisiraeli, yaamanya n'oku bari.
Ruhanga okubonekyera Musa
Селектирано:
Kur 2: RKK2008
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Bible with Apocrypha in Runyankore-Rukiga, new revised joint translation © The Bible Society of Uganda, 2008.