Kur 10
10
1Bwanyima Nyakubaho akagambira Musa ati: Irooko oze owa Faraaho. Manya ngangaarize omutima gwe n'ogw'abairu be, ngu mbone kuboorekyeraho obumanyiso bwangye; 2kandi naiwe obone kuteekyerereza batabani baawe na baijukuru baawe oku naahindwire Abanyamisiri abashema, n'oku naabakoreiremu obumanyiso, mubone kumanya ku Niinye Nyakubaho.
3Musa na Arooni batyo bagyenda, beetuurira Faraaho, bamugira bati: Mukama Ruhanga w'Abaheburaayo naagira ati: oryaherera hi n'okungomera? Reka abantu bangye bagyende bampeereze. 4Manya ku oraayangye kubareka bakagyenda, reeba nyencakare naaza kuteeza ensi yaawe enzigye, 5zigishwekye, omuntu abure ah'okureeba; zirye ebi mwatsigaize ebitaraitsirwe rubaare, zirye n'emiti yaanyu yoona ey'omu ishwa. 6Haza ziijurirane omu maju gaawe n'ag'abaheereza baawe n'ag'Abanyamisiri boona; zibe ezitakareebwaga baasho na baashwenkuru baaba kubaho omu nsi n'okuhitsya hati. Bwanyima Musa atyo akuba, aruga omu maisho ga Faraaho.
7Abaheereza ba Faraaho bamubuuza bati: Ogu mushaija aryaherera hi kutubeera ekiina ky'aha muryango? Reka abo bantu bagyende, baheereze Mukama Ruhanga waabo. Torikureeba ku Misiri ecwekyereire? 8Musa na Arooni batyo bagarurwa owa Faraaho, nawe abagira ati: Mugyende muheereze Mukama Ruhanga waanyu. Kwonka shi abaraagyende ni baahi? 9Musa amugarukamu ati: Nitwija kugyenda n'abaana baitu abato n'abantu baitu abakuru. Tugyende na batabani baitu na bahara baitu n'amasyo gaitu g'entaama n'ag'ente, ahabw'okuba nituragiirwa kugirira Nyakubaho obugyenyi. 10Faraaho nawe agira ati: Nyakubaho agume naimwe, kwonka nyowe tindikwija kubaikiriza mukagyenda n'abaana baanyu abato. Manya mwine enaama mbi. 11Ngaaha! Abashaija mube niimwe mwagyenda, muheereze Nyakubaho ahabw'okuba ekyo nikyo murikwenda. Batyo bababinga omu maisho ga Faraaho.
12Nyakubaho agambira Musa ati: Gororera ensi ya Misiri omukono, ogireetere enzigye, ziije zigiteere, zirye ekintu kyona ekigimeziremu eki orubaare rwatsigireho. 13Mpaho Musa agororera ensi ya Misiri enkoni ye. Nyakubaho areeta omuyaga gwa burugwa-izooba, guhuuha egyo nsi eizooba ryona n'ekiro kyona. Bukiza kuba omu kasheeshe, ogwo muyaga gw'oburugwa-izooba gushangwa gwareetsire enzigye. 14Ziteera ensi ya Misiri yoona, zigigumamu, ziri emizinga mingi munonga etakabahoga kandi etaribaho bundi. 15Manya zikahumbata ensi yoona, yaashwekwa omwirima. Reero zaarya ebimezire byamwo byona, n'ebijuma by'emiti byona ebyahonokire aha rubaare, tihaatsigaraho kintu na kimwe ekibisi, nobu yaakuba emiti nari ebimezire omu ishwa omuri egyo nsi ya Misiri. 16Bwanyima Faraaho yaayeta Musa na Arooni kwija ahonaaho. Haza yaabagira ati: Ncumwire ahari Mukama Ruhanga waanyu n'ahariimwe. 17N'ahabw'ekyo, mbwenu nimbeeshengyereza munsaasire ekicumuro kyangye omurundi ogu gwonka; kandi mweshengyereze Mukama Ruhanga waanyu anyiheho oru rufu. 18Mpaho Musa ashohora aruga omu maisho ga Faraaho ayeshengyereza Nyakubaho. 19Nyakubaho ahindura omuyaga, guba akasooroora karikuruga burugwa-izooba, gutuntumura enzigye, guzinaga omu Nyanja Erikutukura. Tihatsigara nzigye n'emwe omu nsi ya Misiri yoona. 20Kwonka Nyakubaho agangaaza omutima gwa Faraaho, ayanga kureka Abaisiraeli kugyenda.
Ekibonaboneso kya mwenda: Ensi okushwekwa omwirima
21Bwanyima Nyakubaho akagambira Musa ati: Imutsya omukono gwawe, ogworekyeize eiguru, habeho omwirima ndindindi gushwekye ensi ya Misiri. 22Musa nawe agorora omukono gwe agworekyeize eiguru, ensi ya Misiri yoona etimba omwirima ndindindi okumara ebiro bishatu. 23Abantu bamara ebiro bishatu batarikureebana, nobu kwakuba omuntu okuruga ah'ari. Kwonka ah'Abaisiraeli baabaire batwire haaguma nihahweza. 24Bwanyima Faraaho yaayeta Musa, yaamugira ati: Mugyende muheereze Nyakubaho. N'abaana baanyu bagyende naimwe, kwonka amasyo gaanyu g'entaama n'ag'ente gatsigare. 25Musa amugarukamu ati: Oshemereire kutureka tukatunga ebitambo n'ebicwetsyo, tukabona kubitambira Mukama Ruhanga waitu. 26Tushemereire kugyenda n'amatungo gaitu, tutatsigire nyima kintu kyona ekiine ekyara, ahabw'okuba nigo turikwihamu eby'okutoijera Mukama Ruhanga waitu. Kandi titurikumanya ebi turaakorese omu kumuramya, okuhitsya obu turaahikyeyo. 27Kwonka Nyakubaho yaagangaaza Faraaho omutima, yaayanga kubareka kugyenda. 28Faraaho yaagira Musa ati: Nduga omu maisho, kandi oyerinde. Otaringaruka omu maisho obundi; eizooba ri oringaruka omu maisho oryafa. 29Musa nawe amugarukamu ati: Nk'oku waagamba, naanye tindikugaruka mu maisho bundi.
Musa okuranga eby'okwitwa kw'emijigaijo
Селектирано:
Kur 10: RKK2008
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Bible with Apocrypha in Runyankore-Rukiga, new revised joint translation © The Bible Society of Uganda, 2008.