मत्ती 11
11
यीशु ते यूहन्ना बपतिस्मा दैणे वाला
1जां यीशु अपणे बारा चेल्लेयां जो हुकम देई दैणे का बाद से गलील प्रदेश रे सहरां बिच उपदेस अते प्रचार करणे जो तित्ते का चली गे। 2यूहन्ना ने जेल बिच मसीह यीशु रे कम्मां री खबर सुणी करी अपणे चेल्लेयां जो तिन्हा का ए पूच्छणे भेजेया, 3कै तुसा ही से मसीह हिन जिस जो परमेश्वर ने भेजणे रा वादा कित्तेया थिया या असी कुसकी दूज्जे री भाल करण? 4यीशु ने जवाब दित्तेया, कि जे किच्छ तुसा दिखदे सूणदे हिन, से सब किच्छ जाई करी यूहन्ना जो बोल्ली देयो। 5कि अन्ने दिखदे हिन, अते अपाहिज हंडदे फिरदे हिन, कोढ़ी सुच्चे कित्ते जाया करदे हिन, अते टौणे सूणदे हिन, मुर्दे जिंदा होया करदे हिन, अते गरीबां जो सुब बसेख सुणाया जाया करदा है। 6अते धन्न हिन से, जे मेरे पर शक ना करे।
7जां यूहन्ना रे चेल्ले तित्ते का चली गे, तां यीशु यूहन्ना रे बारे बिच मणूआं जो बोलणा लगे, तुसा बणा बिच कै दिखणा गे थिये? कै ब्यार कने हिलदे नलू? 8फिरी तुसा कै दिखणे गे थिये? दिखो, जे कीमती कपड़े पान्दे, से राजमहलां बिच रैहन्दे, 9तां फिरी किजो गे थिये? कै कुसकी भविष्यद्वक्ता जो दिखणे गे थिये? हाँ, मैं तुसा जो बोलदा, बल्कि भविष्यद्वक्ता का भी बड्डे जो। 10“ए से ही है, जिसेरे बारे बिच पवित्रशास्त्र बिच परमेश्वर ने बोल्ले रा है,
‘दिख्ख, मैं अपणे दूत जो तेरे अग्गे भेजदा,
जे तेरे अग्गे तेरा रस्ता तैयार करणा।’”
11मैं तुसा जो सच बोलदा, लोक्कां बिच यूहन्ना बपतिस्मा दैणे वाले का बड्डा कोई पैदा नी होया, पर स्वर्ग रे राज बिच छोटा का छोटा मणू भी यूहन्ना का बड्डा है। 12जिस बेल्ले का यूहन्ना बपतिस्मा दैणे वाले ने प्रचार करणा सुरु कित्ते रा है तिस बेल्ले का अब्बे तांइ स्वर्ग रे राज बड़ा जादा बदेया करदा है, अते ताकतवर मणू तिस पर हमला करेया करदे हिन। 13यूहन्ना रे आणे तक सारे भविष्यद्वक्तां री कताबां ते अते मूसा रे कानून बिच स्वर्ग रे राज बिच भविष्यवाणी हुंदी रेई, 14ते जे अगर तुसा इस गल्ल जो मनणा चाओ तां मन्नो कि यूहन्ना ही एलिय्याह है जिसेरे आणे रे बारे बिच भविष्यवाणी कित्ती गयी थी। 15जे सुनणा चाए, से ध्यान कने सुणे! 16मैं इस जुग रे मणूआं री बराबरी कुस कने करां? से तिन्हा बच्चेयां सांई हिन, जे बजारा बिच बेई करी इक्क दूज्जे कने शिकायत करदे रैहन्दे 17कि असा ने तुसा तांइ खुसी अंदर संगीत बजाया, पर तुसा नी नच्चे, असा ने मातम मनाया पर तुसा नी रोये। 18तिय्यां ही यूहन्ना ना दूए लोक्कां सांई खान्दा अते ना पीन्दा थिया पर तुसा लोक्कां ने शिकायत कित्ती उस बिच दुष्टात्मा है, 19मणू रा पुत्तर, जे मैं ही है, खान्दा-पीन्दा, पर मणू बोलदे, इस मणू जो दिख्खो, ए भूखान्ग ते पियक्कड़ है, ए चुंगी लैणे वाले अते पापियां रा मित्र है! पर तिसेरे कम्मां कने तिसेरी समजदारी सही साबित होए।
अविश्वास पर लाणत
20फिरी यीशु तिन्हा सहरां बिच रैह्णे वाले लोक्कां जो बकणा लगे जित्ते तिन्हा ने बड़े चमत्कार कित्ते थिये, पर तिसेरे बावजूद भी तिन्हा लोक्कां ने अपणे पाप्पां का तौबा नी कित्ती थी ते ना ही परमेश्वर रे रस्ते पर चलणा सुरु कित्तेया थिया। 21लाणत है तुसा पर खुराजीन सहर बिच रैह्णे लोक्कों! लाणत है तुसा पर बैतसैदा सहर बिच रैह्णे लोक्कों! जे चमत्कारी कम्म तुसा बिच कित्ते गे, जे से सूर अते सैदा रे सहर बिच कित्ते जान्दे, तां टाट रे कपड़े लेई करी#11:21 तां टाट रे कपड़े लेई करी पुराणे नियम रे जमाने रे मणू कुसकी गल्ल रा पछतावा प्रकट करणे तांइ अपणे सरीर पर टाट औढ़दे थिये। अते अपणे जिस्म बिच राख मली करी अवसोस करदे अपणे पाप्पां का तौबा करी लित्ते रा होणा थिया। 22पर मैं तुसा जो बोलदा कि हिसाब-किताब होणे वाले रोज्जे तुसा री हालत सूर अते सैदा रे सहर री तिस हालत का भी बुरी होणी जां परमेश्वर ने तिन्हा जो दंड दित्तेया थिया। 23ओ कफरनहूम कस्बे रे लोक्को, तुसा कै सोचदे कि तुसा जो स्वर्ग री महिमा तक उच्चा उठाया जाणा? तुसा जो तां पताल तांइ नीच्चे सुट्टेया जाणा, किजोकी जे चमत्कारी कम्म तुसा लोक्कां बिच कित्ते गे, जे अगर से सदोम सहर बिच कित्ते जांदे, तां से कदी भी नास नी कित्तेया जांदा। 24पर मैं तुसा जो बोलदा कि हिसाब-किताब वाले रोज्जे तुसा री हालत सदोम सहर री तिस हालत का भी बड़ी जादा बुरी होणी जां परमेश्वर ने तिन्हा जो दंड दित्तेया थिया।
यीशु का अराम है
25तिस्सी बेल्ले यीशु ने बोल्लेया, ओ पिता, आसमान ते जमीन रे प्रभु, मैं तेरा शुकर करदा कि तुसा ने इन्हा गल्लां जो अते समजदार लोक्कां का लुकाई रखेया, पर आम लोक्कां पर जाहिर कित्तेया। 26हाँ, परम पिता ए इधेरे तांइ होया किजोकी तुसा जो ए ही खरा लग्गेया। 27मेरे परम पिता ने सब किच्छ मेरे हवाले करी दित्तेया, अते कोई पुत्तर जो नी जाणदा, सिर्फ परम पिता जाणदा अते कोई परम पिता जो नी जाणदा, सिर्फ पुत्तर जाणदा, अते हर इक्क से मणू परम पिता जो जाणदा, जिस पर पुत्तर तिसजो जाहिर करणा चाए। 28ओ सब मैह्नत करणे वालेयों अते बोझ कने दबितेरे मणूओं, मेरे का आओ मैं तुसा जो अराम दिन्गा। 29मेरा जुंगल अपणे उप्पर लेई लेयो#11:29 जुंगल अपणे उप्पर लेई लेयो जुंगल चुकणे रा मतलब है यीशु रे पीच्छे चली करी तिन्हेरी गल्लां मनणा।, अते मेरे का सिख्खो किजोकी मैं सांत अते मन का दीन है: अते तुसा जो अपणी आत्मा बिच अराम मिलणा। 30किजोकी मेरा जुंगल असान अते मेरा बोझ हल्का है#11:30 मेरा जुंगल असान अते मेरा बोझ हल्का है मेरी आज्ञा मनणा मुस्किल नी है।।
Селектирано:
मत्ती 11: CDHNT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.