मत्ती 28
28
यीशुए रा दुबारा जिऊँदा ऊणा
(मरकुस 16:1-10; लूका 24:1-12; यूहन्ना 20:1-10)
1रामो रे दिनो ते बाद, अफ़्ते रे पईले दिने, तड़के-तड़के मरियम मगदलिनी और दूजी मरियम, कब्र देखणे आईया। 2तेबे देखो, बऊत बड़ा ईल्लण ऊआ, कऊँकि प्रभुए रा एक स्वर्गदूत स्वर्गो ते उतरेया और तिने नेड़े आयी की कब्रा रा पात्थर कनारे खसकेयी ता और तेते पाँदे बैठी गा। 3तेसरा रूप बिजल़िया जेड़ा और टाल्ले पाल़े जेड़े चमकीले थे। 4तेस देखी की पईरेदार थरथराईगे और बेओश ऊईगे। 5स्वर्गदूते तिना जवाणसा खे बोलेया, “डरो नि; कऊँकि माखे पता ए कि तुसे यीशुए खे, जो क्रूसो पाँदे चढ़ाया था, तेसखे टोल़ने लगी रिया। 6से एती निए, पर आपणे वचनो रे मुताबिक जिऊँदा ऊईगा रा। आओ, एसा जगा खे देखो, जेती प्रभु थे राखे रे 7और फटाफट जाई की तिना रे चेलेया खे बोलो कि सेयो मरे रे बीचा ते जिऊँदे ऊईगे रे और सेयो तुसा ते पईले गलील प्रदेशो रे पऊँची जाणे, तेती तुसा खे तिना रा दर्शण ऊणा, मैं तुसा खे बोली ता।”
8सेयो जवाणसा डर और खुशिया साथे कब्रा ते फटाफट वापस ऊई की चेलेया खे ये समाचार देणे दौड़ी गिया। 9तेबे यीशु तिना खे मिले और बोलेया, “नमस्ते!” सेयो नेड़े आईया और तिना रे पैर पकड़ी की तिना गे माथा टेकेया। 10तेबे प्रभु यीशुए तिना खे बोलेया, “डरो नि; मेरे चेलेया खे जाई की बोलो कि गलीलो खे चली जाओ। तेती तिना आऊँ देखणा।”
पईरेदारा री सूचना
11जेबे सेयो जवाणसा चेलेया खे ये समाचार देणे जाणे ई लगी रिया थिया, तदुओ तक पईरेदारा बीचा ते कई जणेया नगरो रे आयी की सारा आल बड़े पुरोईता गे सुणाया। 12तेबे बड़े पुरोईते और बुजुर्गा साथे कट्ठे ऊई की सम्मति कित्ती और पईरेदारा खे बऊत चाँदी देई की बोलेया, 13“तुसे सबी लोका गे ये बोलणा कि जेबे राती आसे सऊणे लगी रे थे, तेबे तेसरे चेले आए और तेसखे चोरी की लईगे 14और जे ये बात हाकिमो तक पऊँची गी तो आसे तेसखे समजयाई लऊँगे और तुसा खे मुश्किला ते बचाई लऊँगे।” 15तेबे तिने पैसे लए और जेड़ा बोलेया था, तेड़ा ई कित्तेया। ये गल्ल आजो तक बी यहूदिया बीचे प्रचलित ए।
यीशुए रा दिशणा और आखरी आज्ञा
(मरकुस 16:14-18; लूका 24:36-49; यूहन्ना 20:19-23)
16तेबे ग्यारा चेले गलील प्रदेशो रे तेस पाह्ड़ो पाँदे गए, जो यीशुए तिना खे बताई राखेया था। 17तेबे तिने यीशुए रे दर्शण कित्ते और तिना गे माथा टेकेया, पर तिना बीचा ते केसी-केसी खे शक ऊआ कि से जिऊँदा ऊईगा रा 18यीशुए तिना रे नेड़े आयी की बोलेया, “स्वर्ग और तरतिया रा सारा अक्क मांगे देई राखेया। 19तो, तुसे जाओ और सब जातिया रे लोका खे चेला बणाओ, और तिना खे पिता, पुत्र और पवित्र आत्मा रे नाओं ते बपतिस्मा देओ 20और तिना खे सब गल्ला, जो मैं तुसा खे आज्ञा देई राखिया, मानणा सिखाओ; और देखो, आऊँ दुनिया रे आखरी तक सदा तुसा साथे ए।”
Селектирано:
मत्ती 28: BGH
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
This work is licensed under Creative Commons Attribution-ShareAlike 4.0 License.