Nimi Tolumaḅọ 6
6
1Tomikiri mẹ ḅụ ḅụ gbọrụ siye tẹ à kẹ elekima sụa tẹ ye, kịnị-inoma tomina ọgọnọ ịn ponoma ḅaarị. 2Tamụnọ pẹrẹ na, kụn na, ḅẹẹye-ḅẹẹye na kẹ pịrị tẹ kọn kara tẹ ye mamgba ḅụ ḅii, ḅii ye ḅarị ofori ḅọ ḅe, anịsọ Tamụnọ kụrọ kẹ ọ̀ pịrị-a ọ̀ sime tẹ arịḅẹ tọrụ-ḅẹlẹ nyana-a; kụma igoniapụ mie arị kẹ tọrụ-ḅẹlẹarị ye; miemẹ anie ḅintẹ ḅara kẹ anị fieye nimi-a ye; anị kụrọ ḅụra tẹ ḅụụ-fụkama lamam. 3Gbọrụ owiḅọ nwẹnị awọmẹ sọnọa si iyi tẹ tọnwa akụra kẹ ḍumo-sime, gbala ọ̀ sịḅị ḅọrọtẹ akụra ḅụ ọ̀ tọnwa ene sime tẹ, kụma ḍumo ḅụ kẹ tọrụ-ḅẹlẹ-ḅẹlẹ iḅi-aị ma ḅẹ gbọrụ tọrụ-ḅẹlẹ sọ ọ̀ nyana-a, ịn pịkị iḅi ḅara sọ kẹ ò ḍiḅi-a ḅẹḅẹ, à ḅẹẹm mịnẹ posi paka tụḅọ (eremịna ọgọnọ ẹrị ḅụ ḅọrọ tụḅọ) iḅi ọ̀ nẹngịm. 4Kẹ gotẹ ọkọ ḅẹẹarị, anị ḅo fị ḅio sọ tẹ ḅọrọ mu kanakana ḅio sọm, tẹ kanakana mẹ ḅio ori ẹrẹ nwẹnị gbaịn faa; 5anie sikima, anị amụ ịrụa So-tọrụ sọ ẹrị-a, anị pịkị amụ gberie-sọ nimi-a; anịsọ anie nakara ori ịnyọsara nyanam. 6Ọ̀ nwẹnị maa sakị kẹ kụra maa ẹndẹ oyia asi finji finji nẹngị sakị kẹ ḍumo-sime ḅa, tẹ anịsọ gbọrụ iḅi tọrụ-ḅẹlẹ sọ nyana-a kụma, arịmgba gbọrụ anga mẹ mu-a?
7Tomḅọ gotẹ lịlịarị ye mẹmgba sime ọ̀ ḅịḅị pịrịm anịsọ paa ọ̀ pọkọ-ta-a. 8Nwẹnị ọkọ kụma, ye-nimi ḅọ ḅe tọ-ḅara kẹ iḅi ye-nimia-ḅọ ḅe nẹngị? Anịsakị igoinḅọ ḅe tẹ amịna ḅụụ nimi iḅi ḅara kẹ ḍumo wararị apụ ma tọrọkọ ḍumo kọn ḅọ ḅe tiye nyana? 9Tomḅọ tọrọkọ emi tẹ mḅọ ẹrịarị ye mẹ iḅitẹịn ikele-ikelema mḅọ nyana ḅẹ-ḅiiarị ye ḍọkị nẹngịm; miemẹ sọ ḅintẹ ḅara kẹ anị fieye nimi-a ye, tẹ fẹrụ na ịgbanịarị ye ọkụ.
10Pakarị ye goyegoye iḅere-iḅerea kụra-ḅio ini ẹrẹ kẹ anị sịn tẹ, anịsakị kịnị tomina sime-ḅara nimi wararị mịnẹ ọ̀ kụrọ ọ̀ nẹngị ḅọ na ye ịgbanị-a ịgbanị-a. 11Ẹkwẹn mẹ ḅaka la ḅara, mie anị pịkị ḅarị yefie-a la ḅara; anịsakị aniemẹ nwẹnị tọ sọye mịẹ ḅẹḅọ-ḅẹḅọ pịrị? 12Tụḅọ ḅọrọ tomḅọ na iḅi ḅẹ ye nimi, ori amịna papaa ḍumo mẹ ḅẹ boowa ene ma ḅụ ḍumo-sime wararị ogbo aniemẹ tẹ ori ịrụa ḅio ḅẹ tẹmẹ tẹ kiri-ḅio tọn-arị ye mẹ ḅọrọ-so ḅara kẹ ḅọrọ-soarị ye mẹ? Tụḅọ nwẹnị tomikiri mẹ ḅụ paka ḅarị aị ma ḍuko tomḅọ ḅe pịrị ḅẹ ọ̀ ḅọrọ so sakị?
(C) The Bible Society of Nigeria