Matthieu 2
2
Hio wan-mbarimɔ tɛa ha zɔka nzɔri Jésus
1Ɛ bhɛa Jésus ha Betlehem, ma le ha kandɔnu Judée, ha ngimɔ pɛ *kongapora Herode. Nɛ hio ma wan-mbarimɔ, ka ing goto sɔla, guotɛ ha wal gutɛ swe tɛ ha Jérusalem. 2Nɛ mbwa ana mɔ: «Kongapora pɛ hio *zuife, ka ɛ bhɛa sising, ha ndo? Ɔ zɔka sɔla pɛa ha gbasa tɛ ha wal gutɛ swe. Mɛgi ɔ tɛa hazu lukisi wɛnɛ.»
3Ka kongapora Herode zea mɛgi, sila wa bhunzoko nɛ hio wi mɛ Jérusalem fɛt dea gbesi fin. 4Nɛ wɛnɛ wesara hio gasa wan-hasadaka nɛ hio *wan-osi mbonga mɔ kandɔ zuife fɛt. Nɛ wɛnɛ ana mbwa nde, ɛ bebhɛ *Mesi ha ndo? 5Mbwa kiforo wen ha wɛnɛ: «Ɛ bebhɛ wɛnɛ ha Betlehem ha kandɔnu Judée, hazu *wan-tɔkuliwen bangɛriki wen mɛgɛ:
6‹Nɛ mɛ, Betlehem mɔ Judée, mɛ bo nɛ bebea ha soko hio le mɔ kandɔnu Judée ndang na. Hazu gasa wan, ka bengbɔsi nɛ pam *Israel kandɔ pɔm, begutɛ ha pɛ mɛ.›»
7Mɛgi Herode saa hio wan-mbarimɔ nɛ wuso, nɛ ana mbwa hazu ing ngbak ngimɔ ka mbwa zɔka sɔla ɛngɛ nɛ bosia. 8Nɛ hapata Herode tomsa mbwa ha Betlehem, a tɔa: «Ɛnɛ nɛ, nɛ ki goto mɔ hazu bem ɛngi nɛkpasa. Nɛ ka ɛnɛ kpaa wɛnɛ, ɛnɛ akifiri tɛ gba tazu mi, ka mi fin anɛ nɛ lukisi wɛnɛ.»
9Ka mbwa zea wen ha nu kongapora kari, mbwa pena. Nɛ ndangtɛ sɔla ka mbwa mbara sɔngsi ha guotɛ pɛa, nɛa nɔ ha li mbwa kanɛ yo yola ha zu bhandi ka bem ang. 10Ka mbwa zɔka fin sɔla ɛngɛ, sila mbwa dona nɛ totɛ. 11Mbwa lea ha zang twa, nɛ kpaa nzɔri bem hinɛ nana wa Marie. Mbwa ngbio zigolo nɛ lukoso nzɔri bem. Nɛ mbwa gbosasa toy pɛ mbwa, nɛ ha wɛnɛ hio matabis ndɔng: gbɛbolo, paka nɛ kulo pɛlmɔ mire. 12Hapata, Sɔ gba tazu mbwa nɛ wal lisɔ nde, ka mbwa akifiri fin tɛ ha pɛ Herode na. Mɛgi mbwa sio ha le pɛ mbwa nɛ ma mbing wal.
Ɛ yuo mɔ nɛ nzɔri Jésus nɛ ha Ezipte
13Nɛ ka hio wan-mbarimɔ sio kari, ma *telenge pɛ *Kongawan Sɔ gbasa tɛ ha Joseph nɛ lisɔ, nɛ tɔa: «Gutɛ mɛ, ba nzɔri bem hinɛ nana wa, nɛ yu mɔ ha kandɔnu Ezipte. Hazu Herode beki wal mɛ gbɛ Jésus. Mɛ dung haki kanɛ mi betɔ ha mɛ nde, mɛ kifiri.»
14Mɛgi, Joseph guotɛ nɛ zɛ, baa nzɔri bem hinɛ nana wa yu nɛ mɔ si ha Ezipte. 15Mbwa dungɔ haki kanɛ Herode fea. Mɛgi, wen pɛ Kongawan Sɔ lɛmsara tɛ, a batɔ nɛ wal *wan-tɔkuliwen: «Mi saa bewei pɔm gbo ha Ezipte.»
Ɛ bhondasa hio nzɔri bem ha Betlehem
16Ka Herode zɔka nde, hio wan-mbarimɔ osala wɛnɛ, ngambi dea wɛnɛ nɛkpasa. Ma, tuka mbwa osa ha wɛnɛ ngimɔ ka sɔla gbasa tɛ ang, wɛnɛ haa nu ha hio wan-bibulo pɛa nde, mbwa anɛ ha Betlehem nɛ ha hio le mɔ pɛtɛa fɛt nɛ gbɛ hio nzɔri bewei ndɔng ka bɛlɛ pɛ mbwa tɛ pen ka bɛlɛ bwa na.
17Mɛgi wen pɛ Jérémie *wan-tɔkuliwen lɛmsara tɛ, a batɔ:
18«Ɛ zea gdɔra ha le Rama, yo nê gɛl lokatɛ nɛ hea kwa. Yo nê Rachel ka he kwa hio bem pɛa. A ngoy nde, ɛ ambɔmbili wɛnɛ na, hazu hio bem pɛa fɛt fea.»
Guotɛ ha Ezipte si ha Nazaret
19Ka Herode fea kari, ma *telenge pɛ *Kongawan Sɔ gbasa tɛ ha Joseph nɛ lisɔ ha Ezipte, 20a tɔa: «Joseph gutɛ, ba nzɔri bem hinɛ nana wa, kifiri nɛ ha kandɔnu *Israel. Hazu wi ndɔng ka bangoy gbɛa Jésus fea kari.»
21Mɛgi, Joseph guotɛ, baa nzɔri bem hinɛ nana wa, nɛ kiforo si ha kandɔnu Israel. 22Ma, Joseph yuo ke mɛ de le ha kandɔnu Judée, hazu a zea nde, yo nê Arkelaus, ka dung *kongapora haki ha bhandi pɛ bafa wa. Mɛgi Sɔ tɔa ha wɛnɛ nɛ lisɔ mɛ nɛ ha kandɔnu Galile. 23Haki wɛnɛ dea le ha ma le ka ɛ sa nde Nazaret. Tuka ɛngi wen pɛ hio *wan-tɔkuliwen lɛmsara tɛ, mbwa batɔ: «Ɛ besa wɛnɛ nde, wi mɔ Nazaret.»
Селектирано:
Matthieu 2: NTGBY
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Societe Biblique en Centrafrique