ܙܟ݂ܪܝܐ 7
7
ܨܵܘܡܵܐ ܫܲܪܝܼܪܵܐ
1ܘܗܘܹܐ ܠܵܗ̇ ܒܫܹܢ݇ܬܵܐ ܕܐܲܪܒܲܥ ܕܕܲܪܝܵܘܵܫ ܡܲܠܟܵܐ، ܗܘܹܐ ܠܹܗ ܚܲܒܪܵܐ ܕܡܵܪܝܵܐ ܠܙܟܲܪܝܵܐ، ܒܐܲܪܒܥܵܐ ܒܝܲܪܚܵܐ ܕܬܸܫܥܵܐ، ܒܟܸܣܠܘܼ، 2ܘܫܘܼܕܸܪܹܗ ܠܒܹܝܬ ܐܹܝܠܔ ܫܪܵܐܨܲܪ، ܘܪܹܓܸܡ ܡܹܠܸܟ ܘܐ݇ܢܵܫܘܼ̈ܗܝ ܠܦܲܪܦܘܼܠܹܐ ܩܵܕ݇ܡ ܡܵܪܝܵܐ، 3ܒܹܐܡܵܪܵܐ ܠܟܵܗܢܹ̈ܐ ܕܓܵܘ ܒܲܝܬܵܐ ܕܡܵܪܝܵܐ ܚܲܝܠܬܵܢܵܐ ܘܠܢܒ݂ܝܼܹ̈ܐ، ”ܒܵܟܹܝܢ ܒܝܲܪܚܵܐ ܕܚܲܡܫܵܐ، ܢܵܙܪܹܢ ܕܵܐܟ݂ܝܼ ܕܥܒ݂ܝܼܕ ܠܝܼ ܐܵܗܵܐ ܟܡܵܐ ܫܸܢܹ̈ܐ؟“ 4ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܚܲܝܠܬܵܢܵܐ ܐܸܠܝܼ، ܒܹܐܡܵܪܵܐ، 5”ܐ݇ܡܘܿܪ ܠܟܠܹܗ ܥܲܡܵܐ ܕܐܲܪܥܵܐ ܘܠܟܵܗܢܹ̈ܐ، ’ܟܲܕ ܨܝܼܡ ܠܵܘܟ݂ܘܿܢ ܘܥܒ݂ܝܼܕ ܠܵܘܟ݂ܘܿܢ ܐܸܒ݂ܠܵܐ ܒܝܲܪܚܵܐ ܕܚܲܡܫܵܐ ܘܕܫܲܒ݂ܥܵܐ، ܐܵܗܵܐ ܫܲܒ݂ܥܝܼ ܫܸܢܹ̈ܐ، ܨܵܘܡܵܐ ܨܝܼܡ ܠܵܘܟ݂ܘܿܢ ܩܵܐ ܕܝܼܝܼ، ܗܲܪ ܩܵܐ ܕܝܼܝܼ؟ 6ܘܟܲܕ ܐܵܟ݂ܠܝܼܬܘܿܢ ܘܟܲܕ ܫܵܬܹܝܬܘܿܢ، ܗܵܐ ܠܹܐ ܝܬܘܿܢ ܐܲܚܬܘܿܢ ܒܹܐܟ݂ܵܠܵܐ ܘܐܲܚܬܘܿܢ ܒܸܫܬܵܝܵܐ؟ 7ܗܵܐ ܠܹܐ ܝܢܵܐ ܐܲܢܹܐ ܚܲܒܪܹ̈ܐ ܕܡܘܼܟܪܸܙ ܠܹܗ ܡܵܪܝܵܐ ܒܝܲܕ ܢܒ݂ܝܼܹ̈ܐ ܩܲܕ݇ܡܵܝܹ̈ܐ، ܟܲܕ ܐܘܿܪܸܫܠܸܡ ܥܡܝܼܪܬܵܐ ܝܗ݇ܘܵܐ ܘܫܠܝܼܬܵܐ، ܘܡܕܝܼܢܵܬܹ̈ܐ ܚܵܕܸܪ̈ܘܵܢܘܼܗ̇، ܘܬܲܝܡܢܵܐ ܘܕܸܫܬܵܐ ܥܡܝܼܪܹ̈ܐ؟‘“
8ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܠܙܟܲܪܝܵܐ، ܒܹܐܡܵܪܵܐ، 9ܗܲܕܟ݂ܵܐ ܐ݇ܡܝܼܪܹܗ ܡܵܪܝܵܐ ܚܲܝܠܬܵܢܵܐ، ܕܝܼܘܵܢ ܫܲܪܝܼܪܬܵܐ ܕܘܼܢܘܼܢ، ܘܫܵܦܵܩܲܬ ܘܪ̈ܲܚܡܹܐ ܥܒ݂ܘܿܕܘܼܢ ܐ݇ܢܵܫܵܐ ܥܲܡ ܐܲܚܘܿܢܘܼܗܝ، 10ܘܥܲܠܔ ܐܲܪܡܸܠܬܵܐ ܘܝܵܬܘܿܡܵܐ، ܘܡܵܫܵܚܲܛ ܘܡܸܣܟܹܢܵܐ ܠܵܐ ܙܵܠܡܝܼܬܘܿܢ، ܘܒܝܼܫܬܵܐ ܐ݇ܢܵܫܵܐ ܥܲܠܔ ܐܲܚܘܿܢܘܼܗܝ ܠܵܐ ܚܵܫܒ݂ܝܼܬܘܿܢ ܠܸܥܒ݂ܵܕܵܐ ܒܠܸܒܵܘܟ݂ܘܿܢ. 11ܐܝܼܢܵܐ ܠܵܐ ܒܣܝܼܡ ܠܵܗ̇ ܠܗܘܿܢ ܠܡܲܨܝܘܼܬܹܐ، ܘܗܘܹܐ ܠܹܗ ܩܕܵܠܲܝܗܝ ܩܸܫܝܵܐ، ܘܢܵܬܝܵܬܲܝ̈ܗܝ ܝܘܼܩܪܸܢܗܘܿܢ ܡ̣ܢ ܠܸܫܡܵܥܵܐ. 12ܘܠܸܒܲܝܗܝ ܥܒ݂ܝܼܕ ܠܗܘܿܢ ܩܸܘܝܵܐ ܐܲܝܟ݂ ܐܲܠܡܵܣ ܡ̣ܢ ܠܸܫܡܵܥܵܐ ܠܢܵܡܘܿܣܵܐ ܘܠܚܲܒܪܹ̈ܐ ܕܫܘܼܕܸܪܹܗ ܡܵܪܝܵܐ ܚܲܝܠܬܵܢܵܐ ܒܪܘܼܚܹܗ ܒܝܲܕ ܢܒ݂ܝܼܹ̈ܐ ܩܲܕ݇ܡܵܝܹ̈ܐ، ܘܗܘܹܐ ܠܵܗ̇ ܟܲܪܒܵܐ ܚܲܝܠܵܢܬܵܐ ܡ̣ܢ ܠܟܸܣ ܡܵܪܝܵܐ ܚܲܝܠܬܵܢܵܐ. 13ܘܗܘܹܐ ܠܵܗ̇، ܕܵܐܟ݂ܝܼ ܕܩܪܹܐ ܠܝܼ ܘܠܵܐ ܫܡܝܼܥ ܠܗܘܿܢ، ܗܲܕܟ݂ܵܐ ܩܪܹܐ ܠܗܘܿܢ ܘܠܵܐ ܫܡܝܼܥ ܠܝܼ، ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، 14ܘܒܘܼܪܒܸܙܲܝ ܠܝܼ ܒܥܲܠܥܵܠܵܐ ܓܵܘ ܟܠܲܝܗܝ ܐܸܡܘܵܬܹ̈ܐ ܕܠܵܐ ܝ݇ܕܝܼܥܲܝ ܠܗܘܿܢ. ܘܐܲܪܥܵܐ ܗܘܹܐ ܠܵܗ̇ ܘܲܝܪܵܢ ܒܵܬ݇ܪܲܝܗܝ، ܡ̣ܢ ܕܠܲܝܬܵܝܘܼܬܵܐ ܕܥܵܒ݂ܪܵܢܵܐ ܘܕܵܝܪܵܢܵܐ، ܣܵܒܵܒ ܥܒ݂ܝܼܕ ܠܗܘܿܢ ܐܲܪܥܵܐ ܫܘܼܗܘܸܬܬܵܐ ܠܘܲܝܪܵܢ.
Селектирано:
ܙܟ݂ܪܝܐ 7: ABTAB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Aramaic Bible Translation Assyrian Bible © 2025 Aramaic Bible Translation