Munra ta Rom 8
8
1Naŋ i tagai ran tea ilokenake o vavae veveg goro rasei we toga alo i Christ Jesus, wa gate mulemule tataga o visogoi nava tataga o Vui. 2Ape o lea non o Vui esu alo i Christ Jesus me ge wasawasa veta inau nan o lea tape ganganor wa tape matea.
3Ape ilone gate lai ilo ti mun o lea, alo me mageregere ti o manigiu o visogoi; nava God me vatraŋ ma i tur Natuna alo makale visogo ganganor, wa o oloolo tapegoro ganganor, wa ni me veveg qalo o ganganor alo visogoi apena; 4si a ge ura ran alo inina o liŋai ilone o lea me veveg apena si we taniniga, inina gina we mulemule monina gate tataga o visogoi nava tataga o Vui.
5O manigiu irasei we togatoga tataga o visogoi we nononom o gene ŋaŋ talo visogoi; nava irasei we tataga o Vui o gene ŋaŋ tape Vui. 6Ape o nonomia talo visogoi o matea nane; nava o nonomia tape Vui o esu nake wa o tamata: 7o manigiu o nonomia talo visogoi o tavalalea mun God; ape gate maŋas goro o lea mon God, wa gate lai ran qa tamaine. 8Apen rasei we toga alo visogoi tete wia lai mun God.
9Nava ikamiu gate alo visogoi, panava alo Vui, si o Vui non God qe goara ran alo ikamiu; pa si isei qe tete taur o Vui non Christ, gate iloke o tanun anana nake; 10pa si i Christ alo ikamiu, o turiai gina me mate veta ape ganganor, pa o Vui o esu ape liŋe taniniga.
11Pa si o Vui non i gene me ge raka kel i Jesus ti nanra mate qe goara alo ikamiu, alo ine nane i gene me ge raka kel i Christ ti nanra mate te ge esuesu mulaŋ naturiamiu we matemate mun non o Vui we goara taso alo ikamiu.
12Pa si ta tamaine, we nun ratatasik, o pug avunanina, pa gate mon o visogoi, si nina a esuesu tataga o visogoi. 13Ape si kamiu qe esuesu tataga o visogoi, me wesu veta mun kamiu si a mate; nava si mun o Vui kam qe ge matemate o gagapalag ŋaŋ mon o turiai, kam te qale esuesu apena.
14O manigiu irasei nol o Vui non God we vanogagira, ineira nane ira nanatun God. 15Ape kamiu gate lav momiu o vui garotrot mulaŋ si a gogolo, nava me lav momiu veta o Vui ramramo, wa alo ineia ilone nina we loglog si, Aba, Mama. 16Wa o Vui nane ilone we gaganag mona saratuwale we tira amen naatanina, si nina ra mermerein God. 17Pa si ta mereina, wa ra lelesina mulaŋ; ira lelesin God nane, wa ra lelesiu saratuwale amen Christ; nina ta roŋo vivtig lova saratuwale amaia ilokenake, si nina a leŋas saratuwale mulaŋ amaia aŋaisa apena.
18Ape nau we nonom si tete vasogo lai o val vivtig ŋaŋ te roŋo alo masaoi nake iloke, tama si we sasarita ape leŋas te ŋaŋalue aŋaisa ivunanina. 19Ape o nom nerei tinegaro non o gene tiŋ qa we narnare gese o ŋaŋalue ma nora nanatun God. 20Ape me map sur siwo gina o gene tiŋ alo matev worawora; pa gate matapuna, nava o manigiu i gene me mapua ti sur siwo; wa mun o maros nerei, 21si te ge rowolue wasawasa mulaŋ aŋaisa o gene tiŋ nan o togara rot tape gene ŋaŋ te naru, ilo togara wasawasa tape leŋasira nanatun God.
22Ape nina we gilala monina si val gene tiŋ ti masorsor wa ti vivtig saratuwale ran ma. 23Wa gate ilone vires, nava si nina mulaŋ, me taur veta monina o sawal taqai talo Vui, si nina mulaŋ we masorsor alo lolonina, we narnare o ramova, wa si te tun kel naturianina. 24Ape me vaesu veta nina mun o maros nerei; pa o gene isei te maros nerei apena, si ta ilo, pa gate gene maros nerei ilone. Ape o gene isei we ilo, ni te qale maros nerei mulaŋ ilone ape sava? 25Pa si nina qe maros nerei o gene nina gate iloilo, nina qara narnare roŋo maul apena.
26Wa we sasarita apena, o Vui we pirpiriŋ namatevunina we mageregere; ape nina gate gilala we tataro tama we sar; nava o Vui ilone ti tataro tinanai mona mun o liŋe masorsor tete vava lue lai. 27Wa i gene we sikesike waririag val toqai ŋaŋ ni we gilala si o sava o nonomia non o Vui, ti tataro tinanai apenra roŋo tama we sar amen God.
28Wa nina we gilala monina si amairasei we tape God val gene ŋaŋ we gagapalag saratuwale si a wia, mun rasei nane me logira ma mun o nonom mot. 29O manigiu, irasei ni me gilala vasarigira ti, ni me vonog vasarigira mulaŋ si neira a matev tuwale amen namakalin i Natuna, si neia a qeteg moemera amaira tatasiu we qoqo. 30Wa iragai ni me vonog vasarigira ti, ni me logira mulaŋ ma; wa iragai ni me logira ma ti, ni me veveg taniniga mulaŋ ineira; was iragai ni me veveg taniniga neira ti, ni me ge mulaŋ si a leŋas.
31Pa si ta tamaine nina te vava o sava ape ine ŋaŋ? Si God ta tavaliu ma amenina, isei te tavaliu munina? 32Ineia qa gate gogoroi i tur Natuna, nava me ukegia ma ape nina nol, wa te ge gasei si ni tete sogov mamasa saratuwale mulaŋ ma amaia o gene ŋaŋ munina?
33Isei te tila lai tea ira gene iloraka anan God? I gene we veveg taniniga i God nake; 34isei nake te veveg qalo? I gene me mate veta i Christ nake, uwe, pa me ge raka kelua veta nanra mate, wa ineia veta ape matuan God, wa ni we tataro tinanai apenina.
35Isei tea te vilewora savrag nina nan o tapeva mon Christ? Ta ganawono tea? si o qisaŋwono? si o koskos gap, si o maliŋsala, si o togara mamasa, si o vagona, si o gasal? 36Tama me rave veta si,
O manigiu iniko te ge matemate kamam val maran nol,
Me vasogo veta kamam tama o sheep ape tano vus.
37Nava alo ine ŋaŋ nane nina we lalakete raka sage monina, mun neia gina me tape veta nina. 38Ape na me sov veta siwo naapek si itagai tea o matea si o esu, itagai o angel ŋaŋ si ra gene we liwoa goro, itagai o gene ŋaŋ me rasu veta, si te qale rasu ma ti, 39itagai o gene ŋaŋ we mana, si we eleele si we roro, itagai o gene tiŋ we sea, si te vile wora savrag lai nina nan o tapeva mon God ilone, we toga alo i Christ Jesus i Lord inina.
Pašlaik izvēlēts:
Munra ta Rom 8: MOTA
Izceltais
Dalīties
Salīdzināt
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.