Munra ta Rom 7
7
1Sa si kamiu we loloqoŋ momiu, ra tatasik, ape nau we vava mun ragai we lolomaran o lea, si o lea te liwoa goro o tanun o masaoi nol ni te qale esuesu ti? 2Ape o tavine ilone me lag veta amen o mereata, ni we toga rot alo lea amen o mereata ilone alo ni qale esuesu. Pa si o mereata qe mate, o tavine me pea nan o lea non i rasoana. 3Wa o manigiu ilone alo rasoana qale esuesu te log si o tavine pakapaka si ni qe qeteg toga amen sei we sea. Nava si o mereata ta mate, o tavine we toga wasawasa nan o lea, wa ni tete qeteg pakapaka apena, alo sin qe qeteg toga amen sei we sea.
4Tamaine gina, ratatasik, me ge veta kamiu si a mate mun o lea, mun naturian Christ, si kamiu a qeteg toga amen sei we sea; amaia gina me tavaraka veta nan ra mate, si nina a uwauwa o woai ŋaŋ mun God apena.
5Ape nina me toga ti alo visogoi, wa alo ine nane o tortoron ŋaŋ tape ganganor me toga ti o manigiu o lea, pa me gagapalag tinegaro alo soasoa nina, si a uwauwa o woai ŋaŋ mun o matea apena. 6Nava ilokenake me ge pea veta inina nan o lea, nina me mate veta nan o gene ilone nina me toga valaqat ti apena, si nina qeteg rowrowovag alo togara garaqa tape vui, wa gate alo togara we tuai tape raverave.
7Naŋ o sava nina te vava? Sa si o lea o liŋe ganganor? Nipea ran nane. Nava nau gate gilala mok o liŋe ganganor, pa o manigiu o lea vires: ape nau gate gilala o liŋe ararike si o sava, si o lea ta tete vava si, Ko tete ararike: 8pa o ganganor me lav o tano giginpis alo lea vatraŋ, wa me gagapalag qalo alo inau o val liŋe ararike: ape asau nan o lea o ganganor vires tamate apena. 9Pa nau me esuesu ti we tuai asau nan o lea: wa paso nan, o lea vatraŋ me rasu ma, wa o ganganor qara esu kel apena; pa inau me mate mok. 10Wa o lea vatraŋ ilone me tira ti ape esu, pa me ilo suar ilone amen nau si we tira ape matea. 11Ape o ganganor me lav o tano giginpis alo lea vatraŋ wa me gale lai nau, wa mun o lea ilone me ge mate ran nau. 12Wa o manigiu o ine o lea we roŋo, wa o lea vatraŋ we roŋo wa we taniniga wa we wia.
13Pa si me tamaine, o gene we wia me qeteg matea ma mun nau? Nipea ran nane. Nava o ganganor, sin ŋaŋalue apena si o ganganor, me gagapalag qalo ma mun nau o matea alo gene we wia; wa o manigiu si o ganganor a qeteg ganganor raka sage mun o lea vatraŋ.
14Ape nina we gilala o lea si o matev vui apena, pa inau o matev visogoi me wol reag veta nau alalaŋe ganganor. 15Ape o gene nau we gagapalag qalo nau gate gilala mok. Ape o gene nau we maros, nau gate ge mok ilone, nava o gene nau we soŋus, ilone nane nau we gagapalag apena. 16Pa si nau qe gagapalag ape gene ilone nau gate maros, nau we gaganag saratuwale ape lea si we wia ras. 17Wa alo iloke gate nau nake we gagapalag mok, nava o ganganor we togatoga alo inau. 18Ape nau we gilala si o wia gate togatoga alo inau, wa si, alo visogok; ape o maros a pagigik nake, panava nau gate ilo qalo si na gagapalag lai o gene we wia apena. 19Ape nau gate ge ilo o gene we wia ilone nau we maros; nava o gene we tatas nau gate maros, ilone nane nau we gagapalag apena. 20Pa si nau qe ge o gene ilone nau gate maros, pa gate nau nake we gagapalag qalo mok o gene ilone, nava o liŋe ganganor we togatoga alo inau.
21Naŋ nau we ilo suar tamaike o lea, si alo nau we maros we ge o gene we wia, o gene we tatas we risa a pagigik. 22Ape nau we malakalaka mok tuwale alo lea mon God tataga o matev tanun talo loloi; 23panava nau we ilo o lea we sea ran alo soasoak ŋaŋ we vagvagalo goro o lea tape nok o nonomia, wa we gavag inau tama we rot mun o lea tape ganganor we togatoga alo soasoak. 24O tanun mamagarosa inau, isei te vaes lai nau nan o turie matea iloke? 25Nau we varean God mun Jesus Christ i Lord inina. Wa nau gina tamaine we rowrowovag mun o lea mon God alo nok o nonomia, nava mun o lea tape ganganor alo visogok.
Pašlaik izvēlēts:
Munra ta Rom 7: MOTA
Izceltais
Dalīties
Salīdzināt
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.