Intaliko 3
3
Ukupona kwa muntu
1Paponye inzoka yalinji a nchenjele ukulusye inyama zyonsi izyalonde zino Imfumu e Leza welewuzile. Ayino yawuzizye umwanaci iti, Wuzye Leza wawanenile ati, Mutize mulye ivikomwa vyonsi ivya mu chalo? 2Umwanachi atolelela inzoka ati, Tungalya ivikomwa vya miti yonsi mu chalo; 3ukuwa Leza watunena wati, Mutize mulye ivikomwa vya muti wuno wuli pakasi-kasi mu chalo, nanti akuwulemelela, alyakuti mutize mufwe. 4Ukuwa inzoka inena umwanachi iti Mutalifwa. 5Amuno Leza wamanya kuno mungala mwalya, aminso yinu yangiyuka, mukolane nu Leza, muwamanya ivizima ni viwipe. 6Ala umwanachi walola kuno umuti wazipa ukulya, swinya wayemba, swinya wawa muti wakupa umuntu injelu, akuntula chimwi alya; apa nu mulume chimwi alya. 7Paponye aminso yawo ayiyuka, awamanya kuno walinji chintakwa; awasuminkania amafwa apaliponga ukuti yawe a vizwalo.
8Pansizi awivwa izwi lya Mfumu e Leza akupita-pita mu chalo pano ilanzi lyatonta, nga umonsi nu mwanachi awavwama mu miti ya mu chalo alyakuti atize awalole. 9Imfumu e Leza ayita umonsi ati, Nga uli kwi? 10Nawe atolelela ati, Njivwile izwi lyako mu chalo, nga intete zyandema, amuno indi chintakwa; nga navwama. 11Amuwuzya ati, Nga weweni akunenile wati uli chintakwa? Si ulile ivikomwa vya muti wuno nakusunda ukuti utize ulye? 12Umonsi ati, A mwanachi wino wewe wampa, awino ampile ichikomwa cha mu muti nalya. 13Ngapano Imfumu e Leza awuzya umwanachi ati, Nga wachita wuli? Umwanachi ati, A nzoka inchenjezizye yaleka nalya.
E Leza awasunda
14Imfumu e Leza anena inzoka ati,
Amuno wachita choo,
watipwaukulusye ivikwato vyonsi,
ni nyama zyalonde zyonsi;
kanonzi wandi uwasela ni chifuwa chako,
swinya wandi uwalya amasenga
amanda ya wulanzi wako wonsi.
15Nandi mbike uwulwani pakasi pakwe wewe nu mwanachi
na pi kwata lyako ni kwata lyakwe;
aliwakuma ku mutwe
nawe uliwamuluma ku chitende chakwe.
16Anena umwanachi ati,
Ndiyonjelezya uwulumila nkaninye ku mpapo yako;
uliwapapila awana muwulumila,
ukuwa uliwaluchila wakwako,
nawe aliwa we kapanzya wako.
17Nga anena Adamu ati,
Amuno utontezile izwi lyakwe wakwako,
walya ni chikomwa cha muti
wuno nakulesizye, ukuti,
Utize ulye,
umusili watipwa amuno wewe;
mu kuzunkuntika amuno wandi uwalya ichakulya chako mu manda ya wulanzi wako wonsi,
18wakapelekese ni myunga vilimela mwanemo;
wandi uwalya ivya mu mpanga.
19Wandi uwalya mbali nu kutwinka ku mpumi yako
usuke uyize unyochele ku masenga kuno wafumile,
amuno we litukumbu,
ulinyochela kwi tukumbu swinya.
20Umonsi ayita umuchi ati, We Eva; amuno walinji we nyina wa wumi wakwe wonsi awa wumi. 21Ngapano Imfumu e Leza ayanizya Adamu nu muchi ivizwalo vya mikwela, awazwika.
Ukuwingwa muchalo kwakwe Adamu nu Eva
22Apano Imfumu e Leza ati, Umuntu wakolana naswe, kukumanya ivizima ni viwipe; kanonzi ndi wiza wakuntula ku muti wa wumi nu kulya ichikomwa kweneko atalifwa. 23Achaleka Imfumu e Leza amufumya mu chalo cha Edeni, ukuti akalimange umusili wuno wamasilwe kweneko. 24Apano awinga umuntu; nga awika wakerubi wakulu nu lupanga lwa mulilo, luno Iwasenukanga konsi-konsi lwa kapela mu chalo, kukusanchila inzila yino yaya ku muti wawumi.
Pašlaik izvēlēts:
Intaliko 3: WWN82
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Chinamwanga Bible © United Bible Societies, 1981.