Intaliko 2
2
1Apano iyulu ni nsi avisila, na vyonsi ivya mwenemo. 2Pa wanda wa chitimunenulambali apano Leza wamazile ukuwomba imilimo yakwe. Apuza ku milimo yino wawombanga pa wanda wa chitimunenulambali. 3Achaleka Leza apepa uwanda wachitimunenulambali, awuswefya; amuno pa wanda wowonye apano Leza wapuzile kukuwomba imilimo yino wawombanga pa kwelewula. 4Avino chalinji pano iyulu ni nsi vyelewuzilwe.
5Imfumu e Leza welewuzile insi ni yulu. Lelo pa mpindinye yoyo kutalinji ichintu nanti chonga chino chamezile munsi nanti a mu mpanga nanti a mu vyalo. Imfumu e Leza wachilinji ukutuma imvula munsi, swinya kutalinji nanti wenga wino walimanga umusili; 6ukuwa kwalinji esusuwe mutupu wino wasukanga ukufuma pansi nu kutonsya umusili.
7Apano Imfumu e Leza amata umuntu kwi tukumbu lya munsi, afutila mu mpuno zyakwe nu mupo wa wumi; umuntu awa nu wumi.
Ichalo cha Edeni
8Ngapano Imfumu e Leza alima ichalo mu Edeni lwa-kapela; momonye amuno awika umuntu wino wamasile. 9Imfumu e Leza amezya mu musili imiti yonsi yino ikayemvya insi ni miti yonsi yino ikakoma ivikomwa vizima, swinya na pakasi-kasi ka chalo alembeka umuti wa wumi, umuti wakumanyila ivizima ni viwipe.
10Uluzi aluwatantala ukufuma mu Edeni ukwitilila mu chalo, paponye apano alusanda aluwa induzi zini. 11Izina lya luzi lwa kutalika we Pisoni; aluli luzi luno lukatantala munsi ya Havila, kuno kuli golide; 12nu golide wa munsi yilyanye a muzima; akuno kuli ivya kupanjila iviyembwa, niwe lya wukasi. 13Izina lya luzi lwachitiwili we Gihoni; aluli luzi luno lukatantala munsi yonsi iya Kushi. 14Izina lya luzi lwa chititatu we Tigrisi, lukatantala lwa kapela kakwe Asiri. Nu luzi lwa chitini we Yufureti.
15Imfumu e Leza awika umuntu mu chalo cha Edeni ukuti awachilima nu kuchisunga. 16Ngapano Imfumu e Leza asunda umuntu ati, Ungalya ku muti wonsi uwa mu chalo; 17ukuwa ku muti wakumanyila ivizima ni viwipe utanga ulye, amuno uwanda wuno ungalya ungafwa.
18Apano Imfumu e Leza ati, Chisi a chizima umuntu ukuwa wenga; nandi imwelewulile ekavwa wino angalingana nawe. 19Achaleka Imfumu e Leza welewuzile inyama zyonsi izyalonde ku musili, ni nyunyi zyonsi izya mupela, azitwala ku muntu ukuti ayivwe vino umuntu angazyita; ni zina lyonsi lino umuntu wisile wila chintu icha wumi, alino lyalinji a lizina lyakwe cholicho. 20Umuntu ayita ivikwato vyonsi amazina, ni nyunyi zya mupela, ni nyama zyonsi izyalonde; ukuwa umuntu atalinji nu kavwa wino walingine nawe.
21Achaleka Imfumu e Leza aleka umuntu aponechela, ala pano waponechela asenda uluwazu lwakwe lumwi amatilila nu munyamfu penepo; 22nu luwazu luno Imfumu e Leza wasenzile ku muntu ayelewula umwanachi amupa ku monsi. 23Ngapano umonsi ati, Kanonzi wee alifupa lya mafupa yane nu munyamfu wa munyamfu wane; wandi awe amwanachi amuno wafumililila ku monsi. 24Muno akwe chonyechoo umonsi akusyanga yisi nu nyina ayilemenkania ku muchi, awawa a muwili wonga. 25Umonsi nu mwanachi awalanga wali chintakwa, ukuwa nanti kuwa ni nsoni.
Pašlaik izvēlēts:
Intaliko 2: WWN82
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Chinamwanga Bible © United Bible Societies, 1981.