Matei 17
17
Yesu koghaluka chihanga
(Malk 9:2-13; Luk 9:28-36)
1Haghabitile matsuwa sita, Yesu kamsola Petiri, Yakobu, na Yohana ndughu yake Yakobu, kaghenda nawo waliyeka kuchidando kwa liidunda litali. 2Bahala hambele hawo Yesu kaghaluka, ichihanga chake ching'ala ka litsuwa, na ghamagwanda ghake ghawa matselu chwee ka ghumwanga! 3Baho lola, Musa na Eliya wawalawila, wolonga naye. 4Petiri kamlongela Yesu, “Ghwe Mndewa, pfinogha twetwe ukukala hanu ahano! Ung'abama, leka tutsenge pfibumbulika pfidatu, chimwe chako, chimwe cha Musa, na chimwe cha Eliya.”
5Hayang'ali yolonga, bingu iling'ala liwaghubika, na litsi kulawa mna libingu alila lilonga, “Ayuno Mwanangu, yanimkunda, yaninoghelighwa naye. Mtegheletseni yeye!”
6Na iwanafunzi hawahulike apfo, wapfuka ng'ani, watowa maghoti wenama mbaka ipfihanga pfawo pfidonza hasi. 7Yesu kawaghendela kawakinda, kawalongela, “Mwinuke, wala mleke kupfuka!” 8Hawenule tsinenge, ng'awonile munu baye ila Yesu yaliyeka.
9Hawang'ali wohulumka mchidunda, Yesu kawalaghitsa, “Mleke kumlongela munu wowose achila chamwonile mbaka Imwana wa Imunu hayatsotsihiluka kulawa kuna iwafile.”
10Kuya iwanafunzi wamghutsa, “Lelo heule iwaandishi wa Ghamalaghitso wolonga Eliya kobamighwa tanu yatse?”
11Yesu kawedika, kalonga, “Kweli tanu Eliya kakutsa, naye katsakwika ghoya pfinu pfose; 12ila nomlongelani, Eliya mala katsa, nawo ng'awamtangile baye, lekeni wamtendela ghose ghawabamile. Na pfipfo Imwana wa Imunu pfawatsomdununza.”
13Baho iwanafunzi wamanya ka Yesu yang'ali yowalongela mbuli tsa Yohana Mbatitsi.
Yesu komuhonetsa imsongolo yana ichinyamkela
(Malk 9:14-29; Luk 9:37-43a)
14Hawapfikile kuna ghumtingano ghwa iwanu, munu yumwe kamghendela Yesu, kamtowela maghoti, 15kalonga, “Ghwemtwatsa, umwonele libatsi imwanangu, kakufa chisala, na kodununzighwa ng'ani; kwaapfila mala nyingi kakughwa mna ghumoto, na mala nyingi mna ghamatsi. 16Nimghala kuna iwanafunzi wako, lekeni ng'awadahile kumhonetsa baye.”
17Yesu kedika, “Mwemwe mweleko ing'aghutoghola, na ighwihile! Nitsokala na mwemwe mbaka tsuwachi? Nitsomdudumilani mwemwe mbaka tsuwachi? Mngalile ahano imsongolo ayo!” 18Yesu kamkembela ichinyamkela, na ichinyamkela kamlawa imsongolo ayula, imsongolo ayula kahona tangu isaa aila.
19Kuya iwanafunzi wamghendela Yesu hayakalile kayeka, wamghutsa, “Heule twetwe tuhila naye ichinyamkela ayula?”
20Yesu kawalongela, “Kwaapfila inoghola yenu ihunguka. Nomlongelani kweli ghendo, hata mng'awa na noghola ka imbeghu ya haladali, mwodaha kulilongela lidunda alino, ‘Ulawe ahano, ughende akula,’ nalyo lyakuka. Wala ng'akutsakuwa na chinu chochose ing'achidahika kuna mwemwe.” 21Lekeni ichinyamkela ka ayuno ng'odaha kulawa baye kwa nzila yoyose, ila kwa ukulomba na ukufunga ukuja.
Yesu kolonga keli imbuli ya lifwa lyake
(Malk 9:30-32; Luk 9:43b-45)
22Nawo wose hawakalile Galilaya, Yesu kawalongela, “Imwana wa Adamu katsoghelighwa mna ghamoko gha iwanu, 23nawo watsomkoma, na mna litsuwa lya kadatu katsotsihiluka.”
Iwanafunzi wasing'inika ng'ani.
Kuliha ikodi ya Ing'anda ya Imlungu
24Hata hawapfikile Kaperinaumu, iwasola kodi ya lihekalu wamghendela Petiri, wamghutsa, “Apfi imlangulitsi wenu koliha inusu shekeli, ikodi ya lihekalu?”
25Naye kawedika, “Ona.”
Petiri hayengile mng'anda, Yesu kalongola ukumghutsa, “Simoni, ukonatse? Wafalume wa isi wosola kodi au ushulu kwa wanu wachi? Kwa iwanawo au kwa iwahenza?”
26Petiri kamwidika, “Kwa iwahenza.”
Yesu kalonga, “Pfinogha, ka apfo iwana wawo ng'awobamighwa kuliha kodi baye. 27Lekeni, ili tuleke kuwakwatsa, ghenda kuna litsimbu, wase indoano yako, umsole isomba ayula yulongola kumlowa; na ung'amwasama ghumlomo ghwake kutsakona shekeli. Isole ukaweng'e kwaajili ya ikodi yangu na yako.”
Šiuo metu pasirinkta:
Matei 17: LBV
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės