Yona 4
4
Ukughudubuka kwa Yona na libatsi lye Imulungu
1Kwa achi ichilawile, Yona ng'adeng'elele bae hata chidogho, apfo tsakaghudubuka ng'ani. 2Kamlongela Imulungu, “Ghwee Imulungu, imbuli ino si ihila bae yanongile kutsotenda haning'ali mne isi yangu? Apfi pfipfo pfanisumkile kutsumila Tarisisi. Tsanimanya ghweghwe kwa Imulungu yune unoghelo na libatsi, ng'usumkagha bae kona maya, ghweghwe kunogha na kwatayari kughaleka ghamawatso ghako gha kuhigha iwanu. 3Lelo, ghwee Imtwatsa, undeke nene nife, ng'apfu ning'afa kubita kuwa mghima.”
4Imtwatsa Imulungu kamwidika, “Apfi kwakona pfinogha ukughudubuka?”
5Baho Yona kaghenda ubali wa kwalilawila litsua we ghumji. Baho katsenga chibumbulika, kakala hane chimbeho chake, kobeta alole chitsolawila choni mne ghumji ghwa Ninawi. 6Kuya Imtwatsa Imulungu kahanda ghummeya, nagho ghukula na ghumwing'a Yona chimbeho, chokumhungutsila ukughaya. Yona kaghunoghela ghendo ghummeya aghwo. 7Lekeni ilupfi yake, hakuchele Imulungu kamlaghitsa imng'onyo aghudafune ghummeya, nagho ghunyala. 8Litsua halilawile, Imulungu kaghala libeho ililakatsa kulawa kwalilawila litsua, na litsua limlakatsa Yona mwitwi, chidogho yatsilike. Kabama yafe, kalonga, “Pfinogha ning'afile kubita kuwa mghima.”
9Lekeni Imulungu kamlongela Yona, “Apfi kotenda ghoya kughudubukila ghummeya?” Yona kalonga, “Ona, nighudubuka ng'ani mbaka nobama nife.”
10Kuya Imulungu kamlongela, “Ghummeya aghu ghukula mna ichilo chimwe, na ghunyala mna chilo chimwe, ghweghwe ng'utendile chinu chochose bae, wala si ghweghwe bae yughutendile ghukule, lekeni koghwonela usungu! 11Angu lelo ng'apfinoghile bae nene kuwonela libatsi iwanu wengi wa ghumji mkulu ghwa Ninawi. Ghumji ghune iwana iwobita laki imwe na elufu ishilini, yang'awodaha bae kutanga choni chinogha na choni chiha, ghumji ghune iwanyama wengi yang'awodaha kupetighwa?”
Šiuo metu pasirinkta:
Yona 4: LBV
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Pioneer Bible Translators and The Word For The World
Sužinoti daugiau apie Laghano Lya Sambi Kwe Iwanu Wose