रोमियो 5
5
परमेसर को पियार
1परमेसर नै हमरे बिसवास के कारन हमकै धरमी मानो है। परभु ईसु मसी के दुआरा हमरो परमेसर सै मेल हो गओ है। 2मसी नै हमरे ताँई उस किरपा को दरबाजो खोलो है जिसमै हम अबी खड़े हैं, जो बिसवास के कारन हमकै मिलो है। और परमेसर की महिमा की उमीद मै हम घमंड करैं हैं। 3इतनोई ना, पर हम दुख तकलीफ मै बी खुस रैहए, कैसेकै हम जानै हैं कै दुख तकलीफ सबर कै जलम देवै है। 4और सबर सैई अच्छो सौभाब और अच्छे सौभाब सै उमीद पैदा होवै है। 5और उमीद हमकै निरास ना होन देवै है कैसेकै परमेसर नै हमकै पबित्तर आत्मा दओ है और उसई के दुआरा परमेसर को पियार हमरे दिलौ मै भर गओ है।
6कैसेकै हम जब कमजोर हे, तौ सई टैम मै हम अधरमी लोगौं के ताँई मसी नै अपनी जान दई। 7का कोई धरमी आदमी के ताँई अपनी जान दे सकै है? पर का पतो, कै भले आदमी के ताँई कोई अपनी जान देए। 8पर परमेसर नै हमरे ऊपर अपनो पियार दिखाओ। जबकि हम तौ पापी हे, तब्बी मसी नै हमरे ताँई अपनी जान दे दई।
9कैसेकै अब जब हम ईसु के खून के दुआरा धरमी हो गए हैं तौ अब उसके दुआरा परमेसर की घुस्सा सै हम जरूरई बचाए जांगे। 10कैसेकै जब हम परमेसर के दुसमन हे, तौ उसनै अपने लौंड़ा की मौत के दुआरा हमरो मेल अपने संग कराओ है, और अब मेल हो चुको है तौ हम मसी जिन्दगी दुआरा मुक्ति काए ना पांगे? 11और इतनोई ना, पर अब तौ हमरे परभु ईसु मसी के दुआरा परमेसर सै मेल हो गओ है, इसताँई हम उसई के दुआरा परमेसर के ऊपर भरोसो रखकै खुस हैं।
मसी के दुआरा जिन्दगी
12एकई आदमी के दुआरा दुनिया मै पाप आओ और पाप के दुआरा मौत और ऐंसे मौत सब आदमिऔ मै फैल गई, कैसेकै सबनै पाप करौ हो। 13अब देखौ नियम आनै सै पैले दुनिया मै पाप हो, मगर जब कोई नियमई ना हो तौ किसी को बी पाप ना गिनो जावै हो। 14आदम आनै बारे मसी को चिन्न हो मगर आदम सै लेकै मूसा के टैम तक मौत सबके ऊपर राज करती रैहई। और बैसेई उनके ऊपर बी राज करो जिनौनै आदम के जैसे आगियाँ तोड़कै पाप ना करो। 15पर परमेसर को बरदान आदम की गलती के जैसो ना हो। कैसेकै जब एक आदमी की गलती के बजै सै भौस्से मर गए, तब उस्सै बी जादा परमेसर के किरपा और ईसु मसी के किरपा को बरदान भौतौं कै मिलो है। 16एकई आदमी की गलती और परमेसर के बरदान दौनौ मै भौत फरक है। एक पाप की बजै सै सजा की आगियाँ तौ देई गई, पर भौस्सी गलतिऔं के बाद जो बरदान देओ गओ, उसके दुआरा सजा सै मुक्ति मिल गई है। 17अगर एक आदमी की गलती के कारन, मौत नै उस एकई के दुआरा राज करो, तौ उस्सै बढ़कै बी जो लोग परमेसर के किरपा और धारमिकता के बरदान कै जादा सै जादा पावै हैं, उस एकई ईसु मसी के दुआरा जिन्दगी मै राज करंगे।
18इसताँई जैसे एक गलती सै सब आदमिऔ के ताँई सजा की आगियाँ भई, बैसेई एक धरम को काम बी सब आदमिऔ कै धरमी बनाकै जिन्दगी देवै है। 19कैसेकै जैसे एक आदमी के आगियाँ ना माननै सै भौस्से लोग पापी ठैरे, बैसेई एक आदमी के आगियाँ माननै सै भौस्से लोग धरमी ठैरे हैं।
20नियम इसताँई आओ कै पाप बढ़ सकै। मगर जहाँ पाप बढ़ो, बहाँ परमेसर की किरपा और बी जादा बढ़ी। 21ताकि जैसे मौत के दुआरा पाप नै राज करो, ठीक बैसेई हमरे परभु ईसु मसी के दुआरा हमेसा की जिन्दगी लानै के ताँई परमेसर के किरपा नै धारमिकता के दुआरा राज करो।
Šiuo metu pasirinkta:
रोमियो 5: TKB
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Life Compute Institute [NLCI] - CC BY-NC-ND 4.0