चेलौ के काम 26
26
अगरिपा के सामने पौलुस
1राजा अगरिपा नै पौलुस सै कैई कै, “तेकै अपनी बात रखनै की ईजाजत है।”
तबई पौलुस नै अपनो हात खड़ो करो और जबाब दओ, 2“हे राजा अगरिपा, जित्ती बातौं को यहूदी लोग मेरे ऊपर इलजाम लगाबैं हैं, उन सिगरी बातौं के बचाब मै बोलनो आज मैं तेरे सामने सई समजौ हौं। 3खास करकै इसताँई कै तू यहूदी लोगौ की सिगरे रीती रिबाज और लड़ाईऔं कै जानै है। मैं जौ बिनती करौ हौं कै तू आराम सै मेरी बात सुन।
4“सिगरे यहूदी जौ बात जानै हैं, कै मैंनै बालक सै लेकै अब तक अपने देस के और ऐरूसलेम के लोगौ मै बी कैसी जिन्दगी जीई है। 5#चेलौ 23:6; फिलि 3:5और बे मेरे बारे मै पैलेई सै जानै हैं और अगर बे चाँहै तौ जा बात की गभाई बी दे सकै हैं कै मैंनै फरीसी होकै बी अपने नियम के सच्चाई के संग जिन्दगी बिताई है। 6जौ मुकदमा जा बात की बजै सै मेरे ऊपर चल रओ है कै जो बादो परमेसर नै हमरे बापदादौं के संग करो हो मैंनै बाके ऊपर बिसवास करो। 7और हमरे बारैह गोत जा बादे कै पानै के ताँई खुसी सै दिन रात परमेसर की सेवा करै हैं। हे राजा, जा आस की बजै सै यहूदी लोग मेरे ऊपर इलजाम लगाबैं हैं। 8तुम जा बात के ऊपर बिसवास काए ना करौ हौ कै परमेसर मरे भएऔं कै फिर सै जिन्दो करै है?
9 #
चेलौ 8:3; 22:4,5 “मैं बी जौई सोचै हो कै ईसु नासरी के नाम के बिरोद मै मैंकै बी भौत कुछ कन्नो चँईऐ। 10और मैंनै ऐरूसलेम मै ऐंसोई करो कै मुक्ख पुजारिऔं के धौंरे सै अधकार की चिट्ठी लेकै परमेसर के लोगौ कै जेल मै डारो, और जब उनकै जान सै मारै हो तौ मैं बी बा बात मै संग हो। 11और मैं यहूदी लोगौ के पिराथना घरौं मै जाकै बिसवासी लोगौ कै डरा धमकाकै ईसु के बिरोद मै बोलनै के ताँई उनकै मजबूत करै हो और मैं घुस्सा सै पागल होकै उनकै सतानै के ताँई दूसरे सैहरौं मै बी जावै हो।
पौलुस को मन कैसे बदलो
(चेलौ के काम 9:1–19; 22:6–16)
12“जब मैं मुक्ख पुजारिऔं के धौंरे सै अधकार और हुकम ले कै दमिसक सैहर मै जा रओ हो, 13तबई हे राजा, दुफैर के बखत मै मैंनै आसमान सै एक ऐंसी जोती आते भए देखी जो सूरज सै बी जादा तेज ही और बौ जोती मेरे और मेरे संग चलनै बारौ के चारौ लंग चमकती भई देखी। 14जब हम सब जनी धरती मै गिर गए तबई मैंकै इबरानी भासा मै एक अबाज सुनाई दई, ‘हे साऊल, हे साऊल, तू मैंकै काए सताबै है? तू मैंकै सता कै, खुद कै चोट पौंचागो।’
15“मैंनै कैई, ‘हे परभु, तू कौन है?’
“परभु नै कैई कै, ‘मैं ईसु हौं जिसकै तू सताबै है। 16पर तू उठ और सीदो खड़ो हो जा। मैंनै तेकै इसताँई दरसन देओ है कै तेकै सेवक और उन बातौं को गभा ठैराऔ, जो तैनै मेरे बारे मै देखी हैं और जो बी मैंनै तेकै दिखाओ है, उनकी गभाई तू लोगौ कै देगो। 17मैं तेकै यहूदी और गैर यहूदी के धौंरे भेजंगो और उनसै बचातो रैहंगो। 18कै तू उनकी आँखौ कै खोलै जिस्सै कै बे लोग इन्धेरे सै उज्जेरे की ओर आँय और जो सैतान के फंदा मै फसे पड़े हैं, उनकै तू परमेसर के राज मै लेकै आय जिस्सै कै उनके पाप माफ हौं, और परमेसर के छाँटे भए बिसवासी लोगौ मै बे अपनी जघै बनाऐ।’
पौलुस के काम
19“हे राजा अगरिपा, इसताँई मैंनै बा दरसन की बात ना टाली जो मैंकै सुरग सै मिलो हो, 20#चेलौ 9:20,28,29और पैले दमिसक मै फिर ऐरूसलेम और फिर यहूदिया मुलक के लोगौ कै और गैर यहूदी लोगौ कै समजातो रैहओ कै अपने गलत कामौ सै मन फिराऔ और परमेसर की ओर मुड़ौ और ऐंसे काम करौ जिस्सै जौ पतो लगै कै हमरो मन बदल गओ है। 21जा बात की बजै सै जब मैं यहूदी लोगौ के मन्दर मै हो तौ उन्नै मैंकै पकड़ लओ और मैंकै मारनै की कोसिस करी। 22पर परमेसर की सायता सै मैं आज छोटे और बड़े सबई लोगौ के सामने गभाई दैनै के ताँई खड़ो हौं। जो होनै बारो है उन बातौं के बारे मै नबिऔ नै और मूसा नै कैओ हो, मैंनै उन बातौं कै छोड़कै और कुछ ना कैओ। 23#1 कुर 15:20 कै मसी कै दुख झेलनो पड़ैगो और बौई सबई सै पैले मरे भएऔं मैसै जिन्दो होकै, यहूदी लोगौ मै और गैर यहूदी लोगौ मै मुक्ति के ताँई परचार करैगो।”
24जब पौलुस अपने बचाब मै जे सिगरी बात कैई रओ हो कै तबई फेस्तुस नै जोर सै चिल्लाकै कैई कै, “तू पागल हो गओ है, तेरे गियान नै तेकै पागल कर दओ है।”
25तबई पौलुस नै कैई, “हे आदरनीय फेस्तुस, मैं पागल ना हौं, पर मैं सच्ची और समज की बात कैबौ हौं। 26हे राजा अगरिपा, मैं तेरे सामने बिना डरे बोल रओ हौं और तू खुद बी इन बातौं के बारे मै जानै है। मैंकै बिसवास है कै इन बातौं मै सै कुछ बी बात तेसै लुकी ना है। कैसेकै जौ घटना किसी कौने मै ना भई। 27हे राजा अगरिपा, का तू नबिऔ को बिसवास करै है? हाँ मैं जानौ हौं कै तू बिसवास करै है।”
28तबई राजा अगरिपा नै पौलुस सै कैई कै, “का तू जौ समजै है कै तू इत्ती आसानी सै मैंकै मसी मै बिसवास कन्नै के ताँई राजी कर लेगो?”
29पौलुस नै कैई कै, “जल्दी या देर सैई पर मेरी परमेसर सै जौ बिनती है कै, तूई ना पर जित्ते बी लोग मेरी आज सुन रए हैं, सिरप इन साँकरौ कै छोड़कै, बे मेरे हाँई हो जांगे।”
30तबई राजा अगरिपा खड़ो हो गओ और बाके संग राजपाल फेस्तुस, बिरनीके और बहाँ बैठे भए सिगरे लोग खड़े हो गए। 31और बहाँ सै बाहार लिकरकै बे आपस मै बात करते भए कैललगे कै, “जा आदमी नै तौ ऐंसो कुछ काम ना करो है जिस्सै कै जाकै जेल की सजा या मौत की सजा दई जाऐ।” 32तबई अगरिपा नै फेस्तुस सै कैई कै, “अगर जा आदमी नै रोमी राजा के सामने अपने नियाय की बिनती ना करी होती, तौ हम जाकै छोड़ देते।”
Šiuo metu pasirinkta:
चेलौ के काम 26: TKB
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Life Compute Institute [NLCI] - CC BY-NC-ND 4.0