चेलौ के काम 20
20
पौलुस को मकिदुनिया और यूनान मै जानो
1जब दंगा फसाद थम गओ तबई पौलुस नै चेलौ कै बुलबाकै उनकी हिम्मत बढ़ाई और बिदा लेकै मकिदुनिया की ओर चल पड़ो। 2बौ बहाँ के सिगरे देसौ के चेलौ की हिम्मत बढ़ाते भए यूनान देस मै आओ। 3बहाँ तीन महीना रैहनै के बाद बौ पानी के जिहाज सै सीरिया जानै के ताँई सोच रओ हो, तौ जबई बा बखत मै कुछ यहूदी लोगौ नै बाके बिरोद मै चाल चली, इसताँई बानै मकिदुनिया सै होते भए लौहट जानै की सोची। 4और बाके संग बिरिया सैहर के पिरुस को लौंड़ा सोपतुस, थिसलुनीके सैहर को अरितरखुस और सिकन्दर, और दिरबे को गयुस, और एसिया इलाके को तुखिकुस और तुरफिमुस, और तीमुथियुस बी हो। 5जे लोग अग्गे जाकै तरोआस सैहर मै हमरो पैंड़ो देखते रैहए। 6और हम बिना खट्टे चून को तौहार के बाद फिलिप्पी सै पानी के जिहाज मै पाँच दिन मै तरोआस सैहर मै उनके धौंरे पौंचे और उनके संग सात दिन तक रुके।
पौलुस की आखरी यातरा
7हप्ता के पैले दिन जब हम परभु की याद मै रोटी तोड़नै के ताँई इखट्टे भए तबई पौलुस उनके संग बात बतकाल लगो कैसेकै बाकै दूसरे दिन जानो हो इसताँई आधी रात तक बौ उनके संग बात बतकातो रैहओ। 8जिस ऊपर के कमरा मै हम सबई जनी बैठे हे बहाँ भौस्से दिया पजर रए हे। 9और बहीं खिड़की के धौंरे यूतखुस नाम को एक जमान टूल रओ हो, कैसेकै जब पौलुस देर तक बात करतो रैहओ तौ बौ नींद की झपकी मै तीसरी मन्जिल सै गिर गओ और मर गओ।
10तबई पौलुस उतरो और बाके धौंरे जाकै गले सै लगाकै कैई, “डरिओ मत जौ जिन्दो है।” 11और फिर पौलुस नै ऊपर जाकै रोटी तोड़ी और खाकै भौत देर तक बात करतो रैहओ और तबई सकारो हो गओ और जाके बाद बौ चले गओ। 12और बे बा जमान के संग घर आए, और बाके जिन्दे होनै सै उनकै भौत खुसी मिली।
तरोआस सै मिलेतुस सैहर मै जानो
13हम पैलेई पानी के जिहाज मै बैठकै असुस सैहर की ओर चल पड़े जहाँ सै हमकै पौलुस कै बी अपने संग जिहाज मै चढ़ानो हो। कैसेकै पौलुस पैधर आनो चाँहै हो बानै जौई योजना बनाई ही। 14और जब बौ हमकै असुस मै मिलो तौ तबई हमनै बाकै जिहाज मै बिठा लओ और मितेलेने सैहर की ओर चले। 15और दूसरे दिन हम खियुस टापू के धौंरे सै लिकरते भए सामोस टापू मै पौंचे और बाके दूसरे दिन मिलेतुस सैहर मै आए। 16कैसेकै पौलुस नै पिन्तेकुस तौहार के दिन ऐरूसलेम मै पौंचनै की सोची ही, इसताँई बानै ठानी कै इफिसुस की रस्ता सै जाऐ जिस्सै कै मैंकै एसिया इलाके मै रुकनो ना पड़ै।
पौलुस की इफिसुस के मुखियौं सै बातचीत
17पौलुस नै इफिसुस के बिसवासिऔ की मंडली के मुखियौं धौंरे जौ खबर भिजबाई कै बे मैंकै मिलेतुस मै मिलैं। 18जब बे बाके धौंरे आए तौ तबई बानै कैई, “तुमकै पतो है कै एसिया मै आनै के बाद पैलेई दिन सै मैं तुमरे संग कैसे रैहओ हौं। 19और यहूदी लोगौ के कपट की बजै सै मैंकै बेसानी दुख और परेसानी आँई। पर मैं रो रो कै दीन आदमी के हाँई परभु को काम करतो रैहओ। 20तुम जानौ हौ कै मैं तुमरे भले की बात कै बतानै सै हिचकिचाओ बी ना और लोगौ के सामने और घर घर जाकै सिकानै सै बी पिच्छे ना हटो। 21मैं यहूदी और यूनानी लोगौ सै बिनती करतो रैहओ कै परमेसर की ओर बढ़ौ और हमरे परभु ईसु मसी मै बिसवास करौ।
22“अब पबित्तर आत्मा के दुआरा मैं ऐरूसलेम की ओर जाबौ हौं और बहाँ मेरे संग का होगो, मैंकै पतो ना है। 23मैं तौ बस जौ जानौ हौं कै, सिगरे सैहर मै पबित्तर आत्मा जौ कैह कै मैंकै चौकस करै है कै जेल और कसट तेरे ताँई पैंड़ो देख रए हैं। 24#2 तीमु 4:7पर मेरे नजरौ मै मेरी जान की कोई कीमत ना है, कैसेकै मैं अपनी दौड़ पूरी कन्नै की सोचौ हौं और परमेसर के किरपा की अच्छी खबर कै सुनानै के काम कै पूरो कन्नो चाँहौ हौं जिसके ताँई मैंकै परभु नै चुनो है।
25“अब मैं जौ जानौ हौं कै जिनके बीच मै मैंनै परमेसर के राज को परचार करो है, बे मेरो मौह कबी ना देख पांगे। 26इसताँई आज मैं तुम सबई कै जौ गभाई देवौ हौं कै, तुम्मै सै किसी के नास को मैं दोसी ना हौं। 27कैसेकै परमेसर की सिगरी इच्छा कै मैं बतानै के ताँई कबी बी हिचकिचाओ ना। 28इसताँई तुम अपनी और अपने लोगौ की देखभाल करौ, जिसके ताँई तुमकै पबित्तर आत्मा नै चुनो है, कैसेकै तुम बिसवासिऔ की मंडली के लोगौ के ताँई ऐंसे हौ जैसे गड़रिया भेड़ौ के झुन्ड के ताँई है। जिसकै परमेसर नै अपने लौंड़ा को खून देकै मोल लओ है। 29मैं जानौ हौं कै मेरे जानै के बाद खतरनाक भिड़िया हाँई लोग तुमरे बीच मै आंगे और बिसवासी लोगौ के झुन्ड कै ना छोड़ंगे। 30तुमरे बीच मै ऐंसे लोग खड़े हौंगे जो चेलौ कै अपने पिच्छे कन्नै के ताँई घुमा फिरा कै बात कैंगे। 31इसताँई चौकस रौह और याद करौ कै मैं तुमकै तीन साल तक दिन रात रो रो कै सबई जनी कै समजातो रैहओ।
32“अब मैं तुमकै परमेसर के बचन और बाके किरपा के हात मै सौंप रओ हौं, जो तुमकै पबित्तर लोगौ के संग बड़ाई और बारिस होनै को हक दे सकै है। 33मैंनै कबी बी किसी के सौने, चाँदी और लत्तौ को लालच ना करो। 34तुम खुद बी जौ जानौ हौ कै मैंनै अपने हात सै अपनी और अपने सातिऔं की जरूरतौं कै पूरो करो। 35हर एक घड़ी मै मैंनै मैहनत कर करकै तुमरे सामने दिखाओ है कै दूसरौं की कैसे सायता करैं। परभु ईसु के बचन कै याद रक्खौ जो बानै कैओ हो कै, ‘माँगनै सै दैनो जादा अच्छो है।’ ”
36जौ बात कैह कै बानै अपने घूंटे टेके और उन सबई के संग पिराथना करी। 37तबई बे सबई जनी खूबई रोए और बासै मिलकै बाकै बिदा करो। 38कैसेकै बानै उनकै ऐंसो कैई ही कै, “तुम मेरो मौह अब कबी बी ना देख पाऔगे,” इसई बात की बजै सै उनकै भौत दुख हो। तबई उन्नै बाकै पानी के जिहाज मै बिठा कै बिदा करो।
Šiuo metu pasirinkta:
चेलौ के काम 20: TKB
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Life Compute Institute [NLCI] - CC BY-NC-ND 4.0